ނޮވެންބަރު މަހު ވައްކަމުގެ 304 މައްސަލައެއް، އެކްސިޑެންޓްގެ 235 މައްސަލައެއް!

ނިމިދިޔަ ނޮވެންބަރު މަހުގައި ވައްކަމުގެ 304 މައްސަލަ އަދި ޓްރެފިކް އެކްސިޑެންޓުގެ 235 މައްސަލަ ހުށަހަޅާފައިވާ ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ކޮންމެ މަހަކު ވެސް ފުލުހުން އާންމުކުރާ ތަފާސްހިސާބުތައް ދައްކާ ގޮތުން ނޮވެންބަރު މަހުގެ ތެރޭގައި ފުލުހުންނަށް ހުށަހަޅާފައިވަނީ ޖުމްލަ 975 މައްސަލައެކެވެ. އޭގެ ތެރެއިން އެންމެ ގިނައިން ފުލުހުންނަށް ހުށަހަޅާފައި ވަނީ ވައްކަމުގެ މައްސަލަތަކެވެ.

އޮކްޓޯބަރު މަހު 1068 މައްސަލަ ފުލުހުންނަށް ހުށަހަޅާފައިވާއިރު، އޮކްޓޯބަރު މަހުވެސް އެންމެ ގިނައީ ވައްކަމުގެ މައްސަލަތަކެވެ. އަހަރުގެ ކުރީކޮޅާ އަޅާބައިރު، އަހަރުގެ ފަހުކޮޅު ފުލުހުންނަށް ހުށަހެޅިފައިވާ މައްލަތައް ގިނަ ކަން ފާހަގަ ކޮށްލެވެއެވެ.

މި އަހަރުގެ މިހާތަނަށް ވައްކަމުގެ 3394 މައްސަލަ ރިޕޯޓުކޮށްފައިވާއިރު، ނިމި ދިޔަ ނޮވެންބަރު މަހު އެކަނިވެސް ވައްކަމުގެ 304 މައްސަލަ ފުލުހުންނަށް ރިޕޯޓުކޮށްފައިވެއެެވެ. އަދި އޮކްޓޯބަރު ވައްކަމުގެ 303 މައްސަލަ ފުލުހުންނަށް ރިޕޯޓުކޮށްފައިވެ.

އަހަރުގެ އެގާރަ މަސް ފާއިތުވެގެން ދިޔައިރު ދެން އެންމެ ގިނައިން ރިޕޯޓުކޮށްފައިވަނީ ޓްރެފިކް އެކްސިޑެންޓުތަކުގެ މައްސަލަ. އެގޮތުން އެކްސިޑެންޓުގެ 2572 މައްސަލަ ފުލުހުންނަށް ރިޕޯޓުކޮށްފައިވާ ކަމަށް ތަފާސް ހިސާބުތަކުން ދައްކައެވެ. އަދި ނިމިދިޔަ ނޮވެންބަރު މަހު އެކްސިޑެންޓުގެ 235 މައްސަލައެއް ފުލުހުންނަށް ވަނީ ރިޕޯޓުކޮށްފައެވެ. އަދި އޮކްޓޯބަރ މަހު ވަނީ 283 މައްސަލަ ފުލުހުންނަށް ރިޕޯޓުކޮށްފައެވެ.

މީގެ އިތުރުން އަހަރުގެ މިހާތަނަށް މަސްތުވާތަކެތީގެ 1525 އަށް ވުރެ ގިނަ މައްސަލަ ފުލުހުންނަށް ހުށަހެޅިފައިވާއިރު، ނޮވެންބަރު މަހު ފުލުހުންނަށް ވަނީ މަސްތުވާތަކެތީގެ 130 މައްސަލައެއް ރިޕޯޓުކޮށްފައެވެ. ފުލުހުންނަށް އާންމު ގޮތެއްގައި ހުށަހަޅާފައި ވަނީ ވައްކަން ކުރުމުގެ މައްސަލަތަކާއި، ޓްރެފިކް އެކްސިޑެންޓުގެ މައްސަލަތަކާއި، މުދަލަށް ގެއްލުން ދިނުމުގެ މައްސަލަތަކާއި، މަކަރާއި ހީލަތް ހެދުމުގެ މައްސަލަތަކާއި، ޖިންސީ ގޯނާގެ މައްސަލާއާއި، ގެވެށި އަނިޔާގެ މައްސަލަތަކާއި ފޭރުމާއި ފޯޖް ކުރުމުގެ މައްސަލަތަކުގެ އިތުރުން މަސްތުވާތަކެއްޗާ ގުޅޭ މައްސަލަތަކެވެ.

ފުލުހުންނަށް ހުށައެޅޭ މައްސަލަތަކުގެ ތަފާސްހިސާބުތަށް ހާމަކުރަން ފެށީންސުރެއް އެންމެ ގިނައިން ރިޕޯޓުކޮށްފައިވަނީ ވައްކަމުގެ މައްސަލަތަކެވެ. އެގޮތުން ވައްކަމުގެ މައްސަލަތައް އުޅެނީ އެވްރެޖްކޮށް އަހަރަކު 3000 އިން މަތީގައެވެ. 2023 ވަނަ އަހަރު ނިމުނުއިރު ވައްކަމުގެ 3819 މައްސަލައެއް ފުލުހުންނަށް ހުށަހަޅާފައިވެއެވެ.

ރާއްޖޭގެ ކުށުގެ ވެށީގައި ހިނގާ މައްސަލަތައް ހައްލު ކުރުމަށް އަތޮޅުތަކުގެ ޕޮލިސް ސްޓޭޝަންތަކުން ކައުންސިލްތަކާއި ގުޅިގެން ދަނީ ތަފާތު މަސައްކަތްތައް ކުރަމުން. އަދި ފުލުހުންގެންދަނީ ކަމާ ގުލުހުންހުރި އިދާރާތަކާ ގުޅިގެން ކެނޑިނޭޅި ގިނަ މަސައްކަތްތަކެެއް ކުރަމުންކަންވެސް ފާހަގަ ކޮށްލަންޖެހެއެވެ.