ނުހައްޤު މުއްސަނދިކަން ހޯދައި ލިބިގަތުމުގެ ކުށުގެ ޤާނޫނަށް އިސްލާހް ހުށަހަޅައިފި

ދައުލަތުގެ މުވައްޒަފަކު ނުވަތަ ދައުލަތުގެ މަގާމެއްގައި ހުރި މީހަކު އެ މަގާމެއްގައި ހުރެގެން ނުހައްގުން މުއްސަނދިކަން ހޯދާފައިވާނަމަ ދައުވާކުރެވޭގޮތަށް ޤާނޫނުލް އުޤޫބާތަށް އިސްލާހް ގެނައުމަށް މިއަދު ރައްޔިތުންގެ މަޖިލީހަށް ހުށަހަޅައިފިއެވެ.

ސަރުކާރުގެ ފަރާތުން މި ބިލް ހުށަހެޅުއްވީ މާފުށި ދާއިރާގެ މެމްބަރު ހުސައިން ރިޒާ އާދަމްއެވެ.

އެ އިސްލާހުގައިވަނީ ނުހައްގު މުއްސަނަދިކަން ހޯދައި ލިބިގަތުމުގެ ކުށެއްގެ ގޮތުގައި ކަނޑައަޅާނީ ދައުލަތުގެ މުވައްޒަފަކަށްވެހުރެ، ލިބެމުންދާ ނުވަތަ ދައުލަތުގެ މުވައްޒަފެއްގެ ގޮތުގައި ވަޒީފާ އަދާކުރިއިރު، ލިބެމުންދިޔަ އާމްދަނީއާ ނުބައްދަލު ދިރިއުޅުމުގެ ފެންވަރެއް ޤާއިމްކޮށްފައިވުން ނުވަތަ އެފަދައިން ގާއިމްކުރާ ދިރިއުޅުމުގެ ފެންވަރު ދެމެހެއްޓުމުން ކަމަށެވެ.

މީގެއިތުރުން ދައުލަތުގެ މުވައްޒަފަކަށްވެހުރެ، ނުވަތަ ދައުލަތުގެ މުވައްޒަފަކަށްހުރެ ލިބެމުންދާ އާމްދަނީއާ ނުބައްދަލު މިންވަރަކަށް އޭނާގެ ނަމުގައި ނުވަތަ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހެއްގެ ނަމުގައި މުދާ ނުވަތަ ފައިސާ ހޯދައި މިލްކުކުރުމުން ކަމަށެވެ.

އަދި ދިރިއުޅުމުގެ ފެންވަރު އެނާ ގާއިމްކޮށް ހިފަހައްޓާފައިވާނީ ގާނޫނީގޮތުން ހުއްދަކޮށްފައިވާގޮތުގެ މަތިން ސާބިތުކޮށްނުދެވެން ނުވަތަ އޭނާއަށް ނުވަތަ އޭނާއާ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހަކަށް އެ މުދަލެއް ނުވަތަ ފައިސާ ލިބިފައިވަނީ ގާނޫނު ހުއްދަކުރާ ގޮތުގެމަތިންކަން ސާބިތުކޮށްނުދެވުމުން ކަމަށެވެ.

ދައުލަތުގެ މުވައްޒަފެއްގެ ދިރިއުޅުމުގެ ފެންވަރު އޭނާ ގާއިމްކޮށް ހިފަހައްޓާފައިވަނީ ގާނޫނީގޮތުން ހުއްދަކޮށަފައިވާ ގޮތުގެ މަތިންކަމުގައި ސާބޮތުކޮށްދެވިއްޖެ ޙާލަތެއްގެއި، އޭނާ އެކުރަނީ ކުށެއް ނޫން ކަމަށް މިއަދު ހުށަހެޅި ބިލުގައިވެއެވެ.

އެ އިސްލާހުގައިވަނީ ނުހައްގު މުއްސަނަދިކަން ހޯދައި ލިބިގަތުމުގެ ކުށެއް ކޮށްފައިވަނީ ރައީސުލްޖުމުހިރިއްޔާ ކަމުގެ ނުވަތަ ވަޒީރުކަމުގެ ނުވަތަ ރައްޔިތުންގެ މަޖިލީހުގެ މެމްބަރު ކަމުގެ ނުވަތަ ފަނޑިޔާރުކަމުގެ މަގާމެއްގައި ހުރި މީހަކު ކަމުގައިވާނަމަ، އެ ކުށަކީ ޖިނާއަތުގެ ދެވަނަ ދަރަޖައިގެ ކުށެކެވެ. އެ ނޫން ޙާލަތްތަކުގއި އެކުށަކީ ޖިނާއަތުގެ ތިން ވަނަ ދަރަޖައިގެ ކުށެކެވެ.

ސަރުކާރުން މި ބިލު ހުށަހެޅުމުގެ ބޭނުމަކީ ދިވެހިރާއްޖޭގެ ގާނޫނުލްއުގޫބާތުގެ ދަށުން ނުހައްގުން މުއްސަނދިކަން ހޯދައި ލިބިގަތުމުގެ ކުށް ކަނޑައަޅާފައި އޮތްގޮތުން ގާނޫނު މާނަކުރުމުގައި އޮޅުން އަރާތީ، އެ މާއްދާ އިސްލާހުކުރުމަށްޓަކައި ގެންނަންޖެހޭ އިސްލާހުތައް ގެނައުމެވެ.