ޑިޒާސްޓަރ މެނޭޖްމަންޓް ޕްލޭންގެ ފަހު ދެލިކޮޕީ ސްޓިއަރިންގ ކޮމިޓީއަށް ހުށަހަޅައިފި

ކާރިސާތަކުން ލިބޭ ގެއްލުން ކުޑަކުރުމުގެ ޤައުމީ އިސްތިރާޖު އެކުލެވޭ "ޑިޒާސްޓަރ މެނޭޖްމަންޓް ޕްލޭން" ގެ ފަހު ދެލިކޮޕީ އެކުލަވާލައި، އެއަށް ފަންނީ ލަފާ ހޯދުމަށްޓަކައި ޑިޒާސްޓަރ މެނޭޖްމަންޓް ސްޓިއަރިންގ ކޮމިޓީގެ ބައްދަލުވުމަށް މިއަދު ހުށަހަޅައިފިއެވެ.

މި ޕްލޭން ހުށަހަޅާފައިވަނީ މި އަހަރުގެ 3 ވަނަ "ޑިޒާސްޓަރ މެނޭޖްމަންޓް ސްޓިއަރިންގ ކޮމިޓީ" ގެ ބައްދަލުވުމުގައެވެ. ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އެކްސްގައި ހިއްސާކުރި ޕޯސްޓެއްގައި ބުނީ، މި ބައްދަލުވުން ކުރިއަށް ގެންގޮސްފައިވަނީ އެ ކޮމިޓީގައި ހިމެނޭ ކަމާގުޅުންހުރި މުއައްސަސާތަކުގެ އިސްވެރިންނާއި ފަންނީ މާހިރުންގެ ފުރިހަމަ ބައިވެރިވުމާއެކުގައެވެ.

ކާރިސާއާބެހޭ ކަންކަން ބެލެހެއްޓުމުގެ ޤާނޫނު (ޤާނޫނު ނަންބަރު: 28/2015) ގެ ދަށުން ޤައުމީ ފެންވަރުގައި އެކުލަވާލަންޖެހޭ މި ޕްލޭންގެ ފަހު ދެލިކޮޕީ އެކުލަވާލުމަށްފަހު ބޭއްވި މި ބައްދަލުވުމުގެ މައިގަނޑު މަޤްޞަދަކީ، ޑިޒާސްޓަރ މެނޭޖްމަންޓް ކައުންސިލަށް މި ޕްލޭން ހުށަހެޅުމުގެ ކުރިން، ކޮމިޓީގެ މެންބަރުންގެ ޚިޔާލާއި ފަންނީ މަޝްވަރާ ހޯދައި، ޕްލޭން އިތުރަށް މުއްސަނދިކޮށް، ފުރިހަމަކުރުމެވެ.

މި ޕްލޭނަކީ ރާއްޖެއަށް ކުރިމަތިވާ އެކިއެކި ކާރިސާތަކުން ރައްކާތެރިވުމަށާއި، ކާރިސާތަކުން ލިބޭ ގެއްލުން ވީހާވެސް ކުޑަކުރުމަށްޓަކައި އެކުލަވާލެވޭ މުހިންމު އިސްތިރާޖީ ޕްލޭނެކެވެ. މިއީ ދިވެހިރާއްޖޭގެ ތިމާވެށީގެ ނާޒުކު ހާލަތަށާއި، މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ނުރައްކާތަކަށް ޤައުމީ ފެންވަރުގައި އިޖާބަދިނުމުގެ ޤާބިލުކަން އިތުރުކުރުމަށް އެޅޭ މުހިންމު ފިޔަވަޅެކެވެ.

ދިވެހިރާއްޖެއަކީ ޖިއޮގްރަފީ ގޮތުން ވަކިވަކި ޖަޒީރާތަކަކަށް ބެހިފައިވާ ޤައުމަކަށް ވުމުން، އުދައެރުމާއި، ފެންބޮޑުވުމާއި، ވިއްސާރައިގެ ސަބަބުން ލިބޭ ގެއްލުންތައް ފަދަ ޤުދުރަތީ ކާރިސާތަކުގެ ނުރައްކާ އަބަދުވެސް އޮވެއެވެ. މީގެ އިތުރުން އަލިފާނުގެ ހާދިސާތަކާއި އެހެނިހެން އިންސާނީ ހަރަކާތްތަކުގެ ސަބަބުން ދިމާވާ ކާރިސާތަކަކީވެސް ރާއްޖޭގައި އިތުރުވަމުން އަންނަ ގޮންޖެހުންތަކެކެވެ. މިފަދަ ހާދިސާތައް ހިނގުމުން އެކަށީގެންވާ އަވަސް ފިޔަވަޅުތަކެއް އެޅުމަށާއި، މުއައްސަސާތަކުގެ މެދުގައި ގުޅުން ބަދަހިކޮށް އެއް އަމާޒަކަށް މަސައްކަތްކުރުމަށް ޤައުމީ ފެންވަރުގެ ހަރުދަނާ ޕްލޭނެއްގެ މުހިންމުކަން އަބަދުވެސް އޮވެއެވެ.

އެންޑީއެމްއޭ އިން ފާހަގަކުރި ގޮތުގައި މި ޕްލޭން ފާސްވެ، ޢަމަލީ ގޮތުން ތަންފީޒުކުރަން ފެށުމުން، ރާއްޖެއަށް ދިމާވާ ޤުދުރަތީ އަދި އެހެނިހެން އެކި ކާރިސާތަކުން ލިބޭ ގެއްލުންތައް ކުޑަކުރުމަށާއި، ކާރިސާތަކުން އަރައިގަތުމަށް ޤައުމީ ފެންވަރުގައި ކުރެވޭ އެންމެހައި މަސައްކަތްތައް އިތުރަށް ހަރުދަނާވެގެންދާނެއެވެ. އަދި ލާމަރުކަޒީ އުޞޫލުން ރަށްރަށުގެ ކައުންސިލްތަކާއި ޤައުމީ އިދާރާތައް ގުޅިގެން، ހަރުދަނާ ނިޒާމެއްގެ ތެރެއިން އެކަންކަން ކުރިއަށް ގެންދިއުމަށް ވަރަށް ބޮޑަށް މަގުފަހިވެގެންދާނެ ކަމަށްވެސް އެ އިދާރާއިން މައުލޫމާތު ދެއެވެ.