ފުއްގިރި ހިޔާނާތުގެ މައްސަލައިގައި ރައީސް ޔާމީނަށް ހުކުމް އިއްވުން މި މަހު 29 ގައި

ރ ފުއްގިރި ހިޔާނާތުގެ މައްސަލައިގައި ރައީސް އަބްދުﷲ ޔާމީން އަބްދުލް ގައްޔޫމްގެ މައްޗަށް ހުކުމް އިއްވުން މި މަހު 29 ވަނަ ދުވަހަށް ކްރިމިނަލް ކޯޓްގައި ތާވަލުކޮށްފިއެވެ.

މި މައްސަލައިގައި ދައުލަތާއި ދިފާއުގެ ހުލާސާ ބަޔާން އިއްވައި ނިންމުމާއި ގުޅިގެން މައްސަލަ ބައްލަވާ ފަނޑިޔާރު އަލީ ނަދީމް ވަނީ ހުކުމް އިއްވުމުގެ އަޑުއެހުން މި އޮކްޓޯބަރު މަހުގެ 29 ވާ ބުރާސްފަތި ދުވަހުގެ ހެނދުނު 9 ޖަހާއިރު ބާއްވަން ނިންމާފައެވެ.

ފުއްގިރި ހިޔާނާތުގެ މައްސަލައިގައި ރައީސް ޔާމީންގެ މައްޗަށް ދައުލަތުން އުފުލާފައިވަނީ މަނީ ލޯންޑްރިންގ ގެ ދައުވާ އާއި ރިޝްވަތު ގަބޫލުކުރުމުގެ ކުށުގެ ދައުވާއެވެެ.

މި މައްސަލައިގައި ފުރަތަމަ 6 ފަރާތެއްގެ މައްޗަށް ތުހުމަތުކޮށް ދައުވާކުރި ނަމަވެސް މިހާރު ޝަރީއަތް ކުރިއަށް ގެންދަނީ ހަމައެކަނި ރައީސް ޔާމީންގެ މައްޗަށެވެ.

ފުއްގިރި ހިޔާނާތުގެ މައްސަލައިގެ ހުކުމް މި މަހުގެ 29 ވަނަ ދުވަހަށް ތާވަލްކޮށްފައިވާއިރު، ވ އާރަށް ހިޔާނާތުގެ މައްސަލައިގެ ޝަރީއަތްތައް ވެސް އަލުން ފަށައިގެން ކްރިމިނަލް ކޯޓުގައި ކުރިއަށް ގެންދަމުންދާކަން ފާހަގަކޮށްލެވެއެވެ.