ފުނަދޫ ސްކޫލުން ގޮނޑުދޮށުގެ ދިރުންތައް ދަސްކޮށްދިނުމުގެ ހަރަކާތެއް ބާއްވައިފި

ށ. ފުނަދޫ ސްކޫލުގެ ގްރޭޑް 3 ގެ ދަރިވަރުންނަށް ޚާއްޞަކޮށްގެން، އެ ރަށުގެ ގޮނޑުދޮށާއި ފަޅުތެރޭގައިވާ ޤުދުރަތީ ދިރުންތައް ޢަމަލީ ގޮތުން ތަޖުރިބާކޮށް ދަސްކުރުމުގެ ޝައުޤުވެރި ޙަރަކާތެއް (ޓައިޑް ޕޫލް އެކްސްޕްލޮރޭޝަން) ކާމިޔާބުކަމާއެކު ބާއްވައިފިއެވެ.

މި ހަރަކާތުގެ މައިގަނޑު މަޤްޞަދަކީ ކުލާސްރޫމުން ބޭރުން ޢަމަލީ ތަޖުރިބާ ހޯދައިދީ، ޤުދުރަތީ ވެށްޓަށް ދަރިވަރުންގެ ހިތްތަކުގައި އޮންނަ ލޯތްބާއި ޝައުޤުވެރިކަން އިތުރުކުރުމެވެ.

މި ދަތުރުގެ ތެރެއިން، ރަށުގެ ގޮނޑުދޮށުން ފެންނަ ތަފާތު ދިރުންތައް ގާތުން ދެކެބަލައި، އެ ތަކެއްޗާ ބެހޭ މަޢުލޫމާތު މުއްސަނދިކުރުމުގެ ފުރުސަތު ދަރިވަރުންނަށް ވަނީ ފަހިވެގެން ގޮސްފައެވެ.

މި ހަރަކާތް ކާމިޔާބުކަމާއެކު އިންތިޒާމުކޮށް ކުރިއަށް ގެންދިއުމުގައި ށ. ފުނަދޫ ކައުންސިލާއި، ފުނަދޫ ސްކޫލުގެ އިތުރުން ފުނަދޫ ޕޮލިސް ސްޓޭޝަނާއި ރީޖަނަލް އެއާޕޯޓްސްގެ ފަޔަރ އެންޑް ރެސްކިއު ޓީމުން ވެދެއްވި އަގުހުރި އެހީތެރިކަމާއި އެއްބާރުލުން، އިންތިޒާމުކުރި ފަރާތުން ވަނީ ނުހަނު ޝުކުރުވެރިކަމާއެކު ފާހަގަކޮށްފައެވެ.

މިފަދަ ޢަމަލީ ދަތުރުތަކުގެ ސަބަބުން ކުޑަކުދިންގެ މެދުގައި ތިމާވެށްޓާމެދު ހޭލުންތެރިކަން އިތުރުވެ، ކުރިމަގުގައި ޤުދުރަތީ ވެށި ޙިމާޔަތްކުރުމަށް އިސްނަގައިގެން މަސައްކަތްކުރާނެ ހަރުދަނާ ޖީލެއް ބިނާވެގެންދާނެ ކަމަށް މި ޙަރަކާތް އިންތިޒާމުކުރި ފަރާތުން އުންމީދުކުރެއެވެ.