ޓްރީ ގާޑިއަން ބެޖް ތަޢާރަފުކޮށްފި

5 މިލިއަން ގަސް އިންދުމުގެ ޤައުމީ މަޝްރޫޢު އިތުރަށް ފުޅާކުރުމުގެ ގޮތުން، ހާއްސަ ބެޖެއް ތައާރަފްކޮށްފިއެވެ.

5 މިލިއަން ޓްރީ ގާޑިއަން ބެޖް ގެ ނަމުގައި މި ބެޖު ތަޢާރަފުކޮށްފައިވަނީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އާއި ދަ މޯލްޑިވްސް ސްކައުޓް އެސޯސިއޭޝަން ގުޅިގެންނެވެ.

މި ބެޖް ރަސްމީކޮށް ލޯންޗުކޮށްދެއްވީ މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ، ޠާރިޤު އިބްރާހީމެވެ.

މިކަމަށްޓަކައި އެންވަޔަރަމަންޓް މިނިސްޓްރީގައި ބޭއްވި ޚާއްޞަ ރަސްމިއްޔާތުގައި، ދެފަރާތުގެ ދެމެދުގައި ވަނީ ފަހުމުނާމާއެއްގައި ސޮއިކޮށްފައެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ 5 މިލިއަން ގަސް އިންދުމުގެ ޕްރޮގްރާމާ ޙަވާލުވެވަޑައިގެން ހުންނެވި ޑެޕިއުޓީ މިނިސްޓަރ އަޙްމަދު ޢާޠިފެވެ.

ސްކައުޓް އެސޯސިއޭޝަންގެ ފަރާތުން ސޮއިކުރެއްވީ އެ އެސޯސިއޭޝަންގެ ނައިބު ރައީސް އަޙްމަދު ޙަނީފެވެ.

މި ބެޖު ތަޢާރަފުކުރުމުގެ މައިގަނޑު މަގްސަދަކީ ރާއްޖޭގައި ފުޅާ ދާއިރާއެއްގައި ގަސް އިންދުމުގެ ހަރަކާތްތައް ހިންގުމާއި، މި ޤައުމީ މުހިންމު މަޝްރޫއަށް ކުޑަކުދިންނާއި ޒުވާނުން އަހުލުވެރިކޮށް، ތިމާވެށި ރައްކާތެރިކުރުމުގެ ރޫޙު އެކުދިންގެ ކިބައިގައި އަށަގެންނެވުމެވެ.

މި ބެޖު ޙާޞިލުކުރުމަށްޓަކައި ފުރިހަމަކުރަންޖެހޭ މިންގަނޑުތައް ބަޔާންކުރާ ގައިޑްލައިނެއް މިހާރު ވަނީ އެކުލަވާލާފައެވެ.

މި ޙަރަކާތުގެ ދަށުން އިންދުމަށް ބޭނުންވާ ގަސްތައް ސްކައުޓުންނަށް ފޯރުކޮށްދިނުމަށް ހަމަޖެހިފައިވަނީ އެންވަޔަރަމަންޓް މިނިސްޓްރީންނެވެ.

މި ޕްރޮގްރާމުގެ ދަށުން ސްކައުޓުން އިންދާ ގަސްތައް ރަނގަޅަށް ހެދި، ބޮޑުވަންދެން އެ ތަކެތި ބަލަހައްޓައި މޮނިޓަރކުރުމަކީ އެ ކުދިންގެ ޒިންމާއެކެވެ.

މީގެއިތުރުން، މި ބެޖާ ގުޅުވައިގެން ސްކައުޓް އެސޯސިއޭޝަނާ ގުޅިގެން ގިނަ ޙަރަކާތްތަކެއް ރާވާ ހިންގުމުގެ މަސައްކަތް މިހާރުވެސް ދަނީ ކުރެވެމުންނެވެ.

ސަރުކާރުން އިސްނަންގަވައިގެން ކުރިއަށްގެންދަވާ 5 މިލިއަން ގަސް އިންދުމުގެ މަޝްރޫޢުގެ ދަށުން، މިހާތަނަށް 2.3 މިލިއަން ގަސް ވަނީ އިންދާފައެވެ.

މި ޕްރޮގްރާމް ދެމެހެއްޓެނިވި ގޮތެއްގައި ކުރިއަށް ގެންދިއުމުގެ މަޤްޞަދުގައި، ރާއްޖޭގެ 20 ރަށެއްގައި ގަސް ހައްދާ ނާސަރީތައް ޤާއިމުކުރުމުގެ ޢަމަލީ މަސައްކަތްތައް ވެސް މިހާރު ދަނީ ކުުރިއަށެވެ.