އިންޑިއާއިން ރާއްޖެއަށް 90 ހާހަށްވުރެ ގިނަ ފަތުރުވެރިން ޒިޔާރަތްކޮށްފި

އިންޑިއާއިން ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ އަދަދު 90،000 އަށްވުރެ މައްޗަށް އަރައިފިއެވެ.

ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކަށް ބަލާއިރު، އިއްޔެގެ ނިޔަލަށް އެ ޤައުމުން ރާއްޖެއަށް 90،392 (ނުވަދިހަ ހާސް ތިންސަތޭކަ ނުވަދިހަ ދޭއް) ފަތުރުވެރިން އައިސްފައިވެއެވެ.

އިންޑިއާ މިހާރު ހިމެނިފައިވަނީ ރާއްޖެއަށް ހަވަނައަށް އެންމެ ގިނައިން ފަތުރުވެރިން އަންނަ މާކެޓުގެ ގޮތުގައެވެ.

ލިސްޓުގެ އެއްވަނައިގައި 298،891 ފަތުރުވެރިންނާއެކު ޗައިނާ އޮތްއިރު، ދެވަނައިގައި އޮތީ 228،681 ފަތުރުވެރިން ޒިޔާރަތްކޮށްފައިވާ ރަޝިއާއެވެ.

މި އަހަރުގެ މިހާތަނަށް ރާއްޖެއަށް ޖުމްލަ 1،595،923 (އެއް މިލިއަން ފަސްލައްކަ ނުވަދިހަފަސް ހާސް ނުވަސަތޭކަ ތޭވީސް) ފަތުރުވެރިން ޒިޔާރަތްކޮށްފައިވެއެވެ.

މިއީ ވޭތުވެދިޔަ އަހަރުގެ މި މުއްދަތުގައި ރާއްޖެއަށް އައި 1،651،937 ފަތުރުވެރިންނާ އަޅާބަލާއިރު 3.4 އިންސައްތައިގެ ދަށްވުމެކެވެ.

ފަތުރުވެރިން ޗުއްޓީ ހޭދަކޮށްފައިވާ ތަންތަނުގެ ތަފްސީލަށް ބަލާއިރު، 1،154،458 ފަތުރުވެރިން ރިސޯޓުތަކުގައި މަޑުކޮށްފައިވާއިރު، ގެސްޓްހައުސްތަކުގައި 344،215 އަދި ހޮޓާތަކުގައި 35،998 އަށްވުރެ ގިނަ ފަތުރުވެރިން ވަނީ ޗުއްޓީ ހޭދަކޮށްފައެވެ.

ރާއްޖޭގެ ފަތުރުވެރިކަމުގެ ހިދުމަތްތަކަށް ބަލާއިރު، ރިސޯޓުތަކާއި، ގެސްޓްހައުސް އަދި ހޮޓާތައް ހިމެނޭހެން މިވަގުތު ޖުމްލަ 1،280 ތަނެއް ދަނީ ހިންގަމުންނެވެ.