ލޭ ހޯދުމުގެ ދަތިކަމަށް ޙައްލެއް ހޯދުމަށް މޮބައިލް ޚިދުމަތެއް ތަޢާރަފުކުރަނީ

ލޭ ހޯދުމުގައި ކުރިމަތިވާ ދަތިތަކަށް ލުޔެއް ހޯދައިދިނުމުގެ ގޮތުން، ލޭ ހަދިޔާކުރާ ފަރާތްތައް ތިބި ތަނަކަށް ގޮސް ލޭ ނެގޭނެ މޮބައިލް ހިދުމަތެއް ވަރަށް އަވަހަށް ފެށުމަށް ތައްޔާރުވަމުންދާ ކަމަށް ސިއްހަތާއި ބެހޭ ވަޒީރު ގީލާ އަލީ ވިދާޅުވެއްޖެއެވެ.

ވަޒީރު ފާހަގަކުރެއްވި ގޮތުގައި ލޭ ހަދިޔާކުރާނެ ފަރާތްތައް ހޯދުމަކީ މިހާރުވެސް ބޮޑު ގޮންޖެހުމެކެވެ.

ލޭ ދޭން ބޭނުންވާ މީހުން ލިބުނު ކަމުގައި ވިޔަސް، ސިއްހީ މިންގަނޑުތަކާއި ޝަރުތުތައް ފުރިހަމަ ނުވުމުގެ ސަބަބުން ބައެއް ފަރާތްތަކަށް ލޭ ނުދެވޭ ހާލަތްތައް މެދުވެރިވާކަން އެކަމަނާ ވިދާޅުވިއެވެ.

މީގެއިތުރުން، ވަގުތު ނެތުމުގެ ސަބަބުން ލޭ ހަދިޔާކުރާ މަރުކަޒުތަކަށް ޒިޔާރަތްކުރުމަކީ ގިނަ ބަޔަކަށް ދަތިކަމަކަށް ވާތީ، މި ހިދުމަތަކީ އެފަދަ ފަރާތްތަކަށް ލުއިފަސޭހަކަން ފޯރުކޮށްދިނުމުގެ މަގްސަދުގައި ފަށާ ހިދުމަތެކެވެ.

މި އިންތިޒާމުގެ ދަށުން، ލޭ ހަދިޔާކުރާ ފަރާތް ހުރި ތަނަކުން ލޭ ނެގުމަށްފަހު، ރައްކާތެރިކަމާއެކު ކަމާބެހޭ މަރުކަޒުތަކަށް ގެންގޮސް ރައްކާކުރެވިގެންދާނެއެވެ.

މިއީ ލޭ ހަދިޔާކުރުމުގެ ނިޒާމު އިތުރަށް ހަރުދަނާވެގެންދާނެ ކަމެކެވެ.

ލޭ ލިބުމުގައި ދިމާވާ ދަތިތަކަށް ޙައްލު ހޯދުމުގެ ގޮތުން، އަތޮޅުތަކުގައި ލޭ ރައްކާކުރާނެ 4 ބްލަޑް ބޭންކް މިހާރު ވަނީ ގާއިމުކޮށްފައެވެ.

ވަޒީރު އިތުރަށް ފާހަގަކުރެއްވި ގޮތުގައި މި މައްސަލައަށް ދާއިމީ ހައްލެއް ގެނެވޭނީ ލޭ ހަދިޔާކުރާ ފަރާތްތަކުގެ އަދަދު އިތުރުކުރެވިގެންނެވެ.