
އެސްޓީއޯގެ "ބެކް ޓު ސްކޫލް"/ ފޮޓޯ: އެސްޓީއޯ
އެސްޓީއޯގެ "ބެކް ޓު ސްކޫލް ޕްރޮމޯޝަން" ފަށައިފި

އައިޝަތު އިބްރާހިމް - 09 އޯގަސްޓު 2025 - 04:28
އެސްޓީއޯގެ "ބެކް ޓު ސްކޫލް ޕްރޮމޯޝަން" ފަށައިފިއެވެ.
މިކަން ހާމަކޮށް ސަރުކާރުގެ މައި ވިޔަފާރިކުންފުނި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ބުނީ، އެސްޓީއޯ ޕީޕަލްސް ޗޮއިސްގައި ކުރިއަށްދާ މި ޕްރޮމޯޝަންގެ ދަށުން ސްކޫލް ކުދިންގެ އިންޓަވަލަށް ބޭނުން ކުރެވޭނެ ގިނަ ޕްރޮޑަކްޓްތަކެއް ވަރަށް ހެޔޮ އަގެއްގައި ލިބެން ހުންނާނެ ކަމަށެވެ.
އާންމުންނާއި ކުޑަކުދިންގެ ތެރޭގައި މަޝްހޫރު ޑެވޮންޑޭލް ކިރު ޕެކެޓް އަދި ކްރޫގާރ ބްރޭންޑްގެ ހުރިހާ އުފެއްދުމެއްވެސް ލިބެން ހުންނާނެ ކަމަށް އެސްޓީއޯ އިން މީޑިއާތަކާއި ހިއްސާކުރި މެސެޖްގައިވެއެވެ.
އެސްޓީއޯގެ "ބެކް ޓު ސްކޫލް"/ ފޮޓޯ: އެސްޓީއޯ
ޑެވޮންޑޭލް އަކީ އޭގައި ގިނަ އަދަދަކަށް ޕްރޮޓީން އެކުލެވޭ ހަށިގަނޑަށް ފައިދާ ހުރި ބްރޭންޑެއްކަމުގައިވެސް އެސްޓީއޯގެ މެސެޖްގައިވެއެވެ.
މީގެއިތުރުން، ކުއިކްބެރީ އަދި ނަބާޓި ބްރޭންޑްގެ އެކި ރަހަތަކުގެ ކުޑަކުދިން ގަޔާވާ ބިސްކޯދުވެސް ލިބެން ހުންނާނެ އެވެ. ކުއިކްބެރީ ބްރޭންޑްގެ "ޝުގާ ފްރީ" ބިސްކޯދަކީ ކުޑަކުދިންގެ އިތުރުން ބޮޑެތި މީހުންނަށްވެސް ކަމުދާނެ ގޮތަށް ތައްޔާރުކޮށްފައިވާ އުފެއްދުމެކެވެ.
އެސްޓީއޯ އިން ބުނި ގޮތުގައި މި ޕްރޮމޯޝަންގެ ދަށުން މި ބްރޭންޑްތަކުން 100 ރުފިޔާއަށް ވުރެ ގިނައިން ވިޔަފާރި ކުރައްވާ ކޮންމެ ފަރާތަކަށް ކޫޕަނެއް ލިބޭނެ އެވެ. ކޫޕަންގެ ގުރުއަތު ނެގުން އޮންނާނީ ޕްރޮމޯޝަން ނިމުމަށްފަހު އެވެ.
ޕްރޮމޯޝަންގައި ގުރުއަތުން ހޮވޭ ތިން ފަރާތަކަށް "ޕީކަބޫ" ފިހާރައިގެ އަގުހުރި ތިން ގިފްޓް ވައުޗާ ލިބޭނެކަމުގައިވެސް ބުނެފައިވެއެވެ.
1 ވަނަ އަށް ހޮވޭ ފަރާތަކަށް 5،000ރ، 2 ވަނައަށް ހޮވޭ ފަރާތަކަށް 2،500ރ އަދި 3 ވަނައަށް ހޮވޭ ނަސީބުވެރި ފަރާތަކަށް 1،500ރ ގެ ވައުޗަރެއް ލިބޭނެ ކަމަށް އެސްޓީއޯ އިން ބުނެފައިވެއެވެ.
މީގެ އިތުރުން މި ޕްރޮމޯޝަންގެ ދަށުން އިންޓަވަލް ފުޅި ފަދަ ސްކޫލް ކުދިންނަށް ބޭނުންވާ މުހިންމު ގިނަ ސާމާނުން ބޮޑު ޑިސްކައުންޓްތަކެއްވެސް ލިބިގެންދާނެއެވެ. ހަމަ އެއާއިއެކު 2 ޕްރޮޑަކްޓެއް ގަތުމުން ހިލޭ އެކަތި ލިބުމުގެ ފުރުސަތުވެސް މި ޕްރޮމޯޝަންގެ ދަށުން ކަސްޓަމަރުންނަށް ލިބޭނެ ކަމަށް އެސްޓީއޯ އިން ވަނީ ބުނެފައެވެ.
މި މަހުގެ 7 ވަނަ ދުވަހު ފެށި މި ޕްރޮމޯޝަން ކުރިއަށްދާނީ ސެޕްޓެމްބަރު މަހުގެ 7 ވަނަ ދުވަހުގެ ނިޔަލަށް ކަމަށްވެސް އެސްޓީއޯއިން ވަނީ ބުނެފައެވެ.