އިސްރަށްވެހިންގެ ދުޅަހެޔޮކަން އިތުރުކުރުމަށް މަޝްވަރާ ބައްދަލުވުމެއް

މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމަންޓާއި މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ގުޅިގެން އިސްރަށްވެހިންގެ ދުޅަހެޔޮކަން އިތުރުކުރުމަށް ކުރެވިދާނެ ކަންކަމާ ގުޅޭގޮތުން މުހިންމު މަޝްވަރާތަކެއް ކޮށްފިއެވެ.

އެކަމަށްޓަކައި، މިއަދު ސްޕޯޓްސް މިނިސްޓްރީގައި ބޭއްވި ބައްދަލުވުމުގައި މިނިސްޓަރ ޑރ އައިޝަތު ޝިހާމް އަދި މިނިސްޓަރ އަބްދުﷲ ރާފިއު ވަނީ ބައިވެރިވެވަޑައިގެންފައެވެ.

މި ބައްދަލުވުމުގައި މަޝްވަރާކުރެވުނު މުހިންމު ބައެއް ކަންކަމުގެ ތެރޭގައި، އިސްރަށްވެހިންގެ ޖިސްމާނީ، ނަފްސާނީ އަދި އިޖްތިމާއީ ދުޅަހެޔޮކަން ކަށަވަރުކުރުމަށް ތަފާތު ޕްރޮގްރާމުތައް ހިންގުން، ކަސްރަތާއި އިޖްތިމާއީ ހަރަކާތްތަކުގެ ތެރެއިން މުޖުތަމައުގެ ގުޅުންތައް ބަދަހިކުރުން، ރަށްރަށުގައި ގާއިމްކުރެވިފައިވާ ވަސީލަތްތައް އެންމެންނަށް ފަސޭހައިން ބޭނުންކުރެވޭނެ އިންތިޒާމުތައް ހަމަޖެއްސުން ހިމެނެއެވެ.

މި ބައްދަލުވުމަކީ ދެ މިނިސްޓްރީއިން އެއް އަމާޒަކަށް މަސައްކަތްކުރާއިރު، ގުޅިގެން މަސައްކަތްކުރުމުގެ މުހިންމުކަން ކަށަވަރުކޮށްދީ، ދެ މިނިސްޓަރުންގެ މެދުގައި ބިނާކުރަނިވި ހިޔާލުތަކެއް ބަދަލުކުރެވުނު ބައްދަލުވުމެކެވެ.