ނަފްސާނީ ބަލީގެ ބޭސް ލިބުމުގައި އެއްވެސް ދަތިކަމެއް ނެތް: ގީލާ

ނަފްސާނީ ބަލިތަކުގެ ފަރުވާއަށް ބޭނުންކުރާ ބޭސް ލިބުމުގައި އެއްވެސް ދަތިކަމެއް ނެތްކަމަށް ޞިއްޙަތާއި އާއިލާ އާއި އިޖުތިމާޢީ އެހީއާބެހޭ ވަޒީރު ޤީލާ އަލީ ވިދާޅުވެއްޖެއެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ، މިނިސްޓަރު ވިދާޅުވީ، ނަފްސާނީ ބަލިތަކަށް ޚާއްޞަ ބޭސްތަކަކީ ވަކި އުސޫލުތަކަކާއި ކޯޓާތަކެއްގެ ދަށުން ރާއްޖެއަށް އެތެރެކުރެވޭ ބޭސްތަކެއް ކަމަށެވެ. އަދި މި ބޭސްތައް ލިބުމުގައި ދަތިތަކެއް ހުރި ކަމަށް ދެންނެވެން ނެތް ކަމަށްވެސް އެކަމަނާ ވިދާޅުވިއެވެ.

ނަމަވެސް ރިހެބިލިޓޭޝަނަށް ބޭނުންވާ ބޭހާއި ބައެއް ޚާއްސަ އިންޖެކްޝަންތައް ނުލިބޭ މައްސަލަ މާވަށު ދާއިރާގެ މެންބަރު އަހްމަދު ޝާކިރާއި ކެންދޫ ދާއިރާގެ މެންބަރު މައުރޫފް ޒާކިރު ވަނީ މަޖިލީހުގެ ސަމާލުކަމަށް ގެންނަވާފައެވެ. މީގެ އިތުރުން، ބޭސް ނުލިބޭތީ ސޯޝަލް މީޑިއާގައިވެސް ގިނަ ބަޔަކު ޝަކުވާކުރަމުންދެއެވެ.

މީގެ ކުރިން ބޭސް ލިބުމުގެ ދަތިކަން ހައްލުކުރުމަށްޓަކައި، ފާމަސީތަކުގައި ހުރި ބޭސްތައް ބަލައިގެން ބޭސް ސިޓީ ލިޔެދިނުމަށް ޑޮކްޓަރުންނަށް މިނިސްޓަރު އިރުޝާދު ދެއްވުމާ ގުޅިގެންވެސް އާންމުންގެ ގިނަ ފާޑުކިޔުންތަކެއް އެކަމަނާއަށް ވަނީ އަމާޒުވެފައެވެ.