ޒިކީ: މީހަކު ކިޔާ އެއްޗަކަށް ބެލުމެއް ނެތި "މިދަނީ ކުރިއަށް"

އޭނާގެ އުމުރުން އަދިވީ އެންމެ 18 އަހަރެވެ. އެކަމަކު އޭނާ އަދާކުރަމުންދަނީ އާދައިގެ ވަޒީފާއެއް ނޫނެވެ. މަަސައްކަތްކުރަނީ ރާއްޖޭގައި ގިނަ ރިސޯޓުތަކެއް ހިންގާ ހައިބަތު ބޮޑު ކުންފުންޏެއްގެ އެންމެ ޒިންމާ ބޮޑު ޑިޕާޓްމަންޓް ކަމަށްވާ ހިއުމަން ރިސޯސް ޑިޕާޓްމަންޓްގައެވެ. ވެރިރަށް މާލެއަށް އުފަން އައިޝަތު ޒިވާގެ ތައާރަފެއް މިގޮތަށް ދީގެން ފަހަރުގައި ނޭނގިދާނެއެވެ.

އެކަމަކު، ޓިކްޓޮކްގައި ވިދަމުން އަންނަ ތަރި "ޒިކީ" އޭ ބުނުމުން ނޭނގުމަކީ ވުމަށްވުރެ ނުވުން ގާތް ކަމެކެވެ. އޭނާގެ އެޕޯލޯ ކޭކްގެ ވީޑިއޯއަކުން ކާއެއްޗެހީގެ ދުނިޔޭގައި ތިބި ދިވެހީންގެ މުޅީން ކުޅުދިޔާކޮށްލިއެވެ. ޓިކްޓޮކްގެ ސްޕޮޓްލައިޓަށް "ޒިކީ" އަސްލުގައި އެރި ހިސާބަކީ އެެއީއެވެ. ބޮޑު ސަމާލުކަމެއް ލިބުނު އެޕޯލޯ ކޭކް ވީޑިއޯއަށްފަހު އެތައް ބަޔަކު އޭނާގެ އެޕޯލޯ ކޭކް ރެސިޕީއަށް އެދިއެދި މެސެޖުކުރަން ފެށިއެވެ. ޖަވާބުދޭންޖެހުނު މެސެޖުތައް ގިނަވެ އޭނާއަށް އިތުރު މެސެޖެއް ނުފޮނުވޭ ގޮތަށް ޓިކްޓޮކްއިން އެ ފީޗަރ ބްލޮކްކުރާ ހިސާބަށް ވެސް ދިޔައީއެވެ. އެންމެ ފަހުން މަޖުބޫރުވީ ރެސިޕީ ވީޑިއޯއެއް ހިއްސާކުރާށެވެ.

ޒިދާންއާއެކު ކޯވަރެއް ޕްރޮގުރާމްގައި "ޒިކީ" --- ފޮޓޯ: ހުޝާމް / އަސްލު ޓީވީ

ސާފު ރީތި ބަސްމޮށުންތެރިކަމާއި ދިވެހިބަހުން ރީތިކޮށް ސާދާކޮށް ވާހަކަ ދެއްކުމަކީ "ޒިކީ" ގެ ވީޑިއޯތައް ބަލާ ގިނަ މީހުންނަށް އެންމެ އަޅައިގެން އަދި ގަޔާވި ސިފައެވެ. އޮފީހުގައި ބިޒީކޮށް އުޅުމަށްފަހު، އޭނާގެ އާއިލާއާއި ރަހުމަތްތެރިންނަށް ވަގުތު ހުސްކޮށް، ހުސް ވަގުތުގައި "ޒިކީ" މިހާރު ކުރާ ކަމަކީ ޓިކްޓޮކް ވީޑިއޯތައް ތައްޔާރުކުރުމެވެ. ވިޔަފާރި އިސްތިހާރުތައް ވެސް އޭނާ މިހާރު ހަދައިދެއެވެ.

ޓިކްޓޮކްގައި 16،000 އަށްވުރެ ގިނަ މީހުން ފޮލޯކުރާ "ޒިކީ" ގެ ތަފާތު އަނެއް ކަމަކީ ފައްސި ވިސްނުމާއި އަދަބުވެރިކަމެވެ. މީހުންގެ ފާޑުކިޔުންތައްވެސް އޭނާ ނަގަނީ ފައްސިކޮށެވެ. ރިވެތި އަޚްލާޤް ހިފެހެއްޓުމަށް އޭނާ ވަރަށް އިސްކަންދެއެވެ. މިވާހަކަތައް ވަރަށް ތަފްސީލްކޮށް "ޒިކީ" ވަނީ އަސްލު ޓީވީއާ ހިއްސާކޮށްފައެވެ.

މިރަމަޟާންމަހު އަސްލު ޓީވީން ގެނެސްދޭން ފެށި "ޒިދާންއާއެކު ކޯވަރެެއް" ޓީވީ ޕްރޮގުރާމްގެ ދެވަނަ ސީޒަންގެ ފުރަތަމަ އެޕިސޯޑްގައި ގެސްޓެއްގެ ގޮތުން ބައިވެރިވެ "ޒިކީ" ގެ ވާހަކަ ބެލުންތެރިންނަށް ކިޔައިދިނީ ހަމަ އެ ފައްސި ކަމާއެކުއެވެ. އޭނާގެ ޒުވާން ޖޯޝުގައި "ޒިކީ ވައިބް" ގައެވެ.

ތިރީގައި މި ހިއްސާކުރަނީ "ޒިކީ" އާއެކު ކުރިއަށް ގެންދިޔަ "ޒިދާންއާއެކު ކޯވަރެެއް"ގެ މިހިނގާ ސީޒަންގެ ފުރަތަމަ ޝޯއެވެ.

#Koavareh | #Koavareh | By Aslu TV