ގެވެހި މަސައްކަތަކީ ވަކި ޖިންސަކަށް އޮތް ކަމެއް ނޫން!

ގޭތެރޭގެ މަސައްކަތަކީ އަދި ވަކިން ހާއްސަކޮށް ބަދިގޭގެ މަސައްކަތަކީ ވަކި ޖިންސަކަށް ހާއްސަ މަސައްކަތްތަކެއް ހެއްޔެވެ؟ ސޯޝަލްމީޑިއާގައި މިހާރު އެންމެ ހޫނުކޮށް ހިނގަމުން ދަނީ މިބަހުސްއެވެ. ބަހުސް ފެށުނު ހިސާބަކީ، ފިރިހެނުން ނުވަތަ ފިރިމީހާ ލައްވައި ކައްކައި ކާން ތައްޔާރުކުރުން ފަދަ ކަންކަން ކުރުވާ ނަމަ އެއީ ފިރިހެނުންގެ ފިރިހެންވަންތަކަން ގެއްލޭ ކަމެއްކަމަށް ދޭހަވާ މޭރުމަކުން އުސްތާޛަކު ކުރި ޕޯސްޓެކެވެ. އޭނާގެ ޕޯސްޓުން މޭރުންކޮށްދޭން މަސައްކަތްކޮށްފައި ވަނީ ހަމަހަމަ ކުރުމުގެ ނަމުގައި، ފިރިމީހާއަށް ގޭގެ ބަދިގެ މަޖުބޫރެއް ނުކުރެވޭނެ ކަމަށެވެ. އަމިއްލަ އަމިއްލައަށް ޝަރީޢަތެއް ހެދިޔަސް، އެއީ ބާޠިލު ފިކުރުތައް ކަމަށެވެ.

މިމަޢުޟޫއުގައި އެއްބަޔަކު އޭނާގެ ދިފާޢުގައި އޭނާއާ އެއްކޮޅަށް ވާހަކަދައްކަމުންދާއިރު ފާހަގަކުރެވުނު ކަމަކީ ގިނަ ބަޔަކު ތިބީ ނުހަނު ކަންބޮޑުވެފައި ކަމެވެ. ގިނަ ޕޯސްޓުތަކުން ފެނުނީ ނުރުހުމާއި ދެކޮޅުވެރިކަމެވެ. އެ މީހުން ބުނަމުންދަނީ ގޭތެރޭގެ މަސައްކަތްތައް، ވަކީން ހާއްސަކޮށް ބަދިގޭގެ މަސައްކަތް ކުރުމަކީ ފިރިހެނުންގެ ފިރިހެންވަންތަކަށް ގެއްލޭ ކަމެއް ނޫން ކަމަށެވެ. އެ ފަދަ ކަންކަމުގައި އަނބިންނަށް އެހީތެރިވެދީ އަތްގައިކޮށްދިނުމަކީ ކުރެވިދާނެ ހެޔޮ ކަމެއް ކަމުގައެވެ.

އެ މީހުން ބުނަމުންދަނީ އަމިއްލައަށް ކެއި ތަށި ދޮންނަން ފިރިހެން ދަރިފުޅު އާދަކުރުވާށެވެ. އެއީ މަންމަގެ ޒިންމާ ކަމަށް ދައްކައިފި ނަމަ ޒަވާޖަކުން ގުޅޭ ހިނދު އެ ޒިންމާ މަތިކުރާނީ އޭނާގެ އަނބިމީހާއާއެވެ. އެންމެ އާދައިގެ ކެއުންތައް ތައްޔާރުކުރަން ފިރިހެން ދަރިފުޅަށް ދަސްކުރުމުގެ ފުރުސަތު ދޭށެވެ. އެކަނި އުޅެވޭވަރުގެ ފިރިހެންވަންތަ ދަރިއަކަށް ވާނެއެވެ. ގެވެހި މަސައްކަތަކީ ވަކި ޖިންސަކަށް ހާއްސަވާ މަސައްކަތްތަކެއް ނޫންކަން ދަރިންނަށް ބުނެދީ އެގޮތަށް ހާނުވާށެވެ. އެކުދިންގެ ދިރިއުޅުމުގެ ޢަމަލީ މައިދާނުގައި ގެވެހި ހަރުދަނާ ބަޔަކަށް ވާނެކަން ގައިމެވެ.

ދެން މިއޮތީ އަންހެނެއްގެ ބަހެވެ. އޭނާގެ ނަޒަރުގައި މިއީ އެއްވެސް ހާލެއްގައި އަންހެކާއި ފިރިހެނަކު ހަމަހަމަ ވުމަށް ކުރާ ބަހުސެއްނޫނެވެ. އަދި ފިރިމީހާއަށް ބަދިގެ ހަވާލުކުރުމަށް ފަހު އަނބިމީހާ މަސްއޮނޑިއަކުން މަހަށް ދިޔުމަންމަކުން މައްސަލައެއްނެތޭ ބުނެ ކުރާ ބަހުސެއް ވެސް ނޫނެވެ. އޮޅިގެން ނޫޅެމެވެ. ފިރިމިހާ ދަށުކުރުމާ ފިރިމީހާގެ ފަރާތުން ހޮޔޮކޮން ހިތުމަށް އެދުމަކީ ދެކަމެކެވެ. އަދި އޮޅުވާލަން ނޫޅޭށެވެ. އަނބިންގެ ކިބައިން ކިޔަމަންތެރިކަމަށް އެދުމާ އަނބިން އަޅުވެތިކުރުވުމާ އެއީ ވެސް ދެކަމެކެވެ. އަހަރެންނަކީވެސް އަންހެނެކެވެ. ފިރިހެންނަކާ ހަމަހަމަވާކަށް ނޫޅެމެވެ. ސަބަބަކީ އަހަރެންގެ ދީނުގައި އެ ހަމަހަމަކަން ލިބިގެންނުވާކަން އަންގަވާފައިވާތީއެވެ.

ގޭތެރެ ބެލެހެއްޓުމުގެ އެންމެހާ ޒިންމާއެއް އެންމެ ފުރިހަމައަށް އަދާކުރަމުއެވެ. ގޭގެ މަސައްކަތުގައި އެއްވެސް ކަމެއްގައި ފިރިމީހާ މަސްޣޫލުވެ އުޅުމަކަށް ދުވަހަކުވެސް އަމުރެއްނުކުރަމެވެ. އެހެންނަމަވެސް ފިރިހެނަކު ކޭތަށި އަމިއްލަޔަށް ދޮވެ، ގޭގައި ލުއި ފަސޭހަ ކޮށްދިނުމަކީ ފިރިހެންވަންތަކަމަށްވާ ހުތުރެއްކަމުގައި ނުދެކެމެވެ. އެއީ ލިބޭ ހިތްހަމަޖެހުމެކެވެ. އަހަރެމެންގެ މާތް ނަބިއްޔާ ދެއްކެވި ނަމޫނާއެވެ. ދުނިޔެ ދުށް އެންމެ ފިރިހެންވަންތަ ޝަހްސިއްޔަތަކީ އެއީއެވެ. އަނބިންނަށް ހެޔޮވުމުގެ ގޮތުން އެވަރު ކޮށްލުމަށް އެނަމޫނާ ހުއްޖަތަކަށް ފުދެއެވެ.

ދެން އޮތީ ދަރިންގެ މައްސަލައެވެ. ފިރިމީހާއަކީ ފައިސާ ހޯދަން އެކަނި ހުންނަ މީހެއްކަމަށް ބުނާބުނުމާ ދެކޮޅުހަދަމެވެ. އަދި އަނބިމީހާއާއި އެއްގޮތަށް ބަދިގެ ބަލަހައްޓަން ޖެހޭ މީހެއް ކަމުގައި ވެސް ނުދެކެމެވެ. އެއީ ދިރިއުޅުމުގައި ފިރިހެނެއްގެ ޒިންމާއި މަސްއޫލިއްޔަތު ގިނައެވެ. އާއެކެވެ. އަންހެނެއްގެ ދައުރާ ތަފާތެވެ. މާ ވަރުގަދައެވެ. ދަރިން ތަރުބިއްޔަތުކުރުމުގަ ވެސް އިސްލާމްދީން އަންގާގޮތުންނަމަ ފިރިހެނާ އަދި އަންހެނާގެ ވެސް ދައުރު އެހާމެ ބޮޑުކަން ދީނުން ޒައްރެއް ވެސް އުނގެނިފައިވާ މީހަކަށް އެނގޭނެވެ.

ބަހުސަކަށް ވެގެން މިއުޅެނި މިކަންކަން ބަޔަކަށް އޮޅުންބޮޅުންވާހެން ފޭސްބުކްގައި ޖެހި ޕޯސްޓެއްގެ މައްސަލައެވެ. މައްސަލައަކީ މިދީނާ ގުޅުވާ އަންހެނުން ނިކަމެތި ކުރާ ދީނެއްކަމަށް ބުނާ މީހުންނަށް ބާރުލިބޭ ބީދައަކުން ބުނި ބުނުމެވެ. މައްސަލައަކީ އަނބިމީހާ އަށް ގޭތެރޭގައި އެހީތެރިވުމާއި ދަރިންބެލުމާއި އެއީ ފިރިހެނަކު ކުރަން ހުތުރު ދަރަޖައިގެ ކަމެއްކަމުގައި ސިފަކޮށްދީ މީދީން އަންހެނުނަށް ދޭޤަދަަރާއި މެދު ސުވާލު އުފެއްދޭނެ ހަމައަކުން ވާހަކަދެއްކުމެވެ.

ދަންނަވަންތޯއެވެ؟ ގެވެހި މަސައްކަތަކީ ވަކި ޖިންސަކަށް އޮތް ކަމެއް ނޫނެވެ. ބަހާލައިގެން ތަރުތީބުން އެކަކު އަނަކަކާ ގުޅިގެން، އެއްބާރުލައިގެން ކުރީމާ ލުއިވެފައި ފަސޭހަވުން ނޫން ކަމެއް ނޯންނާނެއެވެ.