އާ އައިޑީކާޑު ފަރުމާކޮށްގެން އެއް ވަނަ ފަރާތަކަށް އެންކްރިއާ!

މިހާރު ބޭނުން ކުރަމުން އަންނަ އައިޑީކާޑަށް ބަދަލު ގެނައުމަށްޓަކައި އައު އައިޑީ ކާޑެއްގެ ނަމޫނާ ފަރުމާކުރުމަށް ހުޅުވާލި ފުރުސަތުގައި ކާޑު ފަރުމާކޮށްގެން އެއްވަނަ ފަރާތެއްގެ ގޮތުގައި އެންކްރިއާ ހޮވިއްޖެއެވެ.

ޑީއެންއާރް އިން 2022 ވަނަ އަހަރު ޖޫން މަހުގެ 27 ވަނަ ދުވަހު ކުރި އިއުލާނުގައި ވަނީ މިހާރު ބޭނުންކުރާ ދިވެހި ރައްޔިތެއްކަން އަންގައިދޭ ކާޑުގެ ޑިޒައިން ބަދަލުކޮށް ސަލާމަތީގޮތުން ފުރިހަމަ އިތުބާރާ ޔަގީންކަން އޮންނަ ޒަމާނީ ސެކިއުރިޓީ ފީޗާރސްތަކާއިއެކު ސްމާޓް އައިޑީ ކާޑެއް ތައާރަފުކުރުމަށް ނިންމާފައިވާކަން ހާމަކޮށްފައެވެ.

އެހެންކަމުން މިކާޑު ފަރުމާކުރުމަށް އެދޭ ފަރާތްތަކުން އެކަމަށް އެދި ހުށަހަޅާ ޕްރޮޕޯސަލް އެ ޑިޕަރޓްމަންޓަސް ހުށަހެޅުމަށް ވަނީ ހުޅުވާލައިފައެވެ.

އައިޑީކާޑު ފަރުމާ ކުރާނެ ފަރާތެއް ހޮވާނީ އެފަރާތުގެ ފަންނީ ގާބިލުކަމާއި ހުށަހަޅާ ކޮންސެޕްޓްގެ ފުރިހަމަކަމަށް ބެލުމަށްފަހު ގައި ކަމަށްވެސް ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އިން ކުރި އިއުލާނު ގައި ބުނެފައިވެއެވެ.

200،000 ރުފިޔާގެ އިނާމަކާއެކު އައިޑީކާޑު ފަރުމާކުރާނެ ފަރާތެއް ހޮވުމަށް ހުޅުވާލި ފުރުސަތުން މިހާރު ޑީއެންއާރް އިން ވަނީ އައިޑކާޑު ފަރުމާ ކުރާނެ ފަރާތެއް ހޯވައިފައެވެ.

ޑީއެންއާރް އިން ފޭސްބުކްގައި ކުރި ޕޯސްޓޭއްގައި ބުނެފައި ވަނީ އައިޑީކާޑު ފަރުމާ ކުރުމަށް ކުރި އިއުލާނާ ގުޅިގެން އެއް ވަނައަށް ހޮވުނު ފަރާތް ކަމުގައިވާ "އެންކްރިއާ ޕްރައިވެޓް ލިމިޓެޑް" އާއެކު އެއްބަސްވުމުގައި ސޮއި ކޮށްފައިވާ ކަމަށެވެ.