ޖޭއެސްސީން ބޭނުންވެއްޖެ ނަމަ އިސްފަނޑިޔާރުން ވަކިކުރެވޭ ގޮތް ހަދައިފި

ޖުޑީޝަލް ސާވިސް ކޮމިޝަން (ޖޭއެސްސީ) އަށް ފެނިއްޖެ ހާލަތެއްގައި ކޯޓުތަކުގެ އިސް ފަނޑިޔާރުން މަގާމުން ވަކިކުރެވޭ ގޮތަށް އާ ގަވާއިދެއް އެކުލަވާލައި އަމަލުކުރަން ފަށައިފިއެވެ.

މިއަދު ގެޒެޓްކުރި ކޯޓުތަކަށް އިސް ފަނޑިޔާރުން އައްޔަންކުރުމާއި ދުރުކުރުމުގައި އަމަލުކުރާނެ ގޮތުގެ ގަވާއިދު ގައިވާ ގޮތުން، ކޯޓުތަކުގެ ހިންގުން އިތުރަށް ހަރުދަނާކުރުމަށްޓަކައި އިސް ފަނޑިޔާރަކު މަގާމުން ވަކިކުރަން ޖެހޭ ކަމަށް ކޮމިޝަނަށް ގަބޫލުކުރެވޭ ނަމަ، އެ ބާރު ޖޭއެސްސީއަށް މިހާރު ވަނީ ލިބިދީފައެވެ.

މި ބަދަލު ގެނައުމުގެ ކުރިން އަމަލުކުރަމުންދިޔަ އުސޫލުތައް އޮންނަ ގޮތުން އިސް ފަނޑިޔާރުކަމުގެ މަގާމުން ވަކިވެވެނީ ހަމައެކަނި އަމިއްލައަށް އިސްތިއުފާ ދިނުމުން ނުވަތަ ފަނޑިޔާރުކަމުގެ މަގާމުން ވަކިކުރުމަށް ރައްޔިތުންގެ މަޖިލީހުން ފާސްކުރުމުންނެވެ. ނަމަވެސް އާ ގަވާއިދާއެކު މިކަމަށް ވަނީ ބޮޑު ބަދަލެއް އައިސްފައެވެ.

އިސް ފަނޑިޔާރުކަމުގެ މަގާމަށް ކުރިމަތިލުމުގެ ފުރުސަތު ހުޅުވާލައި، ކުރިމަތިލާ ފަރާތްތަކާ އިންޓަވިއުކުރުމަށްފަހު، އެ މަގާމަށް ބޭފުޅަކު އައްޔަންކުރާނީ ޖޭއެސްސީގެ މެންބަރުންގެ އަޣުލަބިއްޔަތުންނެވެ.