ކުދި ވިޔަފާރިތަކަށް އަމާޒުކޮށްގެން ސިލްސިލާ ބައްދަލުވުންތަކެއް ބާއްވާނަން- ސައީދު

ކުދި އަދި މެދުފަންތީގެ ވިޔަފާރިތަކަށް އަމާޒުކޮށްގެން ސިލްސިލާ ބައްދަލުވުންތަކެއް ބާއްވަން ނިންމަވާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

އޮތެންޓިކް މޯލްޑިވްސްގެ ހަވަނަ އަހަރީ ހަފްލާ ޝަރަފްވެރިކޮށްދެއްވައި ވާހަކަފުޅު ދައްކަވަމުން މިނިސްޓަރު ވިދާޅުވީ ވިޔަފާރިވެރިންނަށް ދިމާވާ ދަތިތަކާއި ގޮންޖެހުންތައް ހައްލުކޮށްދެއްވުމަކީ މިނިސްޓްރީން ނުހަނު އިސްކަމެއް ދެއްވަމުން އަންނަ ކަމެއް ކަމަށާއި، ވިޔަފާރިވެރިންގެ ކަންބޮޑުވުންތަކުގެ އަޑު އައްސަވާނެ ކަމަށެވެ.

މިނިސްޓަރު ވިދާޅުވީ ވިޔަފާރިތަކަށް ދެވޭ ޚިދުމަތްތައް ހަރުދަނާކުރެވޭނީ، ސީދާ ވިޔަފާރިވެރިންނާ ވާހަކަ ދެކެވި، ކުރިމަތިވާ މައްސަލަތައް ދެނެގަނެވިގެން ކަމަށެވެ. އަދި އެކަން ކުރެވޭނީ ގަވައިދުން ވިޔަފާރިވެރިންނާ ބައްދަލުވެ، ޚިޔާލު ހޯދައިގެން ކަމަށެވެ.

ދާދި ފަހަކުން ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވަނީ ވިޔަފާރިވެރިންނާއި ބައްދަލުކުރެއްވުމެއް ބާއްވައި އެފަރާތްތަކުގެ ކަންބޮޑުވުންތަކަށް ހައްލެއް ހޯއްދަވައި ދެއްވާނެކަމަށްވެސް ވިދާޅުވެފަ އެވެ.

ފާއިތުވީ ތޭރަ ވަރަކަށް އަހަރުގެ ތެރޭގައި ސަރުކާރުގެ އެކިއެކި މުއައްސަސާތަކުން ވިޔަފާރިވެރިންނަށް ދޭންޖެހި ނުދީ އެތައް މިލިއަން ރުފިޔާ ހުރިކަމުގެ ކަންބޮޑުވުން ވިޔަފާރިވެރިން ވަނީ ރައީސް އަށް ހުށައަޅާފަ އެވެ.

ރައީސް ވިދާޅުވީ އަންނަ ރަމަޝޯން މަސް ފެށުމުގެ ކުރިން އެފައިސާ ދައކަވައި ހަލާސް ކުރަން މަސައްކަތް ކުރައްވާނެ ކަމަށެވެ.