ރަސްމީ ރިޒާވް 832 މިލިޔަން ޑޮލަރަށް

ދައުލަތުގެ ރަސްމީ ރިޒާވް 832 މިލިޔަން ޑޮލަރަށް އަރާފައިވާ ކަމަށް މަރުކަޒީ ބޭންކް - އެމްއެމްއޭގެ ތަފާސްހިސާބުތަކުން ދައްކައިފިއެވެ.

އެމްއެމްއޭއިން އާންމުކޮށްފައިވާ ދައުލަތުގެ މާލީ ތަފާސްހިސާބުތައް ދައްކާގޮތުން، މިއަހަރުގެ ފެބްރުއަރީގެ ނިޔަލަށް ދައުލަތުގެ ރަސްމީ ރިޒާމް އަދި ބޭނުންކުރެވޭ ރިޒާވް ވަނީ އިތުރުވެފައެވެ. ރަސްމީ ރިޒާވް މިހިނގާ 2025 ވަނަ އަހަރު ފެށިގެން ޖެނުއަރީ މަހުގެ ނިޔަލަށް ހުރީ 708.1 މިލިޔަން ޑޮލަރުގައެވެ. މިއަދަދު ވަނީ ފެބުރުއަރީ މަހުގެ ނިޔަލަށް 832.1 މިލިޔަން ޑޮލަރަށް އިތުރުވެފައެވެ.

މި ތަފާސްހިސާބުތައް ދައްކާގޮތުން ރަސްމީ ރިޒާވަށް އަންނަނީ މަހުން މަހަށް 124 މިލިޔަން ޑޮލަރު އިތުރުވަމުންނެވެ. މިއީ 18 އިންސައްތައިގެ ކުރިއެރުމެއްކަން ފާހަގަކޮށްލަންޖެހެއެވެ.

ދައުލަތުގެ ރަސްމީ ރިޒާވް އިތުރުވަމުން އަންނައިރު، ބޭނުން ކުރެވޭ ރިޒާވްވެސް ވަނީ ފެބްރުއަރީ މަހުގެ ނިޔަލަށް އިތުރުވެފައެވެ. މިއަހަރު ފެށިގެން ޖެނުއަރީ މަހުގެ ނިޔަލަށް ބޭނުން ކުރެވޭ ރިޒާވުގައި ހުރީ 116 މިލިޔަން ޑޮލަރުކަމަށް މަރުކަޒީ ބޭންކުގެ ތަފާސް ހިސާބުތަކުން ދައްކައެވެ.

ފެބްރުއަރީމަހު ނިޔަލަށް މިއަދަދު ވަނީ އިތުރުވެފައެވެ. ފެބްރުއަރީ މަހު މިއަދަދު ހުރީ 179.1 މިލިޔަން އެމެރިކާ ޑޮލަރުގައެވެ. މިއީ މަހުން މަހަށް އަޅާ ބަލާއިރު 54 އިންސައްތައިގެ ކުރިއެރުމެކެވެ.

އެގޮތުން ޖެނުއަރީ މަހުން ފެށިގެން ފެބްރުއަރީ މަހަށް ބޭނުން ކުރެވޭ ރިޒާވަށް 63 މިލިޔަން ޑޮލަރު ވަނީ އިތުރުވެފައެވެ.

ދައުލަތުގެ ރަސްމީ ރިޒާވް އަދި ބޭނުން ކުރެވޭ ރިޒާވް ހަރުދަނާ ކުރިއެރުން އައިސްފައިވާއިރު، ރާއްޖެއަށް ވަންނަ ބޭރުފައިސާ ބޭންކުތައް މެދުވެރިކޮށް މާރުކުރަން ވަނީ ފަށާފައެވެ. މީގެ ސަބަބުން ދައުލަތުގެ ބޭރުފައިސާގެ ރިޒާވް އިތުވާނެކަމަށް ސަރުކާރުން ލަފާކުރެއެވެ.