ހިޔާ ޓަވަރުގެ އިތުރު ލިފްޓުތައް ހަރުކޮށް، ހުޅުވާލައިފި

ހުޅުމާލޭގެ ދެވަނަ ފިޔަވަހީގައި ހިމެނޭ ހިޔާ ޓަވަރުތަކުގައި އިތުރު ލިފްޓު ހަރުކުރުމުގެ މަޝްރޫޢުގެ ދަށުން، 13، 14 އަދި 15 ވަނަ ޓަވަރުގެ މަސައްކަތްތައް މުޅިން ނިންމައި، މިއަދު އާންމުންނަށް ބޭނުންކުރެވޭ ގޮތަށް ހުޅުވާލައިފިއެވެ.

ޗައިނާގެ ޝެންޔެންގް ޔުއަންޑާ އިންޓެލެކްޗުއަލް އިންޑަސްޓްރީ ގްރޫޕާ ހަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން، މިހާރު މި ތިން ޓަވަރުގެ ލިފްޓުތައް އާންމުން ބޭނުންކުރަން ފަށާފައިވާ ކަމަށް އެޗް.ޑީ.ސީން މަޢުލޫމާތުދެއެވެ. އަދި މި އައު ލިފްޓުތަކާއެކު އެ ޓަވަރުތަކުގައި ދިރިއުޅޭ ރައްޔިތުންނަށް ދަތުރުފަތުރުކުރުމުގައި ބޮޑެތި ފަސޭހަތަކެއް ލިބިގެންދާނެ ކަމަށްވެސް އެ ކުންފުނިން ފާހަގަކުރެއެވެ.

25 ފަންގިފިލާގެ ހިޔާ ޓަވަރުތައް ފުރަތަމަ އިމާރާތްކުރިއިރު، އެކަށީގެންވާ ވަރަށް ލިފްޓު ހަރުކޮށްފައި ނުވުމާއި، ބަލިމީހުން އުފުލުމަށް ބޭނުންވާ ފަދަ ތަނަވަސް ލިފްޓުތައް ނެތުމުގެ ސަބަބުން ރައްޔިތުންނަށް ވަނީ ގިނަގުނަ ތަކުލީފުތަކަކާ ކުރިމަތިލާން ޖެހިފައެވެ. ކޮންމެ ޓަވަރެއްގައި ގާތްގަނޑަކަށް 400 އެޕާޓްމަންޓް ހިމެނޭއިރު، ގާތްގަނޑަކަށް 2000 އެއްހާ މީހުންގެ އާބާދީއެއް ދިރިއުޅޭ މި ޓަވަރުތަކުގެ ލިފްޓުގެ ދަތިކަމަކީ އާންމުންގެ ބޮޑު ކަންބޮޑުވުމެކެވެ.

މި މައްސަލައަށް ދާއިމީ ހައްލެއް ހޯއްދަވައިދެއްވުމުގެ ގޮތުން، ހިޔާގެ ކޮންމެ ޓަވަރެއްގައި އިތުރު ދެ ލިފްޓު ހަރުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. ޖުމްލަ 6,720 ހައުސިންގ ޔުނިޓް ހިމެނޭ މި ބިޔަ މަޝްރޫޢުގެ ދަށުން ކުރިއަށްގެންދާ މި މަސައްކަތަކީ ރައްޔިތުންގެ ދިރިއުޅުމުގެ ފެންވަރު މަތިކުރުމަށް ކުރެވޭ މުހިންމު މަސައްކަތެކެވެ.