އަވަދިނެތިވުމަކީ ނަމާދު އެޅުމަށް އޮތް ޢުޛުރެއް ނޫން: ހުކުރު ޚުތުބާ

އަވަދިނެތިވުމަކީ ނަމާދު އެޅުމަށް އޮތް އުޛުރެއް ނޫން ކަމަށާއި ނަމާދަށް ސަމާލުކަން ދިނުމަށް މިއަދުގެ ހުކުރު ޚުތުބާގައި ގޮވާލައިފިއެެވެ.

މިއަދުގެ ހުކުރު ޚުތުބާގައި ބުނެފައިވަނީ އިސްލާމްދީނުގެ ތަނބުކަމުގައިވާ ނަމާދަކީ ކޮންމެ މުކައްލަފަކު ކުރުން ވާޖިބުވެގެންވާ އަޅުކަމެއްކަމަށެވެ. އަދި ރަށުގައި ގާއިމުވެހުރި މީހާއާއި ދަތުރެއްމަތީގައިވާ މީހާއާއި ބަލި ތަންމަތީގައި އޮންނަ މީހާ ވެސް ކުރަން އަންގަވާފައި އޮންނަ އަޅުކަމެއް ކަމަށެވެ.

ނަމާދު ނުކުރެވޭނެ ހަމައެކަނި ޙާލަތަކީ ތިމާގެ ބުއްދި ފިލައިދިއުން ކަމަށާއި، އެހެންކަމުން މި މަތިވެތި އަޅުކަމަށް އަހަރެމެން ވަގުތު ހުސްކުރަން ޖެހެނީ، ދުނިޔެވީ ގޮތުން ކުރާން ހުރި، ހުރިހައި ކަމެއް ނިމުމުން، ކުރާ ކަމެއް ކަމުގައި އެއްވެސް ހާލަތެއް ނުދެކުމަށް ހުކުރު ޚުތުބާގައި ވަނީ ބުނެފައެވެ.

އަޅާގެ ޢަމަލުތަކުގެ ތެރެއިން ޤިޔާމަތްދުވަހު އެންމެ ފުރަތަމަ ސުވާލުކުރެވޭނީ ނާމާދާއި މެދުގައި ކަން ޚުތުބާގައި ވަނީ ހަދާންކޮށްދީފައެވެ.

ދިވެހިންނަކީ ޒަމާނުއްސުރެ ބުރަ މަސައްކަތްކޮށްގެން ޢާމްދަނީ ހޯދާ ބަޔެއްކަމާއި، ޚާއްސަކޮށް، މަސްވެރިކަމާއި ދަނޑުވެރިކަން ފާހަގަކޮށް ޚުތުބާގައި ބުނީ ގިނަ މީހުންނަކީ، ދުވާލުގެ ގިނަ ވަގުތު އަވަދިނެތި ވަޒިފާތަކުގައި އުޅޭ ބަޔެއް ކަމަށެވެ. އަދި އޮފީސްތަކާއި ކުންފުނިތަކާއި ފިހާރަތަކުގައި ވަޒީފާގައި އުޅޭ ދިވެހިން ވެސް ވަރަށް ގިނަ ކަން ފާހަގަކޮށް ޚުތުބާގައި ބުނީ އެގޮތަށް ދުވާލުގެ ވަގުތުތައް ހޭދަކުރާއިރު، ނަމާދުތަކަށް ސަމާލުކަން ދެވެނީ ކިހާ މިންވަރަކަށްތޯ ސުވާލުކުރަންޖެހޭ ކަމަށެވެ.

ޚުތުބާގައި ބުނީ މުސްލިމެއްގެ ހައިސިއްޔަތުން ތިމާ އެންމެ ބޮޑަށް އިސްކަމެއް ދޭންޖެހޭނީ ނަމާދަށް ކަމަށެވެ.

"މުސްލިމު އަޙުންނޭވެ! ކީރިތި ރަސޫލާ ޞައްލަ ﷲ ޢަލައިހި ވަޞައްލަމް ވަނީ ނަމާދު ކުރަން ވަރަށް ބޮޑަށް ބާރު އަޅުއްވައިފައެވެ. އަދި ނަމާދުއަޅާ މީހާއާ މެދު އިންޒާރުކުރައްވައި އެކަލޭގެފާނު ޙަދީޘް ކުރައްވައިފައިވެއެވެ.ހަމަކަށަވަރުން، އަޅާއާ ޝަރީކުކުރުމާއި ކާފިރުކަމާ ދެމެދުގައިވާ އިމަކީ، ނަމާދުއެޅުމެވެ."

ޚުތުބާގައި ބުނީ މަސައްކަތުގައި އަވަދިނެތި އުޅުމަކީ ތިމާ ނަމާދުތަކަށް ފަރުވާކުޑަކުރާން ޖެހޭ ސަބަބެއް ނޫން ކަމަށާއި ދިރިއުޅުމުގެ ބޭނުން ފުއްދުމަށްޓަކައި ކޮންމެ މަސައްކަތެއް ކުރިކަމުގައި ވިއަސް ނަމާދު ވަގުތު ޖެހުމުން އެ ނަމާދުކުރާން އަވަސްވެގަންނާން ޖެހޭ ކަމަށެވެ.

މިސްކިތުގެ ޖަމާޢަތަށް ހާޒިރު ނުވެވުމަކީ ނަމާދު އެޅުމަށް އޮތް އުޒުރެއް ނޫންކަމަށާއި، މިސްކިތަށް ޖަމާޢަތަށް ނުދެވޭނަމަ އެތިބި ތަނެއްގައި ތިބެ ނަމާދުކުރުމަށް ޚުތުބާގައި ވަނީ ބުނެފައެވެ.

"ނަމާދަކީ އަހަރެމެން އެންމެންގެ މައްޗަށް ފަރުޟުކުރައްވާފައިވާ އަޅުކަމަށް ވީ ހިނދު، ހުކުރުގެ ޖަމާޢަތަށް ސަމާލކަންދޭ ފަދައިން ފަރުޟުފަސް ނަމާދަށް ވެސް ސަމާލުކަން ދޭށެވެ! ނުކުޅެދުންތެރިކަން ހުންނަ މީހުންނާއި ޢުމުރުން ދުވެސްވެފައިވާ މީހުން ނަމާސަށް ފަރުވާތެރިވާ މަންޒަރަކީ ނުހަނު އުފާވެރިކަން ހިތަށް ގެނުވާ މަންޒަރެއް. ހިތާމައަކީ ޒުވާނުންނާއި ފުރާވަރުގެ ކުދީން މިސްކިތްތަކުން ފެންނަ އަދަދު މަދުވުމެވެ."

ޚުތުބާގައި ބުނީ ރާއްޖެއަކީ ސައްތައިން ސައްތަ އިސްލާމީ ގައުމެއްކަމުގައި ވީހިނދު، ރާއްޖޭގެ ހުރިހާ ކަންކޮޅުތަކުގައި މިސްކިތްތައް ގިނަ ކަމުގައިވީ ނަމަވެސް ހިތާމައަކީ އެ މިސްކިތްތަކަށް އަރައި ނަމާދުކުރާ މީހުންގެ އަދަދު މަދުވުން ކަމަށެވެ. އަދި ރީތި މިސްކިތްތަކަށް ކިތަންމެ ބައިވަރު އަދި ކައިރިކައިރީގައި ބިނާކުރެވުނަސް އެ މިސްކިތްތަކަށް އަރައި ނަމާދުކުރާ މީހުންގެ އަދަދު މަދުވުން ކަމަށެވެ.

ޚުތުބާގައި ބުނީ ރީތި މިސްކިތްތައް ކިތަންމެ ބައިވަރު އަދި ކައިރިކައިރީގައި ބިނާކުރެވުނަސް، އެ މިސްކިތްތަށް ފަޅު ފިލުވާން އަރާނެ ބަޔަކު ނުވާނަމަ އެއީ ބިރުގަންނަން ޖެހޭނެ ކަމެއް ކަމަށެވެ.