ޞަފާގެ ޢުމްރާވެރިން ފުރުވާލަން ފްލައިޓެއް ޗާޓަރު ކުރަނީ

އަލްސަފާ ހައްޖު އެންޑް އުމްރާ ގްރޫޕް މެދުވެރިކޮށް އިއްޔެ ހެނދުނާއި ރޭ ސައުދީ އަރަބިއްޔާއަށް ފުރާން ހަމަޖެހިފައި ތިބި އުމްރާވެރިންނަށް ވަކި ޗާޓާޑް ފްލައިޓެއް ބާއްވައިގެން ފުރުވާލުމުގެ މަސައްކަތް ކުރަމުންދާކަަމަށް އިސްލާމިކް މިނިސްޓްރީން ވިދާޅުވެއްޖެއެވެ.

މިނިސްޓަރު ވިދާޅުވީ މި ރޯދަ މަހު އުމްރާއަށް ދިއުމަށް ސަފާއަށް ލާރި ދެކި މީހުން ރޯދަ މަހުގެ ފަހު 10 ގެ ކުރީން މައްކާއަށް ގެންދިއުމަށް އެ ގުރޫޕަށް އަންގާފައިވާ ކަމަށެވެ. އެކަން އެ ގޮތަށް ނުކޮށްފިނަމަ އެ ގުރޫޕާމެދު ހަރުކަށި ފިޔަވަޅު އަޅާނެ ކަމުގެ އިންޒާރުވެސް ވަނީ ދީފައެވެ.

މިނިސްޓަރު ވިދާޅުވި ގޮތުގައި އެއް ކަމެއްގެ ގޮތުން ފުލުހަށް މައްސަލަ ހުށައަޅާ އެ ގުރޫޕްގެ މައްސަލަ ބަލާނެ އެވެ. އަދި ހައްޖާއި އުމްރާއަށް މީހުން ގެންދިއުމުގެ ފުރުސަތު އެ ގުރޫޕަށް ނުދޭން ނިންމާ "ބްލެކް ލިސްޓް" ކުރާނެ ކަމަށެވެ.

ވިސާ ނުލިބޭ ކަމަށް ބުނެ ސަފާގެ ފަރާތުން އުމްރާއަށް ދިއުމަށް ތައްޔާރުވި މީހުންނަށް ނުފުރުނު ކަމަށް އެ ގްރޫޕުން ބުނި ނަމަވެސް އިސްލާމިކް މިނިސްޓްރީން ބުނީ، އެމައްސަލަ ދިމާވެފައި ވަނީ ސަޢުދީ ސަރުކާރުން ނުވަތަ ދިވެހި ސަރުކާރުން ދޭންޖެހޭ އެއްވެސް ހުއްދައެއް ނުލިބިގެން ނޫންކަމަށެވެ. އަދި ޢުމްރާ ވިސާއަކީ 3 މަސްދުވަހަށް ދުރާލާ ލިބޭ އެއްޗަކަށްވާއިރު، ކުންފުނިން އެގޮތަށް ހަމަޖައްސާފައި ނުވާކަމަށެވެ.