
ކުރީގެ ހޯމް މިނިސްޓަރު އަދި އަދާލަތު ޕާޓީގެ ކުރީގެ ރައީސް ޝެއިޚް ޢިމްރާން ޢަބްދުﷲ،،، ފޮޓޯ: ސޯޝަލް މީޑިއާ
ސިޓިޒަންޝިޕް ޤާނޫނަށް ބަދަލު ނުގެނެވުމުން ސަރުކާރުން އުޅެނީ އެސްއީޒެޑްގެ ތެރެއިން ރަށްވެހިކަން ދޭން: އިމްރާން

އާމިނަތު ޝަޒްލާ - 22 ނޮވެމްބަރު 2026 - 14:36
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ސިޓިޒަންޝިޕް ޤާނޫނަށް ބަދަލު ގެނައުމަށް ފުރަތަމަ މަސައްކަތްކުރި ނަމަވެސް، އެކަން ކާމިޔާބު ނުވުމުން މިހާރު މަސައްކަތް ކުރަމުންދަނީ ސްޕެޝަލް އިކޮނޮމިކް ޒޯން (އެސްއީޒެޑް) ޤާނޫނުގެ ތެރެއިން ބޭރުގެ ފަރާތްތަކަށް ރަށްވެހިކަން ދިނުމަށް ކަމަށް ކުރީގެ ހޯމް މިނިސްޓަރު އަދި އަދާލަތު ޕާޓީގެ ކުރީގެ ރައީސް ޝެއިޚް ޢިމްރާން ޢަބްދުﷲ ތުހުމަތުކުރައްވައިފިއެވެ.
ގައުމީ ހަރަކާތުގެ ފަރާތުން މިއަދު ބޭއްވި ޕްރެސް ކޮންފެރެންސްގައި ވާހަކަ ދައްކަމުން ޝެއިޚް ޢިމްރާން ވިދާޅުވީ، ސަރުކާރުން އެންމެ ފުރަތަމަ ރޭވީ ސިޓިޒަންޝިޕް ޤާނޫނަށް ބޮޑު ބަދަލެއް ގެނެސްގެން، ދުނިޔޭގެ ބޮޑެތި މުއްސަނދިންނަށާއި ނުފޫޒުގަދަ ފަރާތްތަކުގެ އިތުރުން ކުށްތައް ކޮށްގެން އެމީހުންގެ ޤައުމުތަކުން ބޭރުކުރާ ފަރާތްތަކަށް ރާއްޖޭގެ ރައްޔިތުކަން ހޯދައިދިނުމަށެވެ. ނަމަވެސް، ކެބިނެޓުގެ ތެރެއިން އެކަމަށް ނުރުހުން ފާޅުވުމުން، ދެން ފެއްޓެވި މަސައްކަތަކީ އެސްއީޒެޑް ޤާނޫނަށް އިސްލާހު ގެނެސްގެން އެ ޤާނޫނުގެ ނިވަލުގައި އެކަން ކުރުން ކަމަށް އިމްރާން ވިދާޅުވިއެވެ. އޭނާ ތުހުމަތު ކުރެއްވި ގޮތުގައި މިއީ ބޭރުގެ މުއްސަނދިންނާއި ކުށްކުރާ ފަރާތްތަކަށް ދިވެހި ރައްޔިތުކަން ދީގެން ސަރުކާރުން މާލީ މަންފާއާއި ނާޖާއިޒު ފައިދާ ހޯދުމަށް ކުރާ ކަމެކެވެ.
އިމްރާން ވިދާޅުވެފައިވަނީ، ބޭރުގެ އެކި ފަރާތްތަކަށް ދިވެހި ރައްޔިތުކަން ދިނުމަކީ ޤައުމުގެ މިނިވަންކަމާއި ސިޔާދަތަށް އޮތް ބޮޑު ގޮންޖެހުމެއް ކަމަށެވެ. އަދި ރާއްޖޭގެ ދީނީ އެއްބައިވަންތަކަމާއި އެއް ބަހަކުން ވާހަކަދައްކާ އެއްބައިވަންތަ ރައްޔިތެއްގެ ވަނަވަރު ގެއްލިގެންދާނެ ކަމެއް ކަމަށް ފާހަގަކުރައްވައި، ކިތަންމެ ބޮޑު އިންވެސްޓްމަންޓެއް ކުރި ނަމަވެސް، ބޭރު މީހުންނަށް ރަށްވެހިކަން ދޭންވާނީ ރައްޔިތުންގެ ފެންނަ ނުފެންނަ ވޯޓަކުން ކަމަށް ވިދާޅުވިއެވެ. މީގެއިތުރުން، ޤާނޫނުއަސާސީގެ 9 ވަނަ މާއްދާގެ (ރ) ގައި މުސްލިމަކު ނޫން މީހަކަށް ދިވެހި ރައްޔިތަކަށް ނުވެވޭނެ ކަމަށް ބަޔާންކޮށްފައި އޮންނަ އޮތުމަށް އަލިއަޅުއްވާލައްވައި، ޣައިރު މުސްލިމުންގެ ދާއިމީ އާބާދީއެއް އުފެދުމަކީ ޤާނޫނުއަސާސީގެ ރޫޙާ ޚިލާފު ކަމެއް ކަމަށްވެސް އޭނާ ވިދާޅުވިއެވެ.
ސަރުކާރުގެ ފަރާތުން "ދަ މޯލްޑިވްސް ޕާލް ރެޒިޑެންސް" ގެ ނަމުގައި ރެޒިޑެންސީ ބައި އިންވެސްޓްމަންޓް ޕްރޮގްރާމެއް އިޢުލާނުކޮށްފައިވަނީ އިކޮނޮމިކް މިނިސްޓަރު މުޙައްމަދު ސަޢީދު، ލަންޑަނުގައި ބޭއްވި 19 ވަނަ ގްލޯބަލް ސިޓިޒަންޝިޕް ކޮންފަރެންސްގައެވެ. މި ޕްރޮގްރާމް ފަރުމާކުރުމަށް ސަރުކާރުން ވަނީ މި ދާއިރާއަށް ޚާއްސަ އިނގިރޭސިވިލާތުގެ ކުންފުންޏެއް ކަމަށްވާ ހެންލީ އެންޑް ޕާޓްނާސްއާ އެކު އެއްބަސްވުމެއްގައި ސޮއިކޮށްފައެވެ. ސަރުކާރުން ބުނެފައިވަނީ މިއީ ރާއްޖެއަށް ބޮޑެތި އިންވެސްޓްމަންޓްތައް ގެނައުމަށްޓަކައި ކުރިއަށްގެންދާ މަސައްކަތެއް ކަމަށެވެ.
ނަމަވެސް، އިމްރާން ވިދާޅުވީ 6 ނޮވެމްބަރުގައި ތަސްދީޤުކުރި އެސްއީޒެޑް ޤާނޫނުގެ އިސްލާހުގެ ދަށުން، އާދައިގެ މަޝްރޫޢުތަކެއް ހިންގައިގެންނާއި ގަނޑުކޮށް ފައިސާ ދައްކައިގެން ބިން މިލްކުކޮށް، ސިޓިޒަންޝިޕް ލިބޭނެ ދޮރުތައް ހުޅުވިފައިވާ ކަމަށެވެ. އެގޮތުން ނ. އަތޮޅުގައި ރިސޯޓެއް ހަދަން ދޫކުރި ބިމެއް "ޕްރޮޖެކްޓް އައިލާ" ގެ ނަމުގައި ބޭރު މީހުން ދިރިއުޅޭ ޓައުންޝިޕަކަށް ބަދަލުކޮށް ރައީސް މުޢިއްޒު އަމަލީ މަސައްކަތް ފައްޓަވާފައިވާ ކަމަށާއި، ތ. އަތޮޅުގައި "ތާ އައިލެންޑް ކްލަސްޓަރ ސަސްޓެއިނަބަލް ޓައުންޝިޕް" ގެ ނަމުގައި ބޭރު މީހުންނަށް ޕްރޮޕަޓީ މިލްކުކުރެވޭ ގޮތަށް މަޝްރޫޢުތައް ރާވާފައިވާ ކަމަށް ވިދާޅުވެ އެކަންކަން ހުއްޓުވުމަށް ގޮވާލެއްވިއެވެ.
ރާއްޖޭގައި މީގެކުރިން ޢަމަލުކުރި އުސޫލުތަކަށް އަލިއަޅުއްވާލައްވަމުން އިމްރާން ފާހަގަކުރެއްވީ، 2014 ވަނަ އަހަރު ރައީސް ޔާމީންގެ ވެރިކަމުގައި ތަޢާރަފުކުރި ކޯޕަރޭޓް ރެޒިޑެންޓް ވިސާއާއި، އޭގެ ފަހުން ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ގެނައި އިސްލާހުތަކަކީ ހަމައެކަނި ރާއްޖެއަށް އެތެރެވުމާއި ބޭރުވުމުގައި ލުއިތަކެއް ލިބޭ ގޮތަށް 5 އަހަރުގެ މުއްދަތަށް ދޫކުރެވުނު، ރަށްވެހިކަމުގެ އެއްވެސް ޙައްޤެއް ނުހިމެނޭ ވިސާތަކެއް ކަމަށެވެ.
ނިންމަވާލައްވަމުން އިމްރާން ވަނީ، ޤައުމުގެ ދީނީ އަދި މިނިވަންކަމުގެ ސިޔާދަތު ގެއްލޭ ފަދަ ޤާނޫނުތައް ފާސްނުކުރުމަށް ރައްޔިތުންގެ މަޖިލީހުގެ މެންބަރުންނަށް ގޮވާލައްވާފައެވެ. އަދި ޝަރުޢީ ދާއިރާއިން މި މައްސަލަތަކަށް ފުންކޮށް ވިސްނައި ފިޔަވަޅު އެޅުމަށާއި، ދިވެހި ޤައުމީ ދިފާޢީ ބާރުތަކުން ޤައުމުގެ ސިޔާދަތާއި އިސްލާމީ ވަހުދަތު ހިމާޔަތްކުރުމަށް ކުރަންޖެހޭ މަސައްކަތްތައް ކުރުމަށް އިލްތިމާސްކުރައްވާފައެވެ.
ގުޅުން ހުރި ޙަބަރުތައް

ރިއަލް އެސްޓޭޓް ބިލަށް ރައްޔިތުންގެ ހިޔާލު ހުށަހަޅަން އަލީ ހުސެއިން ގޮވާލައްވައިފި
8 ގަޑިއިރު ކުރިން

ކަސްޓަމްސް އޮޕަރޭޝަންތަކުގައި ބޮޑީވޯން ކެމެރާ އާއި ސަވައިލަންސް ޑްރޯން ބޭނުންކުރަން ފަށައިފި
8 ގަޑިއިރު ކުރިން

އުމްރާއަށް ގެންދާނެ ކަމަށް ބުނެ ސްކޭމް ހިންގި މައްސަލައިގައި އަސްކޮއި ގްރޫޕަށް ދައުވާކުރަން ފޮނުވައިފި
8 ގަޑިއިރު ކުރިން

ގައުމީ ހަރަކާތުގެ އެއްވުން 3 ޑިސެމްބަރުގައި ބާއްވަނީ
8 ގަޑިއިރު ކުރިން


