ސިޓީއެއްގެ ދަރަޖަ ދީފައި އޮތް ތިނަދޫ މީހުން އެހެން ރަށަކަށް ރަށްވެހިކަން ބަދަލުކުރާ ނަމަ އިދާރީ ފީއަކަށް 5،000ރ. ނަގަން ތިނަދޫ ކައުންސިލުން ނިންމި ނިންމުން ލޯކަލް ގަވާމެންޓް އޮތޯރިޓީ (އެލްޖީއޭ) އިން ބާތިލުކޮށްފި އެވެ.
އެ ނިންމުމާއި ގުޅިގެން މިއަދު ބޭއްވި އެލްޖީއޭގެ ބޯޑު ބައްދަލުވުމުގައި ވަނީ އެ ނިންމުމަކީ ގާނޫނާއި ހިލާފު ނިންމުމެއް ކަމަށާއި އެ ނިންމުން ބާތިލުކޮށްފައިވާ ކަމަށެވެ. އަދި އެކަން ތިނަދޫ ކައުންސިލަށް އަންގާނެ ކަމަށްވެސް އެލްޖީއޭ އިން ބުނެ އެވެ.
ތިނަދޫ ކައުންސިލުން މި ގޮތަށް ނިންމީ މި މަހުގެ 4 ވަނަ ދުވަހު ބޭއްވި ޖަލްސާގަ އެވެ.
އެގޮތުން ރަށްވެހިކަން ބަދަލުކުރާ މީހުންގެ އަތުން 5،000ރ. ގެ އިދާރީ ފީއެއް މިއަދުން ފެށިގެން ނަގަން ނިންމުމާ ގުޅޭ ގޮތުން ކައުންސިލުން އާންމުކޮށްފައިވާ އިއުލާނެއްގައި ބުނީ އެގޮތަށް ނިންމި މައިގަނޑު ސަބަބަކީ ތިނަދޫގެ ރަށްވެހިން އެހެން ރަށްރަށަށް ބަދަލުވުމަކީ އެ ސިޓީގެ އާބާދީގެ ނިސްބަތަށް ނުރަނގަޅު އަސަރު ކުރާތީ ކަމަށެވެ.
އެހެންވެ މި ނިންމުމަކީ ތިނަދޫގެ އާބާދީ އިތުރު ކުރުމަށް ބާރަކަށް ވާނެ ކަމަށް ކައުންސިލުން ބުންޏެވެ.
