ދޮގު މައުލޫމާތު ފެތުރުވުން ހުއްޓުވުމަށްޓަކައި 'މީޑިއާ ލިޓަރަސީ ކަރިކިއުލަމް' އެއް އެކުލަވާލައި، ސްކޫލްތަކުގައި ކިޔަވައިދޭން ޖެހޭ ކަމަށް ކޮމަންވެލްތުގެ ޕާލިމެންޓްރީ އެސޯސިއޭޝަން (ސީޕީއޭ) އަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ގޮވާލައްވައިފިއެވެ.
އޮސްޓްރޭލިއާގެ ސިޑްނީގައި މިހާރު ކުރިއަށްދާ 67 ވަނަ ކޮމަންވެލްތް ޕާލިމެންޓަރީ ކޮންފަރެންސް (ސީޕީސީ) ގައި ސީ.ޕީ.އޭ.ގެ އޭޝިއާ ސަރަހައްދުގެ، ސަރަހައްދީ މަންދޫބަކަށް އިންތިހާބުވެވަޑައިގެންނެވި ދިއްގަރު ދާއިރާގެ މެމްބަރުކަން ވެސް ކުރައްވާ ނާޒިމްއެވެ.
އެ ކޮންފަރެންސްގައި އެމަނިކުފާނު ދެއްވި ތަގުރީރުގައި މައިގަނޑު ގޮތެއްގައި ހުރިހާ ގައުމުތަކަށް ގޮވާލެއްވީ ސައްހަ ނޫން މައުލޫމާތު ފެތުރުމުގެ ނުރައްކާތަކާއި އެކަން ހުއްޓުވުމަށް އެކުގައި މަސައްކަތް ކުރުމަށެވެ.
އެ މައުލޫއުއަށް ބަހުސްކުރައްވަމުން ދޮގު މައުލޫމާތު ފެތުރުން ނާޒިމް ސިފަކުރައްވަނީ ޑިމޮކްރަސީއަށް އޮތް ނުރައްކަލެއްގެ ގޮތުގައެވެ. އެގޮތުން އެމަނިކުފާނު ގަބޫލުކުރައްވާ ގޮތުގައި ދޮގު މައުލޫމާތުގެ ސަބަބުން މިސްރާބު ގެއްލި، ޑިމޮކްރެޓިކް ނިޒާމަށް އެތައް ނުރައްކަތެއް ދަނީ ކުރިމަތިވަމުންނެވެ.
ސައްހަ މައުލޫމާތަށް ވުރެ ދޮގު މައުލޫމާތު ފެތުރޭލެއް ހަ ގުނަ އަވަސްކަން ފާހަގަކުރައްވަމުން ނާޒިމް ގޮވާލެއްވީ އެކަން ހުއްޓުވުމަށް "މީޑިއާ ލިޓަރަސީ ކަރިކިއުލަމް" އެއް އެކުލަވާލުމަށެވެ. އެމަނިކުފާނު ހުށަހެޅުއްވި ގޮތުގައި މި ކަރިކިއުލަމް ވާންޖެހޭނީ ކޮމަންވެލްތުގެ ހުރިހާ ގައުމެއްގެ ގައުމުތަކަށް ވެސް ތަންފީޒުކުރެވޭ، އަދި ހުރިހާ އުމުރުފުރާއަކަށް ބަލައިގެން ފަރުމާކުރާ އެއްޗަކަށެވެ.
ސްކޫލްތަކުގައި މީޑިއާ ލިޓަރަސީ ކިޔަވައިދިނުން ގާނޫނީ ގޮތުން މަޖުބޫރުކުރަންޖެހޭ ކަމަށް ވެސް ނާޒިމް ގަބޫލުކުރައްވައެވެ. އެގޮތުން، އެކަމަށް ޓީޗަރުން ތަމްރީނުކުރުމަށް ފަންޑިން ހަމަޖައްސައި، އެ ޕްރޮގްރާމްތަކުގެ ނަތީޖާ ހާސިލްވޭތޯ ބަލަން ރަނގަޅު ނިޒާމެއް ގާއިމުކުރެވެންޖެހޭ ކަމަށް ވިދާޅުވިއެވެ.
67 ވަނަ ސީޕީސީގެ ބައްދަލުވުން ކުރިއަށްދާނީ މި ހިނގާ ނޮވެމްބަރު މަހުގެ 3 އިން 8 އަކަށެވެ.
ސީ.ޕީ.އޭ.ގެ އެގްޒެކެޓިވް ކޮމިޓީގައި ހިމެނޭ ސަރަހައްދީ މަންދޫބުންނަކީ އެސޯސިއޭޝަންގެ ހަރަކާތްތައް ހިންގުމާއި، ސަރަހައްދުތަކުގެ މަސްލަހަތު ފައިދާހުރި ގޮތެއްގައި ތަމްސީލުކުރޭތޯ ބެލުމުގައި މުހިންމު ދައުރެއް އަދާކުރާ ބައެކެވެ. ނިންމުންތައް ނިންމުމުގެ މަރުހަލާތަކުގައި ބައިވެރިވުމާއި، އެގްޒެކެޓިވް ކޮމިޓީގެ ބައްދަލުވުންތަކުގައި ބައިވެރިވުން ވެސް ސަރަޙައްދީ މަންދޫބުންގެ މަސްއޫލިއްޔަތުތަކުގެ ތެރޭގައި ހިމެނެއެވެ
