ސިޔާސީ ޕާޓީތަކުގެ ގާނޫނާ ޚިލާފުވެއްޖެނަމަ، އެ އަމަލެއް ހިންގި ޕާޓީއެއް 100،000 ރުފިޔާއިން ޖޫރިމަނާކުރެވޭ ގޮތަށް ރައްޔިތުންގެ މަޖިލީހަށް ހުށަހެޅި އިސްލާހު މިއަދު ފާސްކޮށްފިއެވެ.
ސަރުކާރުގެ ފަރާތުން ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު ހުށަހެޅުއްވި އެ ބިލް މިއަދުގެ ޖަލްސާގައި ފާސްކޮށްފައިވަނީ 61 މެމްބަރުންގެ ވޯޓާ އެކު އެވެ. 10 މެމްބަރުން ބިލު ފާސްކުރުމާ ދެކޮޅަށް ވޯޓު ދެއްވިއެވެ.
ސަރުކާރުން ސިޔާސީ ޕާޓީތަކުގެ ގާނޫނު އިސްލާހު ކުރުމުގެ ބޭނުމަކީ ސިޔާސީ ޕާޓީތައް ހިންގުމަށް ދައުލަތުގެ ބަޖެޓުން ފައިސާ ދިނުމަށް ސިޔާސީ ޕާޓީގެ ގާނޫނުގައި ކަނޑައަޅާފައިވާ އުސޫލު އިސްލާހު ކުރުމަށާއި، ގާނޫނާ ޚިލާފުވާ ހާލަތްތައް މަދުކުރުމުގައި ސިޔާސީ ޕާޓީތަކުން ޒިންމާ އުފުލުމަށް ބާރުއެޅުމުގެ ގޮތުން ގާނޫނާ ޚިލާފުވާ ވަކިވަކި ފަރާތް ޖޫރިމަނާ ކުރުމެވެ.
އިސްލާހުގައިވާ ގޮތުން ގާނޫނާ ހިލާފުވާ މީހަކު 30،000 ރުފިޔާ އާއި 75،000 ރުފިޔާއާ ދެމެދުގެ އަދަދަށް ޖޫރިމަނާ ކުރެވޭނެއެވެ. އެ އަމަލެއް ހިންގި ފަރާތެއް ނިސްބަތްވާ ޕާޓީއެއް 100،000 ރުފިޔާ އިން ޖޫރިމަނާ ކުރެވޭނެ ކަމަށް އިސްލާހުގައި ވެއެވެ.
ސިޔާސީ ޕާޓީތަކުގެ ގާނޫނުގެ 49 މާއްދާ މިހާރު އޮތް ގޮތުން ގާނޫނާ ހިލާފަށް ޕާޓީއެއްގެ މެމްބަރެއްގެ ގޮތުގައި ހެދުމަށް ނަން ހުށަހަޅައިފިނަމަ އެ އަމަލު ހިންގި ފަރާތެއް 5,000 ރުފިޔާ އާއި 10,000 ރުފިޔާގެ އަދަދަކުން ޖޫރިމަނާ ކުރެވެއެވެ.
މި އިސްލާހުގައި ދައުލަތުގެ ބަޖެޓުން ސިޔާސީ ޕާޓީތަކަށް ފައިސާ ދޫކުރާ އުސޫލުވެސް ބަދަލުކުރަން ހުށަހަޅާފައި ވެއެވެ.
އެގޮތުން ސިޔާސީ ޕާޓީ ހިންގުމަށް ދައުލަތުގެ ބަޖެޓުން ދޭ ފައިސާ ވާންވާނީ ކޮންމެ އަހަރެއްގައި ދައުލަތުގެ ބަޖެޓުގައި އެ ކަމަށް ކަނޑައެޅި ދޫކުރެވޭ ފައިސާކަން ވަނީ ބަޔާންކޮށްފައެވެ. އެގޮތުން، ދައުލަތުގެ އަހަރީ ބަޖެޓްގައި އެ އަހަރަކަށް ލަފާކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ބަދަލުކުރަން ވަނީ ހުށަހަޅާފައެވެ.
އެ ބިލު ފާސްކުރީ މުޅި މަޖިލީހުގެ ކޮމިޓީން ގެނައި އިސްލާހުތަކާ ވެސް އެކު އެވެ. އެގޮތުން، އުވާލާ ޕާޓީތައް ރަމްޒުކޮށްދޭ، ކިލަ، ލޯގޯ، ނިޝާން ބޭނުން ކުރެވޭނީ ކުރިއަށް އޮންނަ 5 އަހަރަށް ބޭނުން ނުކުރެވޭ ގޮތަށް ވެސް އެ ގާނޫނު ވަނީ އިސްލާހުކޮށްފަ އެވެ. ހަމައެއާއެކު ކޮންމެ 5 އަހަރަކުން 1 ފަހަރު އަހަރީ ޖަލްސާ ނުބާއްވާ ޕާޓީތައް އުވޭގޮތަށް އޮތް މާއްދާ ވެސް އުވާލުމަށް ފާސްކޮށްފައިވެއެވެ.
