އިންތިހާބީ ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ޕްލޭން މިރޭ އިފުތިތާހުކުރަން ނިންމައިފިއެވެ.
މި ފޮތް ލޯންޗުކުރުމުގެ ހަފުލާ އޮންނާނީ މިރޭ 8:15ގައި ދަރުބާރު ގޭގައެވެ.
އިންތިޚާބީ ރައީސް ދާދި ފަހުން ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން ވިދާޅުވީ، އެމަނިކުފާނުގެ ސަރުކާރެއްގައި ފޮރުވާނެ އެއްވެސް އެއްޗެއް ނޯންނާނެ ކަމަށާއި ރައްޔިތުންނަށް ހިދުމަތްކުރަން ނުކުންނަ މީހަކު ފޮރުވަން ޖެހޭ ކަމެއް އޮވެގެން ނުވާނެ ކަމަށެވެ.
މުއިއްޒު ވިދާޅުވީ، އެމަނިކުފާނު ކެމްޕޭންގެ އެންމެ ފުރަތަމަ ދުވަހު ދެއްކި ވާހަކައިން ފެށިގެން މިއަދާއި ހަމައަށް ދެއްކި ހުރިހާ ވާހަކައެއް ވެސް ދިމާވާނެ ކަމަށާއި އެފަދަ ކޮންމެ ވާހަކަ އެއްވެސް ދައްކާފައިވަނީ އެކަމެއް ކުރަން، ހިތުގެ އަޑިން ގަބޫލުކޮށް، އެކަން ކުރުމުގެ ނިޔަތުގައި ކަމަށެވެ.
އަދި އެކަމަށްޓަކައި ބާއްވާ ޚާއްސަ ހަފްލާއެއްގައި ރިޔާސީ ޓިކެޓު ލިބުނު ހިސާބުން ފެށިގެން، އިންތިހާބުގެ ދެބުރު ވެސް ރަށްރަށަށް ކެމްޕެއިނަށް ވަޑައިގެން ދެއްކި ވާހަކަތައް ހިމެނޭ ހާއްސަ ފޮތެއްގައި މިރޭ ނެރެނޭ ކަމަށް ވެސް މުއިއްޒު ވިދާޅުވިއެވެ.
މުއިއްޒު ވިދާޅުވީ، ފުރަތަމަ ދުވަހު، ކެނޑިޑޭޓަކަށް ވުމަށްޓަކައި ފޯމު ލީ ދުވަހު ނުކުމެ ނޫސްވެރިންނާ ދެއްކި ވާހަކައިން ފެށިގެން، ދެބުރުގައި ދެއްކި ހުރިހާ ވާހަކައެއް، ހުރިހާ ރަށަކަށް ގޮސް، ހުރިހާ ތަނެއްގަ ދެއްކި ހުރިހާ ވާހަކައަކާ، އަދި އިންތިހާބު ކާމިޔާބުވެގެން މިތަނުގައި ބޭއްވި ޖަލްސާގައި ދެއްކި ވާހަކައާ ހަމައަށް ހުރިހާ ވާހަކައެއް އަކުރުން އަކުރަށް ލިޔެފައިވާ ފޮތެއް ނެރެން ނިންމާފައިވާ ކަމަށެވެ.
" އެ ފޮތުގައި އަދި ހުރިހާ ވައުދެއް ވެސް ހިމަނާފަ، ފޮތެއް އެބަ ނެރެން. އެއްވެސް ކަމެއް ފޮރުވަން ބޭނުން ނުވާތީ. އެ ފޮތުން ފެނިވަޑައިގަންނަވާނެ ހުރިހާ ވާހަކައެއް." ޑރ. މުއިއްޒު ވިދާޅުވިއެވެ.
