ވަގަށް ފައިސާ ބޭރުކުރަން އުޅުނު މައްސަލައިގައި ހައްޔަރުކުރި މީހުންގެ ބަންދު މުއްދަތު އިތުރުކޮށްފި

ސީރިއަލް ޕެކެޓްތަކެއްގައި ފޮރުވައިގެން 3.8 މިލިއަނަށް ވުރެ ގިނަ ރުފިޔާގެ ބޭރު ފައިސާ ރާއްޖެއިން ބޭރުކުރަން އުޅުނު މައްސަލައިގައި ހައްޔަރުކުރި ބަންގްލަދޭޝްގެ ހަ މީހުންގެ ބަންދުގެ މުއްދަތު ކްރިމިނަލް ކޯޓުން އިތުރުކޮށްފިއެވެ.

މަނީ ލޯންޑަރިންގެ ތުހުމަތުކުރެވޭ މި މީހުން ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ހައްޔަރުކޮށްފައިވަނީ މި ހިނގާ މަހުގެ 18 ވަނަ ދުވަހު ރާއްޖެއިން ފުރަން އުޅެނިކޮށެވެ. މި މައްސަލައިގައި އެ މީހުންގެ ބަންދާމެދު ގޮތެއް ނިންމުމަށް މި މަހުގެ 19 ވަނަ ދުވަހު ކޯޓަށް ހާޒިރުކުރުމުން ފުރަތަމަ ދިނީ 10 ދުވަހުގެ މުއްދަތެކެވެ. ނަމަވެސް، އިއްޔެ ކްރިމިނަލް ކޯޓުން ވަނީ މި އެންމެންގެ ބަންދަށް އިތުރު 30 ދުވަސް ޖަހައިދީފައެވެ.

ފުލުހުން ވިދާޅުވި ގޮތުގައި މި މައްސަލައިގައި އަތުލައިގަތް ފައިސާގެ ތެރޭގައި 18 ޤައުމެއްގެ ފައިސާ ހިމެނެއެވެ. އޭގެ ތެރޭގައި 174،161 އެމެރިކާ ޑޮލަރާއި، 56،760 ޔޫރޯގެ އިތުރުން 1،815 ސްޓާލިންގ ޕައުންޑް ހިމެނޭއިރު، މި ހުރިހާ ފައިސާއެއްގެ ޖުމްލަ އަގު ގާތްގަނޑަކަށް 3،861،415.29 (ތިން މިލިއަން އަށްލައްކަ ފަސްދޮޅަސް އެއްހާސް ހަތަރުސަތޭކަ ފަނަރަ) ރުފިޔާއަށް އަރައެވެ.

ފުލުހުން އާންމުކުރި ފޮޓޯތަކުން ހާމަވާ ގޮތުގައި، މި ގިނަ އަދަދުގެ ފައިސާތައް ރައްކާކޮށްފައި ހުރީ ކާބޯތަކެތީގެ ގޮތުގައި ބޭނުންކުރާ ސީރިއަލް ޕެކެޓްތަކުގެ އެތެރޭގައެވެ.