ރައީސް ޔާމީން ވެރިކަން ކުރި ފަސް އަހަރު ތެރޭގައި، މުޅި ގައުމު އެފުށް މިފުށަށް ޖަހާލީ އެމަނިކުފާނުގެ އަނބިކަނބަލުން ފާތުމަތު އިބްރާހިމް ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު އަބްދުލްލަތީފް މުހަންމަދު ވިދާޅުވެއްޖެ އެވެ.
2013 ވަނަ އަހަރު ރައީސް ޔާމީން ވެރިކަމާ ހަވާލުވެވަޑައިގެންނެވީ އޭރު އެމަނިކުފާނު ހިންގެވި ޕީޕީއެމް މެދުވެރިކޮށެވެ. ވެރިކަމުގެ ވަކި ހިސާބަކުން ޕީޕީއެމް ތެރޭގައި ހަމަނުޖެހުންތައް އުފެދި ޕާޓީން ވަކިކުރި މެމްބަރުންގެ ތެރޭގައި މެމްބަރު ލަތީފް ހިމެނިވަޑައިގަންނަވަ އެވެ. އެކަމާގުޅޭ ގޮތުން "އަސްލު ޓީވީ" ގެ ވަތުބަތާނަ ޕްރޮގްރާމުގައި ވާހަކަދައްކަވަމުން މެމްބަރު ލަތީފް ވިދާޅުވީ ރައީސް ޔާމީން މި ގައުމު ގެންގުޅުނީ އެމަނިކުފާނުގެ އަމިއްލަ މިލްކެއްގެ ގޮތުގައި ކަމަށެވެ. އަނިޔާވެރިކަމުގައި އެމަނިކުފާނު ހުންނެވީ އިންތިހާ ދަރަޖާގައި ކަމަށާއި، އެ ހުރިހާ ކަމެއްގައި އަނބިކަނބަލުން އެންމެ އަރިހުގައި ހުންނެވި ކަމަށެވެ.
ސަރުކާރު އެފުށް މި ފުށަށް މި ޖެހީ އަނބިކަނބަލުން. އަޅުގަނޑު މި ދެންނެވީ ބާރުތަކެއް ގާނޫނަކުން ދީފަ ނެތް މީހަކު ނިކުމެ މުޅި ގައުމުގެ ހުރިހާ ކުންފުނިތަކަށް އަމުރުކޮށް އެ ކުންފުނިތަކުން ފައިސާއާއި މުދަލާއި ތަކެއްޗާ ހޯދާ، ކުންފުނިތަކުގެ ވަޒީފާތަކަށް ކަންތައްކުރާނެ ގޮތެއް ކަނޑައެޅި ވާހަކަ. މިއީ އަޅުގަނޑުމެން ދިވެހިން ދިން ވެރިކަމެއް ނޫން. ދިވެހިން ވެރިކަން ހަވާލުކުރީ ރައީސް ޔާމީނާ.
މެމްބަރު ލަތީފް ވިދާޅުވީ ފަސްޓް ލޭޑީ އަށް ވުމުން އޮންނަ އިހްތިރާމަކާއި ގަދަރަކީ ކޮންމެ ދިވެހި ރައްޔިތަކު ވެސް އެ މަގާމެއްގައި ހުންނަ ބޭފުޅަކަށް ދޭނެ އެއްޗެއް ކަމަށެވެ. އެކަމަކު މެޑަމް ފާތުން ގެ އަމަލުތައް ދިޔައީ "ހައްދުން ނެއްޓިގެން" ކަމަށާއި، އުޅުއްވީ "ހިތުހުރި ގޮތަކަށް" ކަމަށް ވިދާޅުވި އެވެ. އަދި މެޑަމް ފާތުންގެ އަމަލުތައް ހުރި ގޮތުން ރާއްޖޭގެ ރައީސަކީ ކާކުކަން އޮޅޭ ހިސާބަށް ގޮސް މުޅި ގައުމު ބޮއްސުންލައިގެން ދިޔަ ކަމަށް ވެސް މެމްބަރު ލަތީފް ވިދާޅުވި އެވެ.
މެމްބަރު ވިދާޅުވީ މެޑަމް ފާތުން އާއި، ރައީސް ޔާމީނަށް އޮތް އިތުބާރާއި ލޯބި ގެއްލުނީ ރައްޔިތުންނަށް އަނިޔާވެރިވުމުން ކަމަށެވެ. ނުލިބޭ ބާރުތަކަށް ވެސް އަތް ފޯރުވާ، އެތައް ބައެއްގެ ހައްގުތައް ނިގުޅައިގަތުމުން ކަން ފާހަގަކުރައްވާ ވިދާޅުވީ އޭގެ ނަތީޖާ އަކީ އިންތިޚާބު ނާކާމިޔާބުވުން ކަމަށެވެ. އަދި ރައީސް ޔާމީނަށް ދެން ވެސް ރަނގަޅުވާނީ އެމަނިކުފާނަކީ ކުރީގެ ރައީސަކަށް ވުމުން އޮތް އިހްތިރާމް ބަލައިގަނެ ސިޔާސީ މައިދާނާ ދުރުގައި މަޑުކުރުން ކަމަށް ވެސް ވިދާޅުވި އެވެ.
މެމްބަރު ލަތީފް މިހެން ވިދާޅުވި އިރު، ރައީސް ޔާމީންގެ ދައުރުގައި މެޑަމް ފާތުންގެ ނަމުގައި އެހީ ފައުންޑޭޝަންތައް ހެދުމާއި، ހިތާނީ ޕާޓީތައް ސްޕޮންސަރ ކޮށްދިނުން އަދި ހަދިޔާ ބެހުން ފަދަ އެތައް ކަމެއް ކޮށްފައިވާތީ އޭރު ވެސް އިދިކޮޅު ފަރާތްތަކުން ތަކުރާރުކޮށް މިކަންކަމުގެ ކަންބޮޑުވުން ފާޅުކުރަމުން ގެންދިޔަ އެވެ.
ޕީޕީއެމް އިން ވަކިވެވަޑައިގެން ރައީސް ޔާމީން އިސްކޮށް ހުންނަވާ "ޕީއެންއެފް" ގެ ނަމުގައި ސިޔާސީ ޕާޓީއެއް އެ މަނިކުފާނު ވަނީ އުފައްދަވާފައެވެ. މަދު ބަޔާއެކު ޕީއެންއެފްގެ ޖަލްސާތައް ބާއްވަމުން އަންނައިރު، އެ ޖަލްސާތަކުގައި ގެންދަވަނީ ރައްޔިތުންގެ މަޖިލީހުގެ މަސައްކަތްތަކަށާއި، ސަރުކާރު ހިންގުމަށް ކެނޑިނޭޅި ފާޑުވިދާޅުވަމުންނެވެ. ސަރުކާރާއި ގުޅޭ ގޮތުން ރައީސް ޔާމީން ކުރައްވަމުން އަންނަ ހުރިހާ ތުހުމަތެއްވެސް ސަރުކާރުން ވަނީ ދޮގުކޮށްފައެވެ.
