ރާއްޖޭގެ ސިޔާސީ މަޝްރަހުން މަލާމާތާއި ފުރައްސާރަކުރުމުގެ މަންޒަރުތައް ފެންނަކަމީ ހިތާމަވެރި ކަމެއް ކަމަށާއި ހާއްސަކޮށް ސިޔާސީ ޕާޓީތަކުގެ ލީޑަރުން އެމަސައްކަތް ކުރަމުންދާތީ އެކަން އެގޮތަށް ނުކުރެއްވުމަށް މަތިވެރި ދާއިރާގެ މެންބަރު ހަސަން ޒަރީރު ގޮވާލައްވައިފިއެވެ.
އަސްލު ޓީވީގެ ދިވެހީންގެ ރާއްޖެ މެންބަރު ޕްރޮގްރާމްގައި ވާހަކަ ދައްކަވަމުން މެންބަރު ޒަރީރު ވިދާޅުވީ، ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒުއަކީ ސިޔާސީ މައިދާނުގައި ތަޖުރިބާކާރު ބޭފުޅެއް ކަމަށާއި މިއަދު އެމަނިކުފާނު ކުރައްވަމުން ގެންދަވާ މަސައްކަތްތައް ތަރުތީބުވެގެން އަންނާނީ އަންނަން އޮތް ޖީލުތަކަށް ކަމަށެވެ.
ޒުވާނުންނަކީ ހަރުދަނާ ތައުލީމީ ގާބިލު ބަޔަކަށް ހަދައި، އިޖުތިމާއީ ފޭރާން ރަނަގަޅު، ދުޅަހެޔޮ ބަޔަކަށް ހެދުމަށްޓަކައި ރައީސް ގެންދަވަނީ ބުރަ މަސައްކަތްތަކެއް ކުރަށްވާ ގާނޫނު ތަކަށް ވެސް އިސްލާހުތަކެއް ގެންނަވަމުންކަން މެންބަރުގެ ވާހަކައިގައި ފާހަގަ ކުރެއްވިއެވެ.
ގާނޫނުތަކަށް ގެންނަ އިސްލާހުތަކާ ގުޅިގެން އިދިކޮޅުގެ ފާޑުކިއުން އަމާޒުވަމުންދާ ކަން ފާހަގަ ކުރަށްވާ މެންބަރު ވިދާޅުވީ އެ ފާޑު ކިއުންތަކުގެ ތެރޭގައި ބިނާ ކުރަނިވި ފާޑުކިއުމެއް ނެތް ކަމަށެވެ.
މި ހުންނަނީ ކުރުގޮތަކަށް ދަންނަވަނީނަމަ ޖެއްސުން ކުރުން ނުވަތަ ފުރަށްސާރަ ކުރުން، ނުވަތަ މަލާމާތް ކުރުން މިއީކީ ސިޔާސީ ޅަފަތުގައި މި އޮތް ރާއްޖޭގެ ޑިމޮކްރަސީގައި އަޅުގަނޑު ގަބޫލުކުރާގޮތުގައި އަޅުގަނޑުމެންގެ މަސައްކަތްތައް ނުވަތަ އަޅުގަނޑުމެންގެ ސިޔާސީ ކަން ކަން ބައްޓަން ކުރަންޖެހޭ ގޮތެއް ނޫން. އެއަށްވުރެ ޒިންމާދާރު ވާން އެބަޖެހޭ. މެންބަރު ޒަރީރު
މިސާލެއްގެ ގޮތުގައި މެންބަރު ޒަރީރު ނެންގެވީ ކުރީގެ ރައީސް އަބްދުއްﷲ ޔާމީން އިސްކޮށް ހުންނަވާ ޕާޓީ ޕީއެންއެފްއެވެ. ގައުމެއްގެ ވެރިކަން ކޮށްފައި ހުރި ބޭފުޅަކު ސަރުކާރުގެ ސިޔާސަތުތަކަށް ފާޑު ކިއުމުގެ ބަދަލުގައި ފެނިގެންދަނީ މަލާމާތް ކުރުމާއި ފުރަށްސާރަ ކުރާ މަންޒަރު ކަމަށް މެންބަރު ވިދާޅުވިއެވެ.
މަލާމާތް ކުރުމާއި ފުރަށްސާރަ ކުރުމުގެ މަންޒަރުތައް ފެނިގެންދާތީ ހާއްސަކޮށް ޕާޓީތަކުގެ ލީޑަރުން އެމަސައްކަތް ކުރަމުންދާތީ އަޅުގަނޑު ހަމަ ގޮވާލަން އެކަން އެގޮތައް ނުކުރަށްވާށޭ ބިނާ ކުރަނިވި ފާޑު ކިއުންތައް. މިގައުމު އެބަޖެހޭ އަޅުގަނޑުމެން ސަލާމަތްކުރަން، މިއީ ހަމައެކަނި އަޅުގަނޑުމެން އުޅޭނެ ގައުމެއް ނޫން. މެންބަރު ޒަރީރު
އަންނަން އޮތް ޖީލުތަކަށް ރަނގަޅު ފޭރާމެއް ލިބިފައިވާ، ހަރުދަނާ ނިޒާމުގެ ތެރެއިން ގާނޫނުތަކަށް ބޯލަނބާ ރައްޔިތުންތަކެއް އުޅޭ ގައުމެއްގެ ގޮތުގައި މި ގައުމު ބާއްވަން ޖެހޭކަމަށް މެންބަރު ވިދާޅުވިއެވެ. އެމަސައްކަތް ކުރެވޭނީ ސިޔާސީ ޕާޓީތަކާ، ޕާޓީތަކުގެ ލީޑަރުންގެ ވެސް އެއްބާރުލުން ލިބިގެން ކަމަށާއި ނަމަވެސް މިއަދު އެ އެއްބާރުލުން ނުލިބޭ ކަމަށް މެންބަރު ވަނީ ވިދާޅުވެފައެވެ.
