މަޖިލިސް މެމްބަރުންގެ މާލީ ބަޔާންތައް އާއްމުކޮށްފި

ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް އެ މަޖިލީހުގެ ރަސްމީ ވެބްސައިޓުގައި އާންމުކޮށްފިއެވެ.

މަޖިލީހުގެ ގަވާއިދު ބަޔާންކުރާ ގޮތުން، ކޮންމެ މެންބަރަކުވެސް މަގާމުގެ ހުވާކުރައްވާ ތާރީހުން ފެށިގެން އަހަރު ދުވަސް ހަމަވުމުން މާލީ ބަޔާން ހުށަހަޅުއްވަން ޖެހެއެވެ.

ހިނގަމުންދާ 20 ވަނަ ރައްޔިތުންގެ މަޖިލީހުގެ މެންބަރުން ކޮންމެ އަހަރެއްގެވެސް އޯގަސްޓް މަހުގެ 31 ވަނަ ދުވަހުގެ ނިޔަލަށް މާލީ ބަޔާން ހުށަހަޅުއްވަން ޖެހިވަޑައިގަންނަވާއިރު، މިއީ އެ މެންބަރުން ހުށަހެޅުއްވި ދެވަނަ މާލީ ބަޔާނެވެ.

މާލީ ބަޔާން ހުށަހެޅުމަށް ކަނޑައެޅިފައިވާ މުއްދަތުގައި މަޖިލީހުގެ 93 މެންބަރުންގެ ތެރެއިން 91 މެންބަރުން ވަނީ ބަޔާން ހުށަހަޅުއްވާފައެވެ.

މި މުއްދަތުގައި ބަޔާން ހުށަނާޅުއްވަނީ މައްޗަންގޮޅި އުތުރު ދާއިރާގެ މެންބަރު އިބްރާހީމް މުޙައްމަދު އެކަންޏެވެ.

މީގެއިތުރުން، ހިތަދޫ އުތުރު ދާއިރާގެ ކުރީގެ މެންބަރު މުހައްމަދު ސިނާންގެ މެންބަރުކަމުގެ ގޮނޑި މިއަހަރުގެ އޭޕްރިލް މަހު ގެއްލިފައިވީ ނަމަވެސް، އެ މުއްދަތާ ހަމައަށް އޭނާ މަގާމުގައި ހުންނެވުމުން، ވަނީ ދެވަނަ މާލީ ބަޔާން މަޖިލީހަށް ހުށަހަޅުއްވާފައެވެ. އަދި އެ ދާއިރާއަށް އަލަށް އިންތިހާބުވެވަޑައިގެންނެވި މެންބަރު ޢަބްދުﷲ ސާދިގު މަގާމުގެ ހުވާކުރެއްވީ މިއަހަރުގެ ޖޫން 15 ގައި ކަމަށްވާތީ، އޭނާ މި މުއްދަތުގައި މާލީ ބަޔާން ހުށަހަޅުއްވާކަށް ނުޖެހެއެވެ.

ރައްޔިތުންގެ މަޖިލީހުގެ މެންބަރުން ހުށަހަޅުއްވަންޖެހޭ މާލީ ބަޔާނަކީ ކޮންމެ މެންބަރެއްގެ މިލްކިއްޔާތުގައިވާ ފައިސާއާއި، އަގުހުރި މުދަލާއި، ވިޔަފާރީގެ ހިއްސާތަކުގެ އިތުރުން އަރަންޏާއި ދަރަނީގެ ފުރިހަމަ ތަފުސީލު ހިމަނައިގެން ހުށަހަޅަންޖެހޭ ބަޔާނެކެވެ.