
އެމެރިކާއިން ޔަމަނަށް ބޮންއަޅަނީ މިސްރުގެ ތާއީދާއެކުކަން ދޭހަވާ ވާހަކަތަކެއް ޓްރަމްޕް ހާމަކުރައްވައިފި

ސައިފް އަޒުހަރު - 01 އޭޕްރީލު 2025 - 18:32
އެމެރިކާއިން ޔަމަނަށް ބޮންއަޅަމުން ގެންދަނީ މިސްރުގެ ރައީސް އަބްދުލްފައްތާހް އައްސީސީގެވެސް ތާއީދާ އެކުގައިކަން އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި ކުރި ޕޯސްޓަކުން ހާމަވެއްޖެއެވެ.
ސޯޝަލް މީޑިއާގައި ކުރި ޕޯސްޓްގައި އެމެރިކާގެ ރައީސް ޓްރަމްޕް ވިދާޅުވެފައިވަނީ، އޭނާ މިސްރުގެ ރައީސާ ފޯނުން ގުޅުއްވައި "އެތައް ކަމަކާ ގުޅޭގޮތުން" މަޝްވަރާ ކުރެއްވި ކަމަށެވެ.
އޭގެތެރޭގައި، ޔަމަނުގެ ހޫޘީންނާ ދެކޮޅަށް ކުރިއަށްގެންދާ އަސްކަރީ އޮޕަރޭޝަންގައި "އަހަރެމެންނަށް ހޯދިފައިވާ ކުރިއެރުންތައްވެސް" ހިމެނޭ ކަމަށް ޓްރަމްޕް ވިދާޅުވެފައި ވެއެވެ.
މީގެއިތުރުން، ޣައްޒާ ހަނގުރާމައާއި، މައްސަލައަށް ހޯދިދާނެ ހައްލުތަކާ ގުޅޭގޮތުންނާއި، އެމެރިކާ ސިފައިން ވަމުންދާ "ތައްޔާރީތަކާ" ގުޅޭގޮތުންވެސް އައްސީސީއާ މަޝްވަރާ ކުރެއްވި ކަމަށް ޓްރަމްޕް ވިދާޅުވެފައި ވެއެވެ.
ޑޮނަލްޑް ޓްރަމްޕްގެ އަމުރަށް އެމެރިކާ ސިފައިން ޔަމަނަށް ބޮންއަޅަންފެށީ، އިސްތިއުމާރީ އިސްރާއީލުން ޣައްޒާއަށް އިންސާނީ އެހީ އެތެރެކުރުން ހުއްޓުވުމުން، ހޫޘީން، އިސްރާއީލުގެ އާގުބޯޓު ފަހަރަށް ރަތްކަނޑު ބަންދުކުރިކަން ހަމައެކަނި ހާމަކުރުމުންނެވެ.
އެމެރިކާ ސިފައިން ޔަމަނުގެ ވެރިރަށް ސަންޢާއަށާއި، ސަޢާދާ އަދި ހުދައިދާއަށް ބޮންއަޅާތާ ދެހަފްތާ ވެގެން ގޮސްފައިވާއިރު، އާންމުންގެ ބޮލަށާއި، ގެތަކަށްވެސް ގެންދަނީ ބޮންއަޅަމުންނެވެ.
އެމެރިކާގެ ހަމަލާތަކުގައި ޔަމަނުން އާންމު އެތައްބަޔަކު މަރުވެ، އެތައްސަތޭކަ ބަޔަކު ޒަޚަމްވެފައިވާއިރު، އެމެރިކާގެ ހަމަލާތަކުން ރަތްކަނޑުން އިސްރާއީލުގެ އެންމެ ބޯޓަކަށްވެސް އަދި ހުރަސް ނުކުރެވޭކަން ހޫޘީން ފާހަގަ ކުރެއެވެ.
ޒަޔަނިސްޓުގެ ދިފާއުގައި އެމެރިކާއިން ޔަމަނަށް ބޮންއަޅަން ފެށުމުން، ހޫޘީންވަނީ އެމެރިކާގެ ބޯޓުފަހަރަށްވެސް ރަތްކަނޑު ބަންދުކޮށްފައެވެ. އޭގެ ސަބަބުން ދުނިޔޭގެ ވިޔަފާރީގެ އެންމެ މުހިންމު ކަނޑުގެ ސަރަހައްދުގެ ހަތްދިޔަ އިންސައްތަ ދަތުރުފަތުރަށްވަނީ ހުރަސްއެޅިފައެވެ.
ހޫޘީން ބުނަމުންގެންދަނީ، އެމެރިކާއިން މަސްރަހް އިތުރަށް ގޯސްކުރާނަމަ ރަތްކަނޑު އެއްކޮށް ބަންދުކޮށްލާނޭ ކަމަށެވެ.
ރަތްކަނޑުގެ ސަރަހައްދަކީ މިސްރުގެ އިގްތިސާދާ ގުޅިފައިވާ ސުއޭޒް ކަނޑުއޮޅި މެޑިޓަރޭނިއަން ކަނޑާ ގުޅުވައިދޭ ލިންކެވެ. ހޫޘީން ރަތްކަނޑުގައި ފެށި އޮޕަރޭޝަންގެ ސަބަބުން މިސްރުގެ އިގްތިސާދަށް ބޮޑެތި ލޮޅުންތައް ވަނީ އަރާފައެވެ.
ޓްރަމްޕްގެ ފޯނުކޯލާ ގުޅޭގޮތުން މިސްރު ސަރުކާރުން ހަމައެކަނި ބުނެފައިވަނީ، އެމެރިކާގެ ރައީސް، މިސްރުގެ ރައީސަށް ގުޅުއްވީ ފިތުރު ޢީދުގެ ތަހުނިޔާ ވިދާޅުވުމަށް ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ، ރަތްކަނޑުގެ އޮޕަރޭޝަން ހުއްޓާލަންދެން ނުވަތަ ހޫޘީންގެ ހަމަލާދިނުމުގެ ގާބިލްކަން މުޅިން ނެތެންދެން ޔަމަނަށް ބޮންއަޅާނޭ ކަމަށެވެ. އެކަމަށް ކިތަންމެ ދުވަހެއް ނެގިޔަސް ހުއްޓާނުލާނޭ ކަމަށެވެ.
ޓްރަމްޕް ހޫޘީން އެންމެފަހުން ދިން ރައްދުގައިވެސް ބުނެފައިވަނީ "ފުރަތަމަ އިސްރާއީލުން ހިންގާ އުދުވާނުތައް ފުރަތަމަ ހުއްޓުވާ. އޭރުން އަހަރެމެން ހުއްޓާލާނަން" މިހެންނެވެ.
އެމެރިކާއިން މިހާރުވެސް ޔަމަނުގެ އެކި ރަށްތަކަށް ބޮންއަޅަމުން އެބަ ގެންދެއެވެ. އަދި ޙޫޘީންވެސް ރައްދު ހަމަލާތައް ދެމުން އެބަގެންދެއެވެ.
އެމެރިކާއިން ޔަމަނަށް ވައިގެ ހަމަލާތައް ދިނުމަށް ބޭނުންކުރަމުންދާ އެންމެ އަގުބޮޑު އެމްކިޔު-9 ގެ ޑްރޯންއެއް، ހޫޘީން ރޭގައިވެސްވަނީ ބިމުން އުދުއްސާލާ ބާވަތުގެ މިސައިލަކުން ހަމަލާދީ މަޣުރިބުމަތިން ވައްޓާލާފައެވެ.
އަދި ޑްރޯން ގޮވާ މަންޒަރާއި އަދި ފަހުން އޭތި ވެއްޓިފައިވާ ސަރަހައްދު ފެންނަ ވީޑިއޯތައްވެސް ޔަމަނުން އާންމުކޮށްފައި ވެއެވެ.
ހޫޘީން ވައްޓާލި އެމްކިޔު-9 ގެ ޑްރޯންއެއްގެ އަގަކީ 32 މިލިއަން ޑޮލަރެވެ. ހުޘީން މިދިޔަ ދެހަފްތާތެރޭ އޭގެ 16 ޑްރޯން ގޮއްވާލާފައިވެއެވެ. މިއީ އެމެރިކާއަށް ލިބުނު 512 މިލިއަން ޑޮލަރުގެ ގެއްލުމެވެ.
ގުޅުން ހުރި ޙަބަރުތައް

އެމެރިކާއަށް ފިނީގެ ތޫފާނެއް، 16 މީހުން މަރުވެއްޖެ
2 އަހަރު ކުރިން

އެމެރިކާ އާއި ޗައިނާގެ ޚާރިޖީ ގުޅުން ވަރުގަދަ ކުރުމަށް ދެ ޤައުމު ދެމެދުގައި މަޝްވަރާކޮށްފި
2 އަހަރު ކުރިން

އެމެރިކާ އާއެކު ނިއުކްލިޔާ މަސައްކަތްތައް ކުރުމަށް މަޝްވަރާ ކުރެވިއްޖެ- ދެކުނު ކޮރެއާ
2 އަހަރު ކުރިން

އެމެރިކާގެ ވައިގެ ސަރަހައްދުން ދަތުރުކުރި "ގޮތް ނޭނގޭ އެއްޗެއް" ވައްޓާލައިފި
2 އަހަރު ކުރިން