ޕާސްޕޯޓުގެ ޚިދުމަތަށް އައި ބަދަލާއެކު އިސްރަށްވެހިންނަށް ބޮޑު ލުޔެއް

މޯލްޑިވްސް އިމިގްރޭޝަނުން ޕާސްޕޯޓުގެ ޚިދުމަތަށް ބޮޑެތި ލުއިތަކެއް ތަޢާރަފުކޮށްފިއެވެ.

މޯލްޑިވްސް އިމިގްރޭޝަނުން ގެނައި މި ބަދަލުތަކަކީ ޒަމާނީ ވަސީލަތްތަކާއެކު ރައްޔިތުންނަށް ކުރިމަތިވާ ތަކުލީފުތައް ކުޑަކޮށް، ޚިދުމަތުގެ ފެންވަރު އައު އުސްމިންތަކަކަށް ގެންގޮސްދިނުމަށް އެޅި މުހިންމު ފިޔަވަޅެކެވެ. ސަރުކާރުގެ މުޅި ނިޒާމު ޑިޖިޓަލައިޒު ކުރުމަށް ކުރަމުންދާ މަސައްކަތުގެ ދަށުން، އިމިގްރޭޝަނުން އަންނަނީ ޓެކްނޮލޮޖީގެ އެހީގައި އެ މުއައްސަސާގެ ޚިދުމަތްތައް ހަރުދަނާ ކުރަމުންނެވެ. މީގެ މައިގަނޑު މަޤްޞަދަކީ ކިއޫގައި މަޑުކުރަންޖެހޭ ވަގުތު ސަލާމަތްކޮށް، ގޭގައި ތިބެގެން ފަސޭހަކަމާއެކު ޚިދުމަތް ހޯދޭނެ މަގު ތަނަވަސްކޮށްދިނުމެވެ.

ނަމަވެސް، ޒަމާނީ ޓެކްނޮލޮޖީއަށް އަންނަ ބަދަލުތަކާއެކު އޮންލައިންކޮށް ޚިދުމަތް ހޯދުމުގައި އިސްރަށްވެހިންނަށާއި ނުކުޅެދުންތެރިކަން ހުންނަ ފަރާތްތަކަށް ދިމާވާ ދަތިތަކަށް ޙައްލެއް ހޯދުމަށް އިމިގްރޭޝަނުން ވަނީ ޚާއްޞަ އިސްކަމެއް ދީފައެވެ. އެގޮތުން، މި ފަރާތްތަކަށް ޕާސްޕޯޓަށް އެދި ހުށަހެޅުމުގައި އެހީތެރިކަން ފޯރުކޮށްދޭނެ އިންތިޒާމުތައް މިހާރު ވަނީ ހަމަޖައްސާފައެވެ.

މި އައު އިންތިޒާމުގެ ދަށުން، އިމިގްރޭޝަންގެ ހެޑް އޮފީހަށް ޚިދުމަތް ހޯދަންދާ އިސްރަށްވެހިންނަށް ޕާސްޕޯޓު ފޮޓޯ ނެގުމާއި، އޮންލައިން އެޕްލިކޭޝަން ފުރިހަމަ ކުރުމުގައި އިމިގްރޭޝަންގެ މުވައްޒަފުން ސީދާ އެހީތެރިކަން ފޯރުކޮށްދޭނެއެވެ. މީގެ އިތުރުން، އިމިގްރޭޝަނަށް ޒިޔާރަތް ކުރާ ފަރާތްތަކަށް މަޑުކޮށްލައިގެން ތިބެވޭނެ ހިތްގައިމު މާޙައުލެއް ޤާއިމުކޮށް، މަޢުލޫމާތާއި އިރުޝާދު ދިނުމަށް "އިންފޮމޭޝަން ކައުންޓަރެއް" ވެސް މިހާރު ވަނީ ހުޅުވާފައެވެ.

ޚިދުމަތްތައް އިތުރަށް ހަރުދަނާ ކުރުމަށް ކުރަމުންދާ މަސައްކަތްތަކާ ގުޅޭގޮތުން އިމިގްރޭޝަންގެ ކޮންޓްރޯލަރ ޖެނެރަލް، ރިޓަޔަރޑް ޕޮލިސް ކޮމިޝަނަރ އަޙްމަދު ފަސީހު ވިދާޅުވީ، ރައްޔިތުންނަށް ލުއިފަސޭހަ ގޮތްތައް ހޯދައިދިނުމަކީ އެ މުއައްސަސާގެ އަބަދުވެސް އަމާޒެއް ކަމަށެވެ. އަދި ކުރިއަށް އޮތްތަނުގައި އިމިގްރޭޝަންގެ ޚިދުމަތްތައް އިތުރަށް ފަސޭހަކުރުމަށްޓަކައި އައު މޮބައިލް އެޕްލިކޭޝަނެއް އިފްތިތާޙު ކުރެވޭނެ ކަމަށްވެސް އޭނާ ވިދާޅުވިއެވެ.

މި ބަދަލުތަކާއެކު، ޚާއްޞަ އެހީއަށް ބޭނުންވާ ފަރާތްތަކަށާއި އިސްރަށްވެހިންނަށް ޕާސްޕޯޓުގެ ޚިދުމަތް ހޯދުމުގައި ކުރިން ދިމާވި ގޮންޖެހުންތަކަށް ބޮޑު ލުޔެއް ލިބިގެންދާނެ ކަމަށް ބެލެވެއެވެ.