މޮރޮކޯގެ ފުރަތަމަ އަންހެން ބޮޑުވަޒީރުގެ މަގާމަށް ފާޠިމާ އައްޔަނުކޮށްފި

މޮރޮކޯގެ ގާނޫނުހަދާ މަޖިލީހުގެ އިންތިހާބު ކާމިޔާބުކުރި އޮތެންޓިސިޓީ އެންޑް މޮޑަރނިޓީ ޕާޓީ (ޕީއޭއެމް) ގެ ލީޑަރު ފާޠިމާ އައްޒަހްރައު އަލްމަންސޫރީ، އެ ގައުމުގެ ފުރަތަމަ އަންހެން ބޮޑުވަޒީރުގެ މަގާމަށް މުހައްމަދު (ހަވަނަ)އައްޔަންކުރައްވައިފިއެވެ.

ޝާހީ ގަނޑުވަރުން ނެރުނު ބަޔާނެއްގައި ވާގޮތުން، އައު ސަރުކާރު އެކުލަވައިލުމުގެ މަސައްކަތް ރަސްގެފާނު ވަނީ އަލް މަންސޫރީ އާއި ރަސްމީކޮށް ހަވާލުކުރައްވާފައެވެ.

މޮރޮކޯގެ ގާނޫނުއަސާސީ ހަމަޖެހިފައިވާ ގޮތުން، ބޮޑުވަޒީރުކަމަށް ޢައްޔަންކުރައްވަން ޖެހިވަޑައިގަންނަވަނީ މަޖިލިސް އިންތިހާބުގައި އެންމެ ގިނަ ގޮނޑި ކާމިޔާބުކުރާ ސިޔާސީ ޕާޓީގެ ލީޑަރެކެވެ.

ކުރީގެ ހައުސިންގ މިނިސްޓަރު އަދި މުއްރާކަޝްގެ މޭޔަރުކަންވެސް ކުރައްވާފައިވާ ޤާނޫނީ ވަކީލު އަލް މަންސޫރީގެ ޕީއޭއެމް ޕާޓީން ވަނީ މި އިންތިހާބުގައި 97 ގޮނޑި ކާމިޔާބުކޮށްފައެވެ.

މި ކާމިޔާބީގައި އެ ގައުމުގެ ފުޓްބޯޅަ ފެޑެރޭޝަނުގެ ވެރިޔާ ފައުޒީ ލަގްޖައު އެ ޕާޓީއާ ގުޅިވަޑައިގަތުން މުހިންމު ދައުރެއް އަދާކުރިއެވެ.

މަސްރަޙު ދިރާސާކުރާ ފަރާތްތަކުން ލަފާކުރާ ގޮތުގައި، ކޯލިޝަން ސަރުކާރެއް އެކުލަވައިލުމުގެ މަޝްވަރާތައް އިސްވެ ކުރިއަށްގެންދަވާނީ އަދި ވަޒީރުންގެ މަޖިލީހުގެ ލިސްޓު ރަސްގެފާނަށް ހުށަހަޅުއްވާނީ އޭނާއެވެ.

2008 ވަނަ އަހަރު އުފެދުނު ޕީއޭއެމް ޕާޓީއަކީ އިޖުތިމާއީ ގޮތުން ޒަމާނީ ބަދަލުތަކަށް ވަކާލާތުކުރާ ޕާޓީއެކެވެ.

އައު ސަރުކާރަށް ކުރިމަތިވާނެ އެންމެ މުހިންމު އެއް މަސްއޫލިއްޔަތަކީ، ސްޕެއިން އަދި ޕޯޗުގަލްއާ ގުޅިގެން 2030 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕަށް ތައްޔާރުވުމުގެ ގޮތުން ހިންގާ، 20 ބިލިއަން އެމެރިކާ ޑޮލަރުގެ ބިޔަ މަޝްރޫޢުގެ ފަހު މަރުޙަލާތައް ކާމިޔާބުކަމާއެކު ނިންމުމެވެ.