އެޗްޑީސީ އަށް ނުލިބި ހުރި 226 މިލިއަން ރުފިޔާ ހޯދައިފި

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވިޔަފާރި އުސޫލުން ދޫކޮށްފައިވާ ބިންތަކަށް ނުލިބި ހުރި ފައިސާގެ ތެރެއިން ޖުމްލަ 226 މިލިއަން ރުފިޔާ މިހާރު އަނބުރާ ހޯދިފައިވާ ކަމަށް އެޗްޑީސީ ގެ މެނޭޖިންގ ޑިރެކްޓަރ ފަޒުލް ރަޝީދު ވިދާޅުވެއްޖެ އެވެ.

ވިޔަފާރި ކުރުމަށް ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑުން ކުއްޔަށް ދޫކޮށްފައިވާ ބިންތަކާއި ޢިމާރާތްތަކުގެ ކުލި ދައްކަމުން ނުގެންދާ މައްސަލައާ ގުޅޭގޮތުން މަޝްވަރާކުރުމަށް، ރައްޔިތުންގެ މަޖިލީހުގެ މާލިއްޔަތު ކޮމިޓީއިން ބުދަދުވަހު ބޭއްވި ބައްދަލުވުމުގައި ފަޒުލް ވިދާޅުވިގޮތުގައި އެޗްޑީސީން ދޫކޮށްފައިވާ ބިންތަކަށް އެކި ވިޔަފާރިތަކުން ދައްކަން ޖެހި ނުދައްކާ 14 ބިލިއަން ރުފިޔާ އެބަހުރި ކަމަށެވެ. އަދި އެ ފައިސާ އަނބުރާ ހޯދުމަށް އެކަށީގެންވާ މަސައްކަތެއް މީގެ ކުރިން ކުރެވިފައި ނުވާ ކަމަށް ވިދާޅުވި އެވެ.

އެޗްޑީސީ އާ ހަވާލުވެވަޑައިގެންނެވި އިރު ފައިސާ ނުލިބި ހުރުން ފަދަ ގިނަ މައްސަލަތަކެއް ހުރިކަން ފާހަގަކުރައްވާ ވިދާޅުވީ މިކަންކަން ހައްލުކުރުމަށް ޚާއްސަ އިންޓާރނަލް ކޮމިޓީތަކެއް އުފެެއްދެވި ކަމަށެވެ. އޭނާ ވިދާޅުވީ ނުލިބި ހުރި ފައިސާ ހޯދުމަށް އެކުލަވާލި ރިކަވަރީ ކޮމިޓީން މިހާތަނަށް ކުރި މަސައްކަތުން 226 މިލިއަނަށް ވުރެ ގިނަ ރުފިޔާ އަނބުރާ ހޯދިފައިވާ ކަމަށެވެ.

މި ފައިސާ ހޯދުމަށް މަސައްކަތްކުރާ ޕްރޮސެސް ހިއްސާކުރައްވަމުން އޭނާ ވިދާޅުވީ ފާއިސާނުދައްކާ ހުރި ވިޔަފާރިތަަކަށް ނުވަތަ މީހުންނަށް "ޑިމާންޑް ލެޓާ" އެއް ފޮނުވާ ކަމަށާއި، އަދި އެ ސިޓީތަކަށް ޖަވާބު ނުލިބިއްޖެ ނަމަ ކޯޓު މަރުހަލާއާ ހަމައަށް ވެސް ދާ ކަމަށެވެ. އެކަމަކު ކޯޓު މަރުހަލާއަކާ ހަމައަށް ނުގޮސް ދެ ފަރާތުން ވެސް އެއްބަސްވެވޭ މުއްދަތެއްގެ ތެރޭގައި، އުނދަގޫ ނުވާނެ ގޮތަށް ފައިސާ ދެއްކުމުގެ ފުރުސަތު ވެސް ފަހިކޮށްދޭ ކަމަށް ފަޒުލް ވިދާޅުވި އެވެ. އެކަމަކު އެ ފައިސާ ނުދައްކާ ނަމަ ކުންފުންޏަށް ލިބެންޖެހޭ ފައިސާ ހޯދުމަށް އެކި ފަރާތްތަކާއެކުވެފައިވާ އެއްބަސްވުން ބާތިލުކުރުމަށް ނިންމާފައިވާ ކަމަށް ވެސް ވިދާޅުވި އެވެ.