87 އެމްބިއުލެންސް ރަށްރަށަށް ވަނީ ފޮނުވިފަ: ހެލްތު މިނިސްޓަރ

އެމްބިއުލެންސް ގެ ހިދުމަތް ހަރުދަނާ ކުރުމުގެ ގޮތުން މިހާތަނަށް 87 އެމްބިއުލެންސް ރަށްރަށަށް ވަނީ ފޮނުވިފަައިވާ ކަމަށް ހެލްތު މިނިސްޓަރ ގީލާ އަލީ ވިދާޅުވެއްޖެއެވެ.

ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމެއްގައި ގީލާ ވަނީ ސިއްހީ ދާއިރާގައި ސީއެމްބިއުލެންސް އާއި ލޭންޑް އެމްބިއުލެންސް އަދި އެއަރ އެމްބިއުލެންސް އާއި ބެހޭ އަދާހަމަ މައުލޫމާތު ހިއްސާކުރައްވާފައެވެ.

ސީ އެމްބިއުލެންސްގެ ހިދުމަތް ފެށި ފަހުން މިހާތަނަށް 2336 ދަތުރެއް ކުރެވި 3025 ބަލިމީހުން ރިފަރ ކުރެވިގެން އުފުލިފައިވާ ކަމަށް މިނިސްޓަރ ވިދާޅުވިއެވެ.

މީގެ އިތުރުން 10 ޕެރެމެޑިކް އެންބިއުލެންސް ހޯދުމުގެ މަސައްކަތް މިހާރު ކުރިއަށްގެންދާ ކަމަށް މިނިސްޓަރ ވިދާޅުވިއެވެ.

ސީ އެމްބިއުލެންސްގެ ހިދުމަތް އެމްއެންޑީއެފް އާއި ގުޅިގެން ހުރިހާ އަތޮޅެއްގައި ގާއިމްކުރެވިފައިވާ ކަމަށް ވިދާޅުވިއެވެ.

ހެލްތު ލޯންޗް ފްލީޓެއް ސިއްހީ ހިދުމަތަށް އިތުރުކުރެވި ހުރިހާ އަތޮޅެއްގެ އަތޮޅު ހޮސްޕިޓަލްތަކުގައި ބޭނުންކުރަމުންދާ ކަމަށް ވެސް މިނިސްޓަރ ވިދާޅުވިއެވެ.

މި ލޯންޗްތަކަކީ އައުޓްރީޗް އަދި ވެކްސިން ޕްރޮގްރާމް ފަދަ ޕްރޮގްރާމްތަކާއި އާއްމު ސިއްހަތުގެ ދާއިރާއިން ގާއިމްކުރަންޖެހޭ މަސައްކަތްތައް ކުރުމަށް ގާއިމްކުރެވިފައިވާ ފްލީޓެއް ކަމަށް މިނިސްޓަރ ވިދާޅުވިއެވެ.

މީގެ އިތުރުން ދިމާވާ ހާލަތަކާއި ގުޅިގެން ބަލިމީހުން އުފުލަން އަތޮޅު ތެރޭގައި ގާއިމްކުރެވިފައިވާ ލޯންޗް ފްލީޓްގެ ލޯންޗްތައް ބޭނުންކުރާނެ ކަމަށްވެސް މިނިސްޓަރ ވިދާޅުވިއެވެ.