ރަޝިޔާ އާއި ދެކޮޅަށް އަޅައިފައި ވާ ފިޔަވަޅު ތައް ޖީ7 އިން ހަރުކަށި ކުރަން ނިންމައިފި

ގްރޫޕް އޮފް 7 ގެ މެންބަރުންގެ ގައުމު ތަކުން ވަނީ ރަޝިޔާ އާއި ޔޫކްރެއިނުގައި ފަށާފައިވާ ހަނގުރާމައާ ގުޅިގެން އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކުރަން ނިންމާފައެވެ.

ޖަޕާނުގެ ހިރޮޝީމާގައި ކުރިއަށްދާ އެ އިއްތިހާދުގެ އިސްވެރިންގެ ސަމިޓުުގައި ވަނީ މިގޮތަށް އަމަލު ކުރަން ނިންމާފައެވެ. މި ބައްދަލުވުމުގައި ބައިވެރިވެ ވަޑައިގެންނެވުމަށް ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވެސް ވަނީ ޖަޕާނަށް ވަޑައިގަންނަވާފައެވެ.

ރަޝިޔާ އާއި ދެކޮޅަށް ހުޅަނގު ގެ ގައުމުތަކުން އަޅާފައިވާ ފިޔަވަޅުތައް އިތުރަށް ހަރުކަށި ކުރުމުގެ ގޮތުން އެ ޤައުމަށް އެކްސްޕޯޓު ކުރާ މުދަލުގެ ޢަދަދު މަދު ކުރަން ޖީ7ގެ ޤައުމުތަކުން ވަނީ އެއްބަސްވެފައެވެ. އެގޮތުން އެ ޤައުމުގެ އަސްކަރިއްޔާ ކުރިއަރުވައި ހަތިޔާރު އުފައްދަން ބޭނުންކުރާ ސާމާނާއި، ސިނާޢީ އަދި ޓެކްނޮލޮޖީގެ ދާއިރާގެ އުފެއްދުންތަކަށް ބޭނުންވާ ސާމާނު އެކްސްޕޯޓު ކުރުން މަދުކުރުމަށް ނިންމާފައިވެއެވެ. އަދި މައުދަން ތައް ބޭރު ކުރުން ހުއަޓުވުމަށް ވެސް ފިޔަވަޅު އެޅުމަށް ވަނީ ނިންމާފައެވެ.

ޖީ7ގައި ހިމެނެނީ އެމެރިކާ، ޖަޕާން، ޖަރުމަނުވިލާތް، އިނގިރޭސިވިލާތް، ފަރަންސޭސިވިލާތް، ކެނެޑާ އަދި އިޓަލީވިލާތެވެ. ޖީ7 ގެ މެންބަރު ޤައުމުތަކުގެ އިތުރުން މި އަހަރުގެ ސަމިޓުގައި އޮސްޓްރޭލިޔާ، ބްރެޒިލް، ކޮމޮރޯސް، ކޫކް އައިލެންޑްސް، އިންޑިޔާ އަދި އިންޑޮނީޝިޔާގެ އިތުރުން ދެކުނު ކޮރެޔާއާއި ވިއެޓްނާމްގެ އިސްވެރިން ވެސް ބައިވެރިވެ ވަޑައިގަންނަވައެވެ.

3 ދުވަހަށް ކުރިޔަށް ދާ މި ބައްދަލުވުން ހިރޮޝީމާގައި ބާއްވަން ނިންމާފައި ވަނީ، ހަތިޔާރުގެ ވިޔަފާރި ހުއްޓުވަން ކުރަމުންދާ މަސައްކަތްތަކަށް ބާރުދިނުމުގެ ގޮތުން ކަމުގައި ޖަޕާނުގެ ބޮޑުވަޒީރު ފުމިޔޯ ކިޝިޑާ ވިދާޅުވެއެވެ.