ރޯދަމަހު މާލެ ސަރަހައްދުން ކުނި ނަގާ ވަގުތު ބަދަލުކުރަނީ

ރަމަޝޯން މަހުގައި މާލެ ސަރަހައްދުން ކުނި ނަގާ ވަތުތައް ބަދަލު ގެނައުމަށް ނިންމާފައި ވާކަމަށް ވޭސްޓް މެނޭޖްމަންޓް ކޯޕަރޭޝަން ވެމްކޯއިން ބުނެފި އެވެ.

ވެމްކޯއިން ނިންމާފައި ވަނީ މިހިނގާ ފެބްރުއަރީމަހުގެ 8 ވަނަ ދުވަހުން ފެށިގެން މާލެއާއި ހުޅުމާލޭގައި ގޭބިސީތަކުން ކުނި ނަގާ ވަގުތުތަކަށް ބަދަލު ގެނެއުމަށެވެ. އަދި ވިލިމާލޭގައި ކުނިނަގާ ވަގުތަށް ބަދަލު ގެންނަނީ މުލަ ރޯދަދުވަހުން ފެށިގެންނެވެ.

މި ބަދަލު ގެނެސްފައި ވަނީ ގްރޭޓަރ މާލޭ ސަރަހައްދުގައި ހިމެނޭ، މާލެ، ހުޅުމާލެ އަދި ވިލިމާލޭގައި ގޭބިސީތަކުން އެކަނި އެވެ.

ވެމްކޯއިން ބުނީ، މާލޭގައި 8 ފެބްރުއަރީން ފެށިގެން 6 ރޯދަ ނިމެންދެން، ގޭބިސީތަކުން ކުނިނަގާނީ ރޭގަނޑު 8:30 އިން ފެށިގެން މެންދަމު 2:00އާ ދޭތެރޭގައި ކަމަށެވެ. އަދި ހުޅުމާލޭގައި 8 ފެބްރުއަރީން ފެށިގެން 6 ރޯދަ ނިމެންދެން، ގޭބިސީތަކުން ކުނިނަގާނީ ރޭގަނޑު 9:00 އިން ފެށިގެން މެންދަމު 2:30އާ ދޭތެރޭގައި ކަމަށެވެ.

މީގެ އިތުރުން ވިލިމާލޭގައި މުލަރޯދައިން ފެށިގެން 6 ރޯދަ ނިމެންދެން، ގޭބިސީތަކުން ކުނިނަގާނީ ރޭގަނޑު 9:00 އިން ފެށިގެން މެންދަމު 1:00އާ ދޭތެރޭގައި ކަމަށެވެ.