ސައިބަރ ސެކިއުރިޓީގެ ބިލަށް ޚިޔާލު ހުށަހެޅުން ޖުލައި މަހުގެ 1 ވަނަ ދުވަހުގެ ނިޔަލަށް!

ސައިބަރ ސެކިއުރިޓީގެ ބިލަށް އާންމުންގެ ޚިޔާލު ހޯދުމުގެ ފުރުސަތު ރައްޔިތުންގެ މަޖިލީހުން މިއަދު ހުޅުވާލައިފިއެވެ.

މި ބިލަށް ޚިޔާލު ހުށަހެޅުމުގެ މުއްދަތު މި މަހުގެ 17 އިން ފެށިގެން އަންނަ ޖުލައި މަހުގެ 1 ވަނަ ދުވަހުގެ މެންދުރުފަހު 14:00 އާ ހަމައަށް ވަނީ ހަމަޖައްސާފައެވެ. ސަރުކާރުގެ ފަރާތުން މެދުހެންވޭރު ދާއިރާގެ މެންބަރު ޙުސައިން ނާޞިޙު ހުށަހެޅުއްވި މި ބިލު މަޖިލީހަށް ބަލައިގަނެފައިވަނީ މި މަހުގެ 17 ވަނަ ދުވަހުއެވެ.

މި ބިލުގެ މައިގަނޑު މަޤްޞަދަކީ ދިވެހިރާއްޖޭގެ ސައިބަރ ވެށީގެ ރައްކާތެރިކަން ކަށަވަރުކުރުމަށްޓަކައި ހަރުދަނާ ޤާނޫނީ އޮނިގަނޑެއް ބިނާކުރުމެވެ. ބިލުގައި ބަޔާންކޮށްފައިވާ ގޮތުން، ސައިބަރ ސެކިއުރިޓީގެ ވަކި ޚާއްޞަ ޚިދުމަތްތަކެއް ފޯރުކޮށްދޭ ފަރާތްތަކުން ކަނޑައެޅިފައިވާ ލައިސަންސެއް ހޯދަންޖެހޭނެއެވެ. އަދި ލައިސަންސް ނެތި މިފަދަ ޚިދުމަތެއް ފޯރުކޮށްދޭ ފަރާތްތައް 50,000 ރުފިޔާ އާއި 500,000 ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރު މި ޤާނޫނުގެ ދަށުން ލިބިދެއެވެ.

މީގެ އިތުރުން، ރާއްޖޭގެ ސައިބަރ ސެކިއުރިޓީއާ ގުޅުންހުރި ކަންކަން ވިލަރެސްކުރުމަށް "ނޭޝަނަލް ސައިބަރ ސެކިއުރިޓީ އެޖެންސީ" ގެ ނަމުގައި ރަސްމީ އިދާރާއެއް އުފެއްދުމަށް ބިލުގައި ވަނީ ހިމަނާފައެވެ. މި އެޖެންސީގެ އިރުޝާދުގެ ދަށުން، ރާއްޖޭގެ ސައިބަރ ސެކިއުރިޓީ ސިޔާސަތުތައް ކަނޑައަޅާނީ ޤައުމީ ސަލާމަތާބެހޭ މަޖިލީހުންނެވެ.

މި ބިލުގެ ދަށުން ޤައުމީ ފެންވަރުގައި ސައިބަރ ސެކިއުރިޓީގެ މިންގަނޑުތައް އެކުލަވާލައި، ދައުލަތުގެ އިދާރާތަކާއި އަމިއްލަ މުއައްސަސާތަކުގެ އިންފޮމޭޝަން ސިސްޓަމްތަކާއި އުމްރާނީ ވަސީލަތްތަކުގެ ރައްކާތެރިކަން ކަށަވަރުކުރާނެއެވެ. ހަމައެއާއެކު، ރާއްޖެއާއި ރާއްޖޭއިން ބޭރުން ކުރިމަތިވެދާނެ ސައިބަރ ނުރައްކާތައް ދެނެގަނެ، އެފަދަ ހާދިސާތަކުން ދިފާޢުވުމަށާއި، އަވަސް އިޖާބައެއް ދެވޭނެ ފަދަ ހަރުދަނާ ނިޒާމެއް ބިލު ތަޞްދީޤުވުމާއެކު ޤާއިމުކުރެވިގެންދާނެއެވެ.