މަކަރާއި ހީލަތުގެ މައްސަލައެއްގައި ފުލުހެއްގެ ބައިވެރިވުމެއް ނެތް: ޕޮލިސް

ދިވެހި ފުލުހުންގެ ޚިދުމަތަށް ހުށަހެޅުނު މަކަރާއި ހީލަތުގެ މައްސަލައެއްގައި ފުލުހެއްގެ ބައިވެރިވުމެއް ނެތްކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން ނެރުނު ނޫސް ބަޔާނެއްގައި ބުނީ މިދިޔަ ހޯމަ ދުވަހު އެ އިދާރާއަށް ހުށަހެޅުނު މަކަރާއި ހީލަތުގެ މައްސަލައަކީ މީހެއްގެ ވައިބަރ އެކައުންޓް ކޮމްޕްރޮމައިޒް ކޮށްގެން އެމީހާގެ ދަންނަ މީހުންނަށް މެސެޖްކޮށް އޮޅުވާލައިގެން ފައިސާ ހޯދާފައިވާ މައްސަލައެއް ކަމަށެވެ.

ފުލުހުން ބުނީ މި މައްސަލައާ ގުޅޭ އިތުރު 3 މައްސަލައެއް ތަހުގީގު ކުރަމުން ގެންދާ ކަމަށެވެ.

މީގެއިތުރުން ފުލުހުން ބުނީ މިމައްސަލަ ހުށަހެޅުމާއެކު ތަހުގީގުގެ ތެރެއިން އަޅަންޖެހޭ ފިޔަވަޅުތައް އަޅައި ވައިބަރ އެކައުންޓް ރިކަވަރކޮށް، އެ އެކައުންޓްގެ ވެރިފަރާތުގެ ބާރުގެ ދަށަށް އެ އެކައުންޓް ގެނެވިފައިވާ ކަމަށެވެ. އަދި، ތަފާތު 3 މީހެއްގެ އަތުން އޮޅުވާލައިގެން ހޯދި ޖުމުލަ 10،100 ރުފިޔާ، އީމެއިލް އަދި ބޭންކް އެކަުންޓް ކޮމްޕްރޮމައިޒް ވެފައިވާ އެކައުންޓަށް ޖަމާކޮށްފައިވާ ކަމަށެވެ.

އެގޮތުން، މިފައިސާގެ ތެރެއިން 5600 ރުފިޔާ، ފައިސާ ދައުރުވެފައިވާ އެކައުންޓްތަކުގެ ތެރެއިން އެކައުންޓެއްގައި ހޯލްޑް ކޮށްފައިވާ ކަމަށް ފުލުހުން މައުލޫމާތު ދެއެވެ.

ހަމަމިއާކު، ފުލުހުން ބުނީ މި މައްސަލައިގެ ތަހުގީގުގައި މިހާތަނަށް ފުލުހެއްގެ އެއްވެސް ބައިވެރިވުމެއް އަދި ތުހުމަތު ކުރެވިދާނެ އެއްވެސް ކަމެއް ފާހަގަކުރެވިފައެއް ނުވާ ކަމަށެވެ. އަދި މި މައްސަލައިގައި އޮޅުވާލައިގެން ހޯދި ފައިސާ ދައުރު ކުރުމުގައި ބޭނުންކުރި އެއް ބޭންކު އެކައުންޓަކީ ފުލުހެއްގެ އަނބިމީހާ ބޭންކް އެކައުންޓް ކަމުގައިވީ ނަމަވެސް، އެ އެކައުންޓަކީ އެ އަންހެން މީހާގެ އީމެއިލް އަދި ބޭން އެކައުންޓް ކޮމްޕްރޮމައިޒްކޮށްގެން އެހެން ބައެއްގެ ބާރުގެ ދަށަށް ގެންގޮސްފައިވާ އެކައުންޓެއްކަން ފުލުހުން ފާހަގަކުރިއެވެ.

ފުލުހުން ބުނީ މި މައްސަލައިގެ ތަހުގީގުގައި އެއްވެސް ހިސާބަކުން ފުލުހެއްގެ ބައިވެރިވުން މިކަމުގައި ފާހަގަކުރެވިއްޖެނަމަ އެ ފުލުހެއްގެ މައްސަލަ ބަލާނެ ކަމަށެވެ.

ފުލުހުން އިތުރަށް ބުނީ މި މައްސަލަ ދިވެހި ފުލުހުންގެ ޚިދުމަތުގެ އިކޮނޮމިކް ކްރައިމް އިން ގެންދަނީ ތަހުގީގު ކުރަމުން ކަމަށާއި މި މައްސަލައިގައި ހީލަތުން ހޯދާފައިވާ ފައިސާގެ ތެރެއިން ރިކަވަރ ނުކުރެވި ހުރި ފައިސާ ރިކަވަރ ކުރުމުގެ މަސައްކަތް ތަހުގީގުގެ ތެރެއިން ކުރަމުންދާ ކަމަށެވެ.

ފުލުހުން ބުނީ ދިވެހި ފުލުހުންގެޚިދުމަތުގެ ނަން ކިލަނބުވާގޮތަށް މީޑިއާގެ އެކި ވަސީލަތްތަކުގައި މައުލޫމާތު ފެތުރުމަކީ ކަންބޮޑުވާ ކަމެއް ކަމަށެވެ. އަދި އެގޮތަށް މައުލޫމާތު ނުފެތުރުމަށް ފުލުހުން ވަނީ އިލްތިމާސްކޮށްފައެވެ.