ސަމްޕާ ބެލެހެއްޓުމަށް ބޭނުންވާ ޓެކް ސާމާނު ހަވާލުކޮށްފި

ދެކުނު އަރިއަތޮޅުގެ ހިމާޔަތްކޮށްފައިވާ ކަނޑުގެ ސަރަޙައްދު (ސަންޕާ) ބެލެހެއްޓުމުގައި ތަޢާރަފުކުރާ ޒަމާނީ ޓެކްނޮލޮޖީގެ މަޝްރޫޢު ޓެކް 4 ނޭޗަރ މޯލްޑިވްސް ގެ މުހިއްމު މަރުޙަލާއެއް ކާމިޔާބުކަމާއެކު ނިންމާލައިފިއެވެ.

މި މަޝްރޫޢުގެ ދަށުން، އެ ސަރަޙައްދު މޮނިޓަރކޮށް ބެލެހެއްޓުމަށް ބޭނުންވާ ހާއްސަ އާލާތްތައް މިހާރު ވަނީ އެ ސަރަޙައްދުގެ ރޭންޖަރުންނާ ހަވާލުކޮށްފައެވެ.

އާލާތްތައް ހަވާލުކުރުމުގެ އިތުރުން، އެ ތަކެތި އޮޕަރޭޓްކުރާނެ ގޮތުގެ އަމަލީ ތަމްރީނުތައް ރޭންޖަރުންނަށް ދިނުމުގެ މަސައްކަތް މިހާރު ދަނީ ކުރަމުންނެވެ.

މިއީ ރޭންޖަރުން އައު ޓެކްނޮލޮޖީއަށް އަހުލުވެރިކުރުވައި، ފީލްޑް އޮޕަރޭޝަންތަކުގެ ފެންވަރު މަތިކުރުމަށް ކުރިއަށްގެންދާ މުހިންމު ތަމްރީނުތަކެކެވެ.

މި މަސައްކަތުގެ މައިގަނޑު އަމާޒަކީ ޒަމާނީ ޓެކްނޮލޮޖީގެ އެހީގައި ދެކުނު އަރިއަތޮޅުގެ ކަނޑުގެ ސަރަޙައްދު ބެލެހެއްޓުން އިތުރަށް ހަރުދަނާކުރުމެވެ.

މިކަމުގެ ސަބަބުން، ދުނިޔެއިން ހުސްވެދިއުމުގެ ބިރު އޮތް ފެހުރިހީގެ އާބާދީ ރައްކާތެރިކުރުމަށް ކުރެވޭ މަސައްކަތްތަކަށް އައު ދިރުމެއް ލިބި، ތިމާވެށި ހިމާޔަތްކުރުމުގެ މަސައްކަތްތައް އިތުރު ހަރުފަތަކަށް އުފުލިގެންދާނެއެވެ.

ޓެކް 4 ނޭޗަރ މަޝްރޫޢަކީ ހުއާވޭ (Huawei) ގެ މާލީ އެހީތެރިކަމާއެކު، އިންޓަރނޭޝަނަލް ޔޫނިއަން ފޯ ކޮންޒަވޭޝަން އޮފް ނޭޗަރ (އައިޔޫސީއެން) އާއި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ގުޅިގެން ކުރިއަށްގެންދާ ތިމާވެށީގެ މުހިންމު މަޝްރޫޢެކެވެ.