ހުސްވި ފެބްރުއަރީ މަހު 223 މިލިއަން ރުފިޔާގެ މުދާ އެކްސްޕޯރޓް ކޮށްފައިވޭ

ހުސްވި ފެބްރުއަރީ މަހު ރާއްޖެއިން އެކްސްޕޯޓު ކުރި މުދަލުގެ އަދަދު އިތުރުވެއްޖެކަމަށް ތަފާސް ހިސާބުތަކުން ދައްކައިފި އެވެ.

ކަސްޓަމްސްގެ ހިސާބުތަކުން ދައްކާ ގޮތުން މިދިޔަ މަހު ރާއްޖެއަށް އެކްސްޕޯޓުކޮށްފައި ވަނީ 223 މިލިއަން ރުފިޔާގެ މުދަލެވެ. އެއީ 2024 ވަނަ އަހަރުގެ ފެބްރުއަރީ މަހު ރާއްޖެއިން އެކްސްޕޯޓު ކުރި މުދަލުގެ އަދަދަށް ވުރެ 32 މިލިއަން ރުފިޔާ އިތުރު އަދަދެކެވެ.

އަދި އެއީ މިދިޔަ ޖެނުއަރީ މަހަށް ވުރެ އެއީ 82 މިލިއަން ރުފިޔާ އިތުރު އަދަދެއްވެސް މެއެވެ. 2024 ވަނަ އަހަރުގެ ފެބްރުއަރީ މަހު ރާއްޖެއިން އެކްސްޕޯޓު ކުރީ 191 މިލިއަން ރުފިޔާގެ މުދަލެވެ. އަދި ހަމަ މިދިޔަ އަހަރުގެ ޖެނުއަރީ މަހު ރާއްޖެއިން އެކްސްޕޯޓުކޮށްފައިވަނީ 141 މިލިއަން ރުފިޔާގެ މުދަލެވެ.

އެކްސްޕޯޓު އިތުރުވި އިރު މިދިޔަ މަހު ރާއްޖެއަށް 4.4 ބިލިއަން ރުފިޔާގެ މުދާ ވަނި އެތެރެކޮށްފަ އެވެ.

މިދިޔަ އަހަރުގެ ފެބްރުއަރީގައި ވެސް ރާއްޖެއަށް އެތެރެކުރީ 4.4 ބިލިއަން ރުފިޔާގެ މުދަލެވެ. ނަމަވެސް އެއީ މިދިޔަ ޖެނުއަރީ މަހާ އަޅާ ބަލާ އިރު ފެބްރުއަރީގައި ރާއްޖެއަށް އެތެރެ ކުރީ 800 މިލިއަން ރުފިޔާ ދަށް އަދަދެއްކަމަށްވެސް ހިސާބުތަކުން ބުނެއެވެ. މިދިޔަ ޖެނުއަރީ މަހު ރާއްޖެއަށް އެތެރެ ކުރި މުދަލުގެ މިންވަރު 5.2 ބިލިއަން ރުފިޔާއަށް އަރާ ކަމަށްވެސް ހިސާބުން ދައްކައެވެ.

މިދިޔަ މަހު ތެލާއި އެހެނިހެން ބާވަތްތަކާ އެކު 4.4 ބިލިއަން ރުފިޔާގެ މުދާ އެތެރެކުރި އިރު ތެލަށް އެކަނި 50 މިލިއަން ޑޮލަރު (762 މިލިއަން ރުފިޔާ) ވަނީ ހޭދަކޮށްފައެވެ. ކާބޯތަކެތީގެ އިމްޕޯޓު 968 މިލިއަން ރުފިޔާ އަރާ އިރު 751 މިލިއަން ރުފިޔާގެ އިލެކްޓްރޯނިކް ސާމާނު ރާއްޖެއަށް ގެނެސްފައިވެއެވެ. މިދިޔަ މަހު ރާއްޖެއަށް 329 މިލިއަން ރުފިޔާގެ ދަގަނޑު ވަނީ އެތެރެކޮށްފައެވެ.

މިދިޔަ މަހު 74 މިލިއަން ރުފިޔާގެ ހިލަ އާއި ހިލަވެލި އަދި ސިމެންތި ފަދަ ސާމާނު ގެނެސްފައިވާއިރު، 62 މިލިއަން ރުފިޔާގެ ރަލާއި ދުންފަތުގެ ބާވަތްތައް ގެނެސްފައިވާކަން ކަސްޓަމްސްގެ ހިސާބުތަކުން ދައްކައެވެ.

ކަސްޓަމްސްގެ ތަފާސްހިސާބުތައް ދައްކާގޮތުގައި މިދިޔަ މަހު އިމްޕޯޓު އެކްސްޕޯޓުން ދައުލަތަށް 266 މިލިއަން ރުފިޔާ ވަނީ ލިބިފައެވެ. އެއީ މިދިޔަ އަހަރުގެ ފެބްރުއަރީ މަހު އެކްސްޕޯޓު އިމްޕޯޓުން ދައުލަތަށް ލިބުނު އާމްދަނީއަށް 60 މިލިއަން ރުފިޔާ އިތުރު އަދަދެއްކަންވެސް ފާހަގަކުރެއެވެ.

ރާއްޖެއަށް އެތެރެކުރާ މުދަލުގެ 31 ޕަސެންޓު ގެންނަނީ ޔޫއޭއީންނެވެ. އިންޑިއާއިން 17 އިންސައްތަ މުދާ ގެންނަ އިރު ޗައިނާއިން 14 އިންސައްތަ މުދާ ރާއްޖެއަށް އެތެރެ ކުރެއެވެ. އޭގެ އިތުރުން އެތެރެކުރި މުދަލުގެ 8 އިންސައްތަ ނިސްބަތް ވަނީ ސިންގަޕޫރަށެވެ.

ރާއްޖެއިން އެކްސްޕޯޓުކުރާ މުދަލުގެ 60 އިންސައްތަ ފޮނުވަނީ ތައިލެންޑަށެވެ. އަދި 15އިންސައްތަ ފޮނުވަނީ އިނގިރޭސިވިލާތަށް ކަމަށްވެސް ކަސްޓަމްސްގެ ހިސާބުން ދައްކައެވެ.