އެމްޕީއެލްގެ އެމްޑީގެ މަޤާމަށް ރިޝްވާން އައްޔަން ކޮށްފި

‏މޯލްޑިވްސް ޕޯޓްސް ލިމިޓެޑްގެ މެނޭޖިން ޑިރެކްޓަރު ކަމުގެ މަޤާމަށާއި ބޯޑު ޑިރެކްޓަރު ކަމުގެ މަޤާމަށް ހ. ހަބަރުގެ، އަލްފާޟިލް މުޙައްމަދު ރިޝްވާނު، މިއަދު އައްޔަންކޮށްފިއެވެ.

މި މަޤާމަށް ރިޝްވާން މިއަދު އައްޔަނުކުރައްވާފައިވާކަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ވަނީ އަންގައިފައެވެ.

ޕީސީބީން ބުނީ، އެމްޕީއެލްގެ އެމްޑީ ކަމުގެ މަޤާމަށާއި ބޯޑު ޑިރެކްޓަރު ކަމުގެ މަޤާމަށް ހ. ހަބަރުގެ، މުހައްމަދު ރިޝްވާން މިއަދު އައްޔަން ކޮށްފައިވާ ކަމަށެވެ.

އެމްޕީއެލްގެ އެމްޑީ ކަމަށް ރިޝްވާން އައްޔަން ކޮށްފައިމިވަނީ ކުރިން އެމަޤާމުގައި ހުންނެވި މުހައްމަދު ވަޖީޙް އިބްރާހިމް މަޤާމުން ވަކިކުރުމާއި ގުޅިގެންނެވެ.

ރިޝްވާނަކީ މީގެ ކުރިން ސިފައިންގެ ވަޒީފާއާއި ފުލުހުންގެ ވަޒީފާގައި ގިނަ ދުވަސްތަކެއް ވަންދެން ޙިދުމަތްކުރައްވާފައިވާ ބޭފުޅެެކެވެ. ފުލުހުންގެ ޙިދުމަތުން 2012 ވަނަ އަހަރު ރިޝްވާން ރިޓަޔާ ކުރެއްވިއިރު ހުންނެވީ ޑެޕިއުޓީ ކޮމިޝަނާ އޮފް ޕޮލިސްގެ މަގާމުގައެވެ.

ރިޝްވާން ވަނީ ރައީސް ޔާމިން ސަރުކާރުގައި އައިޖީއެމްއެޗްގެ ޑެޕިއުޓީ ޗީފް އެގްޒެކެޓިވް އޮފިސަރުގެ މަޤާމުވެސް ފުރުއްވާފައެވެ.

އެމްޕީއެލްގެ ސީއީއޯ އަދި އެމްޑީގެ މަޤާމަށް ނޮވެމްބަރު 28، 2023 ގައި އައްޔަންކުރި ވަޖީހު ކުއްލި ގޮތަކަށް މަޤާމުން ވަކިކުރި ސަބަބެއް ޕްރައިވެޓައިޒޭޝަން ބޯޑަކުން ނުބުނެ އެވެ.