ރާއްޖެ އެތެރެކުރަން އުޅުނު 6 މިލިއަނަށް ވުރެ ގިނަ ރުފިޔާގެ ޑްރަގްސް އަތުލައިގެންފި

ރާއްޖެ އަށް އެތެރެކުރަން އުޅުނު ހަ މިލިއަނަށް ވުރެ ގިނަ ރުފިޔާގެ މަސްތުވާތަކެތި އަތުލައިގެންފި އެވެ.

މިތަކެތި އަތުލައިގެންފައި ވަނީ ކަނޑުމަގުން އެތެރެކުރަން އުޅެނިކޮށް މޯލްޑިވްސް ކަސްޓަމްސް ސާވިސް އިންނެވެ.

ކަސްޓަމްސް އިން ބުނީ އަތުލައިގެންފައިވާ ތަކެތީގެ ބާޒާރުމަތީ އަގަކީ 6.7 މިލިއަން ރުފިޔާ ކަމަށެވެ. އެއީ 3.5 ކިލޯގެ މަސްތުވާތަކެތި ކަމަށް ވެސް ބުނެފައިވެ އެވެ. އޭގެ ތެރޭގައި ހިމެނެނީ 2 ކިލޯ އަށް ވުރެ ގިނަ މެތަފެޓަމިން (މެތު) އާއި، 1 ކިލޯއަށް ވުރެ ގިނަ ކެޓަމިން އާއި 310 ގްރާމުގެ ހެރޮއިން އެވެ.

ކަސްޓަމްސް އިން މި ތަކެތި އަތުލައިގެންފައި ވަނީ އިއްޔެގަ އެވެ.

ދާދި ފަހުން ވެސް ކަނޑުމަގުން ރާއްޖެ އެތެރެކުރަން އުޅުނު މަސްތުވާތަކެތި އަތުލައިގެންފައިވެ އެވެ. އެގޮތުން އިންޑިއާގެ ޓެމިލްނާޑޫގެ ޓުޓިކޮރިންއިން ކަނޑުމަގުން ރާއްޖެއަށް އެތެރެކުރަން އުޅުނު 30 ކިލޯގެ މަސްތުވާތަކެތި މި މަހުގެ 9 ވަނަ ދުވަހު އަތުލައިގެންފައިވާއިރު، ޕޯސްޓު މެދުވެރިކޮށް ރާއްޖެއަށް އެތެރެކުރަން އުޅުނު 1 ކިލޯއަށް ވުރެ ގިނަ މަސްތުވާތަކެތި ވެސް ހަމަ މިދިޔަ ހަފްތާ ތެރޭގައި އަތުލައިގެންފައިވެ އެވެ.