ރާއްޖޭގެ ވެރިކަމުގެ ނިޒާމުގެ ތެރޭގައި ހުރި ނުރަގަޅު ކަންކަން ރަގަޅުކުރާނީ އެމްޑީޕީން: ފައްޔާޒް

ރާއްޖޭގެ ވެރިކަމުގެ ނިޒާމުގެ ތެރޭގައި ހުރި ނުރަނގަޅު ހުރިހައި ކަމެއް ރަގަޅު ކުރައްވާނީ އެމްޑީޕީން ކަމަށް އެޕާޓީގެ ކުރީގެ ޗެއާޕާސަން އަދި އެމްޑީޕީގެ ބޮޑު ބަދަލުގެ އެންމެ އިސް މޭސްތިރިޔާ ފައްޔާޒް އިސްމާއީލް ވިދާޅުވެއްޖެ އެވެ.

އެމްޑީޕީން ގެންނަން ބޭނުންވާ ބަދަލުތަކާއި، އަދި ވަކިން ހާއްސަ ކޮށް މުޅި ރާއްޖެއަށް ގެންނަން ޖެހޭ މުހިންމު ބޮޑެތި ބަދަލުތަކެއް ފައްޔާޒްގެ ހުށައެޅުމާއެކު އެމްޑީޕީން ބޭއްވި ކޮންގްރެސްގެ ތެރެއިން ވަނީ ބައިވެރިވި މެންބަރުންގެ ސުޕަ މެޖޯރިޓީން ފާސްކޮށްފަ އެވެ.

ބޮޑު ބަދަލު ގެނައުމަށް ފާސްކުރުމަށްފަހު ކޮންގްރެސްގެ ނިންމުމުގެ ޖަލްސާގައި ވާހަކަފުޅު ދައްކަވަމުން ފައްޔާޒް ވިދާޅުވީ އަނިޔާވެރިކަމާއި ހުދުމުހުތާރުކަމާއި ދިވެހި ރައްޔިތުންނާ ދެމެދު އޮންނަ އައްޑަނައަކީ އަބަދުވެސް އިދިކޮޅު އެމްޑީޕީ ކަމަށެވެ. އަދި ރައްޔިތުންގެ ހައްގުތައް ދިފާއު ކުރުމުގައި އެމްޑީޕީ އިން ފަހަތަށް ނުޖެހޭނެ ކަމުގެ ޔަގީންކަން ވެސް ފައްޔާޒް ދެއްވި އެވެ.

މި ސަރުކާރުން ތިން ބާރު މަސްހުނިކޮށް، ހުދުމުހުތާރުކަން އިސްކޮށްފައިވާ ކަމަށް އެމްޑީޕީގެ ފަސް ވަނަ ކޮންގްރެސް ނިންމުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ކުރީގެ އިކޮނޮމިކް މިނިސްޓަރު އަދި އެމްޑީޕީގެ ރިޔާސީ ރޭހުގައި ވާދަ ކުރައްވަން ނިންމަވާފައިވާ ފައްޔާޒް ވިދާޅުވި އެވެ.

ބޮޑު ބަދަލު ކަރުދާހުގައި ހިމެނޭ އެންމެ ބޮޑު ބަދަލަކީ، ދައުލަތުގެ ވެރިޔަކާއި ސަރުކާރުގެ ވެރިޔަކު އިންތިހާބު ކުރުމެވެ. އެ ކަރުދާހުގައިވާ ގޮތުން، ސަރުކާރުގެ ވެރިޔާ އިންތިހާބު ކުރާނީ ރައްޔިތުންގެ ސީދާ ވޯޓަކުންނެވެ. އަދި ދައުލަތުގެ ވެރިޔާ އިންތިހާބު ކުރާނީ މަޖިލީހާއި ކައުންސިލްތަކުން ނަގާ ވޯޓަކުންނެވެ.

މި ކަރުދާސް ފާސްވުމާ ގުޅިގެން ޕާޓީގެ ލީޑަޝިޕުން ވަނީ ކޮންގްރެސްގެ ހުރިހާ މަންދޫބުންނަށް ޝުކުރު އަދާކުރައްވާފައެވެ. އެގޮތުން، އެމްޑީޕީ "ބޮޑު ބަދަލު" ސިޔާސަތު ކަރުދާސް ފާސްކުރުމަށް ވޯޓު ދެއްވި އެންމެހާ ކޮންގްރެސް ޑެލިގޭޓުންނަށް އެ ޕާޓީގެ ކުރީގެ ޗެއަރޕާސަން ފައްޔާޒް އިސްމާއީލް ވަނީ ވަރަށް ބޮޑަށް ޝުކުރު އަދާކުރައްވާފައެވެ.

ފައްޔާޒް ވިދާޅުވީ މިއަދު ނިމިގެން މިދިޔައީ މި ބޮޑު މަސައްކަތުގެ ފުރަތަމަ މަރުހަލާ ކަމަށެވެ. އަދި މާތް ﷲ ގެ ވާގިފުޅާއެކު އަނެއްކާ ވެސް އެމްޑީޕީން މި ރާއްޖެއަށް ހެޔޮ އަދި ބޮޑު ބަދަލެއް ގެނެސްދޭނެ ކަމުގެ ފުރިހަމަ ޔަޤީންކަން ޕާޓީގެ މެންބަރުންނަށާއި ދިވެހި ރައްޔިތުންނަށް ވެސް ވަނީ ދެއްވާފައެވެ.