ޣައްޒާގެ ސަރަހައްދުތަކަށް އިސްރާއީލުން ދިން ހަމަލާތަކެއްގައި ދެ މީހަކު ޝަހީދުވެ، 10 މީހަކު ޒަޚަމްވެއްޖެ

ޣައްޒާގެ މެދުތެރޭގައި ހިމެނޭ ދައިރުލް ބަލަޙްގެ ދެކުނަށް އިސްރާއީލުން ދިން ހަމަލާތަކެއްގައި ފަލަސްތީނުގެ އަންހެން ކުއްޖަކާއި ޒުވާނަކު ޝަހީދުވެ، އިތުރު 10 މީހުން ޒަޚަމްވެއްޖެއެވެ.

ޞިއްޙީ މަޞްދަރުތަކުން މައުލޫމާތު ދޭ ގޮތުގައި، ދައިރުލް ބަލަޙްގެ ދެކުނުން އޮންނަ ވަދީ އަލްސަލްޤާގައި ހުރި އާއިލާގެ ފޭލިގެ ތެރޭގައި ހުއްޓައި އިސްރާއީލް ސިފައިން ބަޑިޖެހުމުގެ ސަބަބުން ލިބުނު އަނިޔާތަކަށް ފަރުވާދެމުން ދަނިކޮށް، އުމުރުން ހަ އަހަރުގެ އަންހެން ކުއްޖަކު ވަނީ ޝަހީދުވެފައެވެ.

މީގެ އިތުރުން، އަލްހައުޒް ސަރަޙައްދުގައި ދަތުރުކުރި އުޅަނދަކަށް އިސްރާއީލުގެ ޑްރޯން ހަމަލާއެއް އަމާޒުވުމުގެ ސަބަބުން ފަލަސްތީނުގެ ޒުވާނަކު ވަނީ ޝަހީދުވެފައެވެ.

ޣައްޒާ ސިޓީގެ ހުޅަނގު އުތުރުގައި އޮންނަ ޝެއިޚް ރަޟްވާން އަވަށުގެ އިންޖިނިއާސް ސިންޑިކޭޓް ކައިރިއަށް އިސްރާއީލުން ދިން ވައިގެ ހަމަލާއެއްގައި ބަޔަކު ޒަޚަމްވެފައިވާއިރު، އިސްރާއީލުގެ ކަނޑުގެ ސިފައިންގެ އުޅަނދުފަހަރުން ވަނީ އެ ސިޓީގެ އައްސޭރިފަށަށް ބަޑީގެ ހަމަލާތަކެއް ދީފައެވެ.

އިސްރާއީލުގެ އިސްތިއުމާރީ ސިފައިން ދަނީ ޣައްޒާގެ ދެކުނުން ޚާން ޔޫނިސްގެ އަލްމަވާސީ ސަރަޙައްދުގައި ހުރި ފޭލިގެތަކަށާއި، ޚާން ޔޫނިސްގެ އުތުރުން ހަމަދު ސިޓީގެ އިރުމައްޗަށާއި، އަލްޤަރާރާގެ އިރުމަތީ ފަރާތުގެ އިތުރުން ޝެއިޚް ނާޞިރު އަވަށަށް މެދުނުކެނޑި ބަޑީގެ ހަމަލާތައް ދެމުންނެވެ.

2025 އޮކްޓޫބަރު 11 ގައި ހަނގުރާމަ ހުއްޓާލުމަށް އެއްބަސްވި ފަހުން މިހާތަނަށް ޝަހީދުވި ފަލަސްތީނު މީހުންގެ އަދަދު ވަނީ 1,446 އަށް އަރާފައެވެ. އަދި 5,060 އަށްވުރެ ގިނަ މީހުން ޒަޚަމްވެފައިވާއިރު، އެ މުއްދަތުގެ ތެރޭގައި 835 މީހެއްގެ ހަށިގަނޑު ވަނީ ފެނިފައެވެ.