ފުލައި ދުބާއީ ބޯޓު ވައްޓާލަން އުޅުނު މައްސަލައިގައި ދުބާއީން ދެ ދިވެއްސަކާއި ސުވާލުކޮށްފި!

ދުބާއީން ފުރައިގެން އިޒްރޭލަށް މިދިޔަ ބުދަ ދުވަހު ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި، އެ އެއާލައިންގައި މަސައްކަތްކުރާ ދެ ދިވެހީން ޔޫނައިޓެޑް އަރަބް އެމިރޭޓްސް (ޔޫއޭއީ) އިން ރޭ ހައްޔަރުކޮށްފިއެވެ.

ފުލައި ދުބާއީ އެއާލައިނުގައި މަސައްކަތް ކުރާ ދެ ދިވެއްސަކު މި މައްސަލަ އާއި ގުޅިގެން ހައްޔަރުކޮށްފައިވާ ކަމަށް ސަރުކާރުގެ އިސް ތަރުޖަމާން މުހައްމަދު ހުސެއިން ޝަރީފް މުންދު ވެސް ވަނީ މީޑިޔާ ތަކަށް ކަށަވަރުކޮށްދެއްވާފަ އެވެ.

ނަމަވެސް އެ ދިވެހީންނާ، ފްލައިދުބާއީގެ ފްލައިޓް ވައްޓާލަން އުޅުނު މައްސަލައާ އޮތް ގުޅުމެއް އަދި ޔަގީންނުވާ ކަމަށާއި، އެ މީހުންނަކީ އެއްވެސް ކުށެއް ކުރިކަމަށް ބެލެވޭ ނުވަތަ ކޮން ތުހުމަތެއްގައި ހައްޔަރުކުރި ބައެއްކަން އަދި ޔަގީންނުވާކަމަށް ތަރުޖަމާނު ވިދާޅުވިއެވެ.

މިދިޔަ ބުދަ ދުވަހު މި ހާދިސާ ހިނގީ 174 ފަސިންޖަރުންނާއި އަށް ކުރޫންނާއެކު ދުބާއީން އިޒްރޭލުގެ ތެލް އަވީވްއަށް ދަތުރުކުރި ފްލައިދުބާއީގެ ބޯޓެއްގައެވެ.

ފްލައިޓް ޓްރެކިން ޑޭޓާތަކުން ދައްކާ ގޮތުގައި، ބޯޓުން ފުރަތަމަ 7700 ގެ އިމަޖެންސީ ކޯޑު ފޮނުވުމަށްފަހު، އޭގެ ހަތް މިނެޓު ފަހުން ވަނީ ހައިޖެކްކުރުން ނުވަތަ ގަވާއިދާ ޚިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވާފައެވެ. އަދި ގާތްގަނޑަކަށް 29 ސިކުންތުގެ ތެރޭގައި ބޯޓު ވަނީ 14،000 ފޫޓު ތިރިކޮށްފައެވެ.

އޭގެ ފަހުން އިސްރާއީލުން ވަނީ ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ހައިޖެކްކޮށްގެން ނޫން ކަމަށާއި، އެއީ ސަލާމަތީ ނުރައްކަލެއް އޮތް ކަމެއް ނޫން ކަމަށް ބުނެފައެވެ.