އެމްޑީޕީގެ ގައުމީ މަޖިލިސް އިންތިހާބު ނޮވެމްބަރު 27 ގައި ބާއްވަން ނިންމައިފި

އެމްޑީޕީގެ ގައުމީ މަޖިލިސް އިންތިހާބު ނޮވެމްބަރު 27 ގައި ބާއްވަން ނިންމައިފިއެވެ.

އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވަނީ ގައުމީ މަޖިލީހުގެ އިންތިހާބު ނޮވެމްބަރ 27 ގައި ބާއްވަން ނިންމާފައިވާކަން އިއުލާނު ކުރައްވާފައެވެ.

އެމްޑީޕީގެ ސިޔާސަތުތައް ކަނޑައެޅުމާއި މުހިއްމު ނިންމުންތައް ނިންމުމުގެ އިތުރުން، ކޮންގްރެސްގެ ދައުރުތަކުގެ މެދުތެރޭގައި ޕާޓީ ހިންގުމުގެ އެންމެ އިސް ދައުރެއް އަދާކުރަނީ ގައުމީ މަޖިލީހުންނެވެ.

މި މަޖިލިސް އެކުލެވިގެންވަނީ ޕާޓީގެ ދާއިރާތަކުގެ ޢާންމު މެންބަރުންގެ ސީދާ ވޯޓުން އިންތިޚާބުކުރެވޭ މަންދޫބުންގެ މައްޗަށެވެ.

މި ހިނގާ މަހުގެ 1 ވަނަ ދުވަހު ފެށި އެމްޑީޕީގެ 5 ވަނަ ކޮންގްރެސް ރޭ ނިންމައިލާފައިވާއިރު، މި ކޮންގްރެސްއިން ވަނީ ޕާޓީގެ އަސާސީ ގަވާއިދަށް ބޮޑެތި އިސްލާހުތަކެއް ގެނެސްފައެވެ.

ކޮންގްރެސް އިން އަސާސީ ގަވާއިދަށް ގެނެވުނު އިސްލާޙުތަކާއެކު ޕާޓީގެ ހިންގުން އިތުރަށް ހަރުދަނާވެ އެކަތި ގަނޑެއްގެ ގޮތުގައި ކުރިއަށްދާން މަގުފަހިވެގެންދާނެ ކަމަށް ކޮންގްރެސްގައި ވާހަކަފުޅު ދެއްކެވި ޕާޓީގެ އިސްފަރާތްތަކުން ވަނީ ފާހަގަކުރައްވާފައެވެ.

އެމްޑީޕީގެ ކޮންގްރެސް ކުރިއަށް ދިޔައީ މި އޮކްޓޯބަރު މަހުގެ 1 ވަނަ ދުވަހުން 3 ވަނަ ދުވަހުގެ ނިޔަލަށެވެ.