ވަކި ލިމިޓެއްނެތި އަމިއްލަ އުޅަނދުތަކުގައި ގާކުނޑި އުކާލެވޭނެ އިންތިޒާމް ވެމްކޯ އިން ހަމަޖައްސައިފި

އަމިއްލަ އުޅަނދުފަހަރުގައި އެއްވެސް ލިމިޓެއް ނެތި އިމާރާތްކުރުމަށް ބޭނުންކުރާ ސާމާނުގެ ކުނި ނުވަތަ ގާކުނޑި (ސީއެންޑީ ވޭސްޓް) އުކާލެވޭނެ ފުރުސަތު ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ހުޅުވާލައިފިއެވެ.

މާލެ އާއި ހުޅުމާލޭގައި ދިރިއުޅޭ ފަރާތްތަކަށް ގާކުނޑި އުކާލުމުގައި ކުރިމަތިވަމުންދިޔަ ދަތިތަކާ ގުޅިގެން މީގެކުރިން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.

މީގެ ކުރިން ސީއެންޑީ ވޭސްޓް އުކާލުމުގެ ފުރުސަތު ދެމުން އައީ ވެމްކޯގެ އަމިއްލަ ވަސީލަތްތައް މެދުވެރިކޮށެވެ.

ވެމްކޯ އިން ހާމަކުރި ގޮތުގައި، މި ހިދުމަތް މިހާރަށްވުރެ އަވަސް އަދި ލުއިފަސޭހަ ގޮތެއްގައި ރައްޔިތުންނަށް ފޯރުކޮށްދިނުމުގެ މަގުސަދުގައި، އަމިއްލަ އުޅަނދުތަކުގައި އެ ކޯޕަރޭޝަނުގެ މާލެ އަދި ހުޅުމާލޭގެ ރިސޯސް ރިކަވަރީ ފެސިލިޓީތަކަށް ގާކުނޑި ގެންގޮސްގެން، އެއްވެސް ހިފެހެއްޓުމެއް ނެތި އުކާލެވޭނެ އިންތިޒާމު އޮކްޓޯބަރު މަހުގެ4 ވަނަ ދުވަހުން ފެށިގެން ވަނީ ހަމަޖައްސާފައެވެ.

އެހެންނަމަވެސް، މިގޮތަށް ގެންނަ ކުނި ހުންނަންވާނީ ކަނޑައެޅިފައިވާ އުސޫލުތަކާ އެއްގޮތަށް ބާވަތްތައް ވަކިކޮށްފައި ކަމަށް ވެމްކޯ އިން ވަނީ ބުނެފައެވެ.

ވެމްކޯ އިން މިހާރު އަންނަނީ މާލެ ސަރަހައްދުގެ އިތުރުން ރާއްޖޭގެ ގިނަ ރަށްތަކެއްގައި ކުނި މެނޭޖްކުރުމުގެ ހިދުމަތް ފުޅާ ދާއިރާއެއްގައި ދެމުންނެވެ.

އާންމު ކުނި އުކުމުގެ އިތުރުން، ފަތުރުވެރިކަމުގެ ދާއިރާގެ ރިސޯޓުތަކުން ކުނި ނެގުމާއި، ސާފުކުރުމުގެ އެކި ހިދުމަތްތައް ވެސް އެ ކުންފުނީގެ މުވައްޒަފުން މެދުވެރިކޮށް ދަނީ ފޯރުކޮށްދެމުންނެވެ.