ސެޕްޓެންބަރު މަހު ކިރުވި މަހަށް މިފްކޯއިން 27 މިލިއަން ރުފިޔާ ދޫކޮށްފި

މިދިޔަ ސެޕްޓެންބަރު މަހުގެ ތެރޭގައި މިފްކޯއަށް ކިރުވި މަހަށް މަސްވެރިންނަށް 27 މިލިއަނަށްވުރެ ގިނަ ރުފިޔާ ދޫކޮށްފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހާމަކޮށްފިއެވެ.

މިފްކޯއިން އާންމުކޮށްފައިވާ ތަފާސްހިސާބުތައް ދައްކާގޮތުން ނިމިދިޔަ ސެޕްޓެންބަރު މަހު ޖުމްލަ 453 ދޯންޏަކުން ވަނީ 1،288 ޓަނުގެ މަސް އެ ކުންފުންޏަށް ކިރުވާފައެވެ. އަދި މި މަހަށް މަސްވެރިންނަށް ޖުމްލަ 27,323,275 (ހަތާވީސް މިލިއަން ތިންސަތޭކަ ތޭވީސް ހާސް ދުއިސައްތަ ހަތްދިހަ ފަސް) ރުފިޔާ ވަނީ ދޫކޮށްފައެވެ. މިފްކޯއަށް ކިރުވި މަހުގެ ބޮޑު ބައެއް ހިއްސާކުރަނީ ކަޅުބިލަމަހާއި ކަންނެއްޔެވެ.

ތަފާސްހިސާބުތަކަށް ބަލާއިރު، ސެޕްޓެންބަރު މަހު 451 ދޯންޏަކުން 1،281 ޓަނުގެ ކަޅުބިލަމަސް ކިރުވާފައިވާއިރު، އެ މަހަށް 27,226,555 (ހަތާވީސް މިލިއަން ދުއިސައްތަ ސައްބީސް ހާސް ފަސްސަތޭކަ ފަންސާސް ފަސް) ރުފިޔާ ވަނީ ދޫކޮށްފައެވެ. މީގެއިތުރުން 10 ކިލޯއިން މަތީގެ ކަންނެލީގެ ގޮތުގައި އެއް ދޯންޏަކުން 0.5 ޓަނުގެ މަސް ކިރުވައި، 900 ރުފިޔާ ދޫކޮށްފައިވެއެވެ. އަދި 15 ކިލޯއިން މަތީގެ ކަންނެލީގެ ގޮތުގައި 5 ދޯންޏަކުން 3.8 ޓަނުގެ މަސް ކިރުވާފައިވާއިރު، އެ މަހަށް 95,825 (ނުވަދިހަ ފަސްހާސް އައްސަތޭކަ ފަންސަވީސް) ރުފިޔާ ވަނީ ދޫކޮށްފައެވެ.

ރާއްޖޭގެ މަސްވެރިކަމުގެ ސިނާޢަތް އިތުރަށް ތަރައްޤީކޮށް ފުޅާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ ބޮޑު އިސްކަމެއް ދެއްވައިގެން ކުރިއަށްގެންދަވާ އެއް މަސައްކަތެވެ. ސަރުކާރުގެ މައިގަނޑު އަމާޒަކީ ދިވެހިރާއްޖޭގެ އިޤްތިޞާދު ސިންދަފާތުކޮށް، މަސްވެރިކަމަކީ ޤައުމަށް އެންމެ ބޮޑު އާމްދަނީއެއް ވަންނަ އެއް ސިނާޢަތަށް ހެދުމެވެ.

މި އަމާޒަށް ވާސިލުވުމަށްޓަކައި ސަރުކާރުން މިހާރު ވަނީ މަސްވެރިންނަށް ގިނަ ލުއިފަސޭހަތަކެއް ހަމަޖައްސައިދީފައެވެ. އެގޮތުން، މަސްވެރިން ބާނާ މަހަށް ކިރުވާތާ 48 ގަޑިއިރުގެ ތެރޭގައި ފައިސާ ދޫކުރުމުގެ އިންތިޒާމު ހަމަޖައްސައި، މިހާރު އެ އުސޫލުން އަންނަނީ ފައިސާ ދޫކުރަމުންނެވެ. މީގެ އިތުރުން މަސްވެރިންނަށް ލިބޭ ގެއްލުން ކުޑަކޮށް، ޚަރަދުތައް ކުޑަކުރުމުގެ ގޮތުން ޚާއްސަ އަގެއްގައި ތެޔޮ ފޯރުކޮށްދިނުމުގެ މަސައްކަތްވެސް ސަރުކާރުން ދަނީ ކުރަމުންނެވެ.

މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެފައިވާ ގޮތުގައި، މަސްވެރިންނަށް ޚާއްސަ އަގުގައި ތެޔޮ ލިބޭނެ އިންތިޒާމު މިހާރު ރާއްޖޭގެ 9 ސަރަހައްދެއްގައި ވަނީ ޤާއިމުކޮށްފައެވެ. ސަރުކާރުން މަސައްކަތް ކުރަމުންދަނީ މަސްވެރިންނަށް ދިމާވާ ދަތިތައް ޙައްލުކޮށް، މި ސިނާޢަތަކީ ޒުވާނުންނާއި ޢާންމު ރައްޔިތުން ޝައުޤުވެރިވާ، ދެމެހެއްޓެނިވި ފައިދާހުރި ދާއިރާއަކަށް ހެދުމަށެވެ.