ފުލުހުންގެ ތަރުޖަމާނަކަށް ޝިޔާމް އައްޔަނުކޮށްފި

ދިވެހި ފުލުހުންގެ ޚިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް ހަމަޖައްސަވައިފިއެވެ.

ފުލުހުންގެ އިދާރާއިން މަޢުލޫމާތު ދިން ގޮތުގައި، ޝިޔާމް މި މަގާމާ ހަވާލުވެވަޑައިގެންނެވީ ކުރިން ތަރުޖަމާނުގެ މަސްއޫލިއްޔަތު އަދާކުރެއްވި ސުޕްރިންޓެންޑެންޓް އޮފް ޕޮލިސް އާރިފްގެ ބަދަލުގައެވެ.

މި ބަދަލާއެކު، ދިވެހި ފުލުހުންގެ ހިދުމަތުގެ ފަރާތުން މީޑިއާތަކަށް މަޢުލޫމާތު ދިނުމާއި ، އާންމު ހޭލުންތެރިކަން އިތުރުކުރުމުގެ މުޢާމަލާތްތަކުގައި ދެން އެންމެ އިސްކޮށް ޙަރަކާތްތެރިވެވަޑައިގަންނަވާނީ އިންސްޕެކްޓަރ އޮފް ޕޮލިސް އަޙްމަދު ޝިޔާމެވެ.

އިންސްޕެކްޓަރ އޮފް ޕޮލިސް އަޙްމަދު ޝިޔާމަކީ މީގެ ކުރިންވެސް ފުލުހުންގެ މީޑިއާ ޔުނިޓުގައި އިސް ދައުރެއް އަދާކުރައްވައި، މީޑިއާގެ ދާއިރާގައި ގިނަ ތަޖުރިބާތަކެއް ހާސިލުކުރައްވާފައިވާ ބޭފުޅެކެވެ.