ރާއްޖެއަށް ގިނަ ފްލައިޓްތައް މިއަދުވެސް ކެންސަލްކޮށްފި

މެދުއިރުމަތީގައި ހިނގަމުން އަންނަ އަސްކަރީ ހަމަނުޖެހުމުގެ ސަބަބުން މިއަދު ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އެރައިވަލް އަދި ޑިޕާޗާ ހިމެނޭހެން ގިނަ ފްލައިޓްތަކެއް ކެންސަލް ކޮށްފިއެވެ.

މެދުއިރުމަތީގެ މަސްލަހަތު ގޯސްވެ، ބޮޑު ހަނގުރާމައެއް ފެށިދާނެކަމުގެ ބިރު އޮތް މި ދަނޑިވަޅުގައި، އީރާނާއި އިސްރާއީލާ ދެމެދު ބަދަލުކުރަމުންދާ ހަމަލާތަކާ ގުޅިގެން ގިނަ އެއާލައިންތަކަކުން އެ ސަރަހައްދުގެ ދަތުރުތައް ވަނީ މެދުކަނޑާލާފައެވެ.

ވެލާނާ އިންޓަނޭޝަނަލް އެއާޕޯޓުގެ ފްލައިޓް ޝެޑިއުލްތަކުން ދައްކާ ގޮތުގައި، މިއަދު ރާއްޖެއަށް އައުމަށާއި ރާއްޖޭން ފުރުމަށް ހަމަޖެހިފައިވާ ފްލައިޓްތަކުގެ ތެރެއިން 30 އާ ގާތްކުރާ އަދަދެއްގެ ދަތުރު ވަނީ ކެންސަލްކޮށްފައެވެ. މީގެ ތެރޭގައި މެދުއިރުމަތީގެ މަޝްހޫރު އެއާލައިންތައް ކަމަށްވާ އެމިރޭޓްސް، ގަތަރު އެއާވޭސް، އިއްތިހާދު އެއާވޭސް، ފްލައި ދުބާއީ އަދި އެއާ އަރަބިއާގެ ފްލައިޓްތައް ހިމެނެއެވެ.

މަސްލަހަތު ގޯސްވުމުގެ ސަބަބުން ރާއްޖެއަށް ކުރާ ދަތުރުތަކަށް ބުރޫއެރި ނަމަވެސް، އެހެން މަންޒިލްތަކުން ފްލައިޓްތައް ގެނައުމަށް ސަރުކާރުން ދަނީ ހާއްސަ މަސައްކަތްތަކެއް ކުރަމުންނެވެ. އެގޮތުން، މީގެ ކުރިން ދަތުރުތައް ނުކުރާ އާ ފަސް މަންޒިލަކުން ރާއްޖެއަށް ފްލައިޓްތައް ބާއްވަން ފަށާފައިވާކަން ޓްރާންސްޕޯޓް މިނިސްޓަރު މުހައްމަދު އަމީން ވަނީ ހާމަކުރައްވާފައެވެ.

މިނިސްޓަރު އިތުރަށް ވިދާޅުވި ގޮތުގައި، ރާއްޖޭގެ ވައިގެ ދަތުރުފަތުރުގެ ދާއިރާ ހަރުދަނާކުރުމަށްޓަކައި އިތުރު އާ މަންޒިލްތަކުން ފްލައިޓްތައް ގެނައުމަށް ސަރުކާރުން މިހާރުވެސް ދަނީ މެދުކެނޑުމެއްނެތި މަސައްކަތް ކުރަމުންނެވެ.